A poi Ko; Chinram ah bom ruangah hliamhma a pumi le a thimi!

Chinram ah bom ruangah hliamhma a pumi le a thimi 44 an si!
=========
SAC nih hramhram in uknak lak a si hnu Chin ramkulh ah a cangmi kahdohnak chungah hmanhmi bom pawl hman a si caah May 24 tiang ah aa hliammi le a thimi 44 an si tiah Chin Affairs Federation nih khawmhsuatmi cazin ah langhter a si.

Mipi chung in a thimi 8 le hliamhma a tuarmi 17 an si i a tangmi 19 hi cu Chinland Defense Force chungtel an si.
Bom ruangah a thimi le hliamhma a tuarmi chung in kum tling lo hngakchia zong an i tel. A luancia kum November 29 ah Mindat peng ah a ummi U Yaung Ngai cu a fapa kum 4 he Sun tlang lei an kalnak lam ah bom an i lamh sual i U Yang Ngai cu a thi i a fapa te cu a kutdong 3 tanpiak a si i sizung ah thla khat hrawng thlop a si tiah theih a si.

Hramhram in uknak lak a si hnu ah SAC ralkap le CDF karlak kahdohnak hna ah bom hmanh a si tawn tiah theih a si.
Asinain, CDF nih cun mipi umkalnak hmunhma ah bom hmanh a si lo tiah an chim. SAC biachimnak nawl a ngeitu Major-General Zaw Min Htun nih cun bom kan hmanmi hi sakhaan pawl himnak ca lawng ah hman a si tiah a chim. Cun, bom hmanh tik zongah ṭha tein register tuah hnu ah hmanh a si tiah a chim fawn.

Chin Human Rights Organization in Deputy Executive Director Salai Za Uk Ling nih cun hmanhmi bom pawl hman hi cu ramdang raltuknak phung buar a si tiah a chim. “Hmanhmi bom pawl a um a si ahcun, kahdohnak a dih a si tikah buainak a dih colh ve lo i caan pek in bom thianh ṭhan a hau. SAC ralkap nih an hmanhmi bom hi Chin ramkulh peng 9 i a pawngkam le khua leng ah hmuh khawh an si. A hleikhun in Matupi ahcun, minung lawng si loin innzuat saṭil hna zong nih an lamh caah a ngeitu an sung tuk”.

Hramhram in uknak lak a si hnu kahdohnak pawl ruangah Chin ramkulh chung khua 300 leng in mipi sing 1 leng nih inn le lo an zaamtak i mipi a thimi 200 deng an si tiah Chin ramkulh mipi phu hna nih an chim.

Hakha khua ah cozah rianṭuan 2 cu CDF tha nan pek hna tiah an tlaih hna. Chin ramkulh, Hakha khua i peng fim cawnnak zung ah rian a ṭuanmi Chief Officer pakhat le ramchung ngunkhuai zungah rian a ṭuanmi Deputy Chief cu Facebook cahmai ah CDF tha nan pek tiah an puh hna i May 24 ah SAC nih an tlaih hna tiah SAC leiṭang thawngzamh Fifty Two nih a langhter.

Tlaih a tongmi hna hi Peng fim cawnnak zung in Chief Officer Pi Vung Huai le ramchung ngunkhuai zung in Deputy Chief Pi Aye Aye Maw an si. An pahnih in Facebook cahmai ah CDF thiltuah nan hnatlakpi hna, thawng dik lo nan thanh, CDF he pehtlaihnak hna nan tuah tiah an puh hna i an tlaih hna hi a si tiah theih a si.

Be the first to comment

Leave a Reply

Your email address will not be published.


*