A Rauhhlan Ah Putin Nih Athapi Dihlak in Ukraine hi a Tuk Khawh Men!

A Rauhhlan Ah Putin Nih Athapi Dihlak in Ukraine hi a Tuk Khawh Men
==========
May 9 hnu in cun official tein Putin nih Ukraine kah dingin thawng a thanh khawh men. A ruang cu, Ukraine a luhhnawhmi ah sungh lawng a renh cang caah, ai chiahmi a ralkap (reserve) pawl tiangin an dihlak in hman i tim sehlaw a dawh ngai cang, tiah US le Western officails nih zumhnak an ngei.

Russia ram ah cun May 9 hi “Victory Day” tiin auh a si i, 1945 i an ram nih Nazi a teinak an lawmhnak ni a si. Cu ti an tei ni theng te ahcun Putin nih i hman riangmang in Ukraine war hi faktuk in a kalpi mi ah hlawhtlinnak um dingin thawng a vun thanh kho mi a si, tiin Western officials nih tuan tein zumhnak an ngei cang.

Cucaah May 9 ah hin phungningtein Putin nih Ukraine cungah raldohnak thanh kho men, tiah Western officials pawl nih an chim. Nihin tiang ah cun, Ukraine a luhhnawhmi hi ‘Special military operation” tiin Putin nih min a bunh peng ko rih i, luhhnawh le ral, timi biafang hmanpiak a duh lo.

“Special opereation’ timi min a hlawt cang theu lai, tiah ka ruah. Horkuang a zawh lawlaw ve cang i, vawlei ah a bawhvah in a vah ve cang caah, ‘zoh u, hi ral hi Nazi kan dohmi ral a si. Cucaah minung tamdeuh kan herh hna. Russia miakpi zenkuan tamdeuh in ka herh,’ tiin a vun ti te lai,” tiah British Defense Secretary Ben Wallace nih LBC Radio ah a chim.

Ukraine President hi Judah mi a si i, Putin nih a luhhnawhnak a ruang hi “Nazi phu hrawhnak” (denazification) tiin min a bunh peng rih. Asinain cu ti min a pek mi cu tuanbia lei mifimthiam le politics kong a cuantu nih an chohlang lo.

“Vawlei cungah a um rih mi Nazi kan doh lio pi a si caah Russia mipi tamdeuh in kan herh hna, tiin Putin nih May Day i ralpi a thanh lai, timi kongah zei thawngpang hmanh ka thei lo nain, ka khuaruah a har lem lo” tiin Wallace nih a chim.

May 9 i official tein raldoh a thanh a si ah cun Ukraine laknak kongah mipi an lungthin a lak ngai khawhmi a si. Cun, Russia law ningah, Putin hi a reserve ralkap pawl hmannak nawl a pek khawh mi a si. Cu pin ah, minung thazaang tumchuk a panhtuk cangmi Russia ralkap nih an herhtuk mi ralkap ca i mitharlaknak (recruit) nawl zong a hmuh khawh mi a si. Nihin tiang i Ukraine ah a thimi Russia ralkap hi a tlawmbik 10,000 hrawng an si lai, tiah Western le Ukraine officials nih an chim.

Russia raltuknak a thaw a cat cuahmah; Ralkap thazaang le thinlung i tumchuh a panh hnu in cun, Ukraine nichuahlei i Donbas pengkulh hi Russia nih ai hmaithlak cang. Hi ka hmun hi 2014 lio te khan Ukraine he faktuk in an rak i kahnak a si.

“Asinain Russia raltuknak a thaw (oxygen) hi a cat cuahmah. Cucaah an ningpi in luh i teinak thanh i, cu hnu cun a ralkap vialte a ram lei ah kirter than i, Ukraine mipi kut ah an ram vun pek ai tim,” tiah US officals pakhat nih Monday i Pentagon biachimnak ah a chim.

Ukraine an luhhnawh ka hrawnghrang i faaktuk in an sunghnak hmual khan an i hrim kho rih lo, tiah US official nih cun a chim. Command and control thitha in an ngeih khawh lo ruangah le a ralkap pawl lungdongh lei an i lak cang caah an derthawm peng ko rih, tiah official nih a chim.

Cu ti a ngan a faaktuk cangmi a ralkap hna an cung i a tu nak in fakdeuh in nganfah an tuar than rih lai cu a duhpiak ve ruam hna lo. Tanglei i kahdohnak nih hin le a zualhma, tuksapur bak a si fawn, tiah official nih a chim.
Kharkiv hrawngah Ukraine ralkap nih Russia pawl cu fawite in an kham, an dawi khawh hna. Asinain cuka hmunhma i thil a cangmi hi thitha in theih fel khawh a si lo. Cu tikah zapi nih an hna dikdiar in an chim thlu kho theng lo. Ukraine ralkap nih Russia a dironh khawh, ti a lang than tinak a si.

May 9 Victory Day phanhnak dingah zarh khat hmanh ai duh ti lo hnu in cun, Donbas si ti lo in kadang hi a sawhkhih khawh men. Duhthimnak pakhat a tuah khawhmi cu, Ukraine nichuahlei i Luhansk le Donetsk hi kadang hlathlainak caah tiin vun lak i, cu in cun chalei Odesa tiang vun nawr, asiloah Mariupol in chaklei pi tiang vun uk dih ai tim kho men.

“May laifang hrawngin cun Luhansk le Donetsk hi Russia nih laak ai timh te lai nak kong hi US intelligence nih fektein an thanh cang,” tiah OSCE i US Ambassador Michael Carpenter nih Monday ah khan a chim. Cun Kherson city i “people’s republic” zong hi lak ai tim, tiah theih a si.

Russia nih hin May 9 hi caantha ah ai ser lai i, tuah a duhmi vialte tuahnak ah ai hman te lai, tiah zumh khawh a si, tiin US State Deparment spokesman Ned Price nih a chim. “Russia nih a raltukmi kong i ai tinhnak hi lethnih in thazaang a chuah i, Ukraine i an sunghmi vialte hmaimilh a duh caah si dawh a si bik,” tiah Price nih a chim.

“Moscow nih Victory Day hi ralpi thanhnak ca i a hman a si ah cun nihchuak ngai a si lai. Cuhlan i ralkap lut dingin a mipi a sawm khawh lo mi kha, tutan V-Day hi caantha ah i lak in minung a pumhkhawmh te lai. Asinain, cu ti caantha ai lakmi nih cun Ukraine an luhhnawhmi a tlam an tlinh lo zia le an i tinhmi suttungpi kongah hlawh an tlin lo zia kha vawlei pumpi hmuh ah a zo ai langh bantuk a si te lai. May 9 hrawnghrang hi cu Moscow sinin biaka tamlak kan theih chinchin rih ko lai, ti hi ka fiangtuk. Cu ve bangin cun, kanmah US le, NATO telhin kan ramdanghawi sinin May 9 hrawnghrang chung cu biaka tampi nan theih ve thiamthiam lai, ti ka fiang,” tiah Price nih a chim. Chelsea Bawi

Be the first to comment

Leave a Reply

Your email address will not be published.


*