SAC Ralkap Helicopter Kan Kah Tiah Chin Defense Force – Kanpetlet Nih A Thanh!
=======
Nihin October 16, ah thazaang ding in a ra mi SAC ralkap helicopter 2 cu, cung a zuannak hmun ah hriamhme in kan kah hna tiah Chin Defense Force – Kanpetlet nih an thanh.
Cu kan kahdohnak ruang ah SAC ralkap helicopter 2 chung in pakhat cu a petrol umnak kan khen leng ah fan(pan-ka) pakhat a kiak, minung hliam an tuar le tuarlo kong ah fiang in theih a si rihlo tiah an langhter. Kanpetlet peng Kyindwe (ကျင်ဒွေး) sakhan ah October 15 ah helicopter 2 in minung thazaang 30 leng a chap tiah theih a si.
A tu ah SAC ralkap hna nih Kanpetlet pengchung ah lam phunkip in minung thazaang chapnak an tuah i rallam sialnak zong an tuah chih khawhmi a si caah mizapi nih um/kal ah ralrinnak ngeihcio ding in Chin Defense Force – Kanpetlet nih cathanh an chuah tiah theih a si.
SAC Ralkap Kuttang Um Sniper Tlaitu Pakhat CDF CDM-Siyin Sin Ah CDM A Tuah. SAC ralkap kuttang rianṭuan sniper tlaitu ralkap Zam Chan Dawl(kum 27) cu CDF/CDM-Siyin sin ah CDM a tuah tiah theih a si.
Zam Chan Dawl(private number ṭah-ṭah- 540719) cu 2015 in ralkap ah a rak lut i Meiktila ah sniper tlaitu ralkap pakhat a si. SAC ralkap nih hranhram uknak an lak ruang ah 2022, October 7 ah SAC ralkap rianṭuannak cu kaltak in CDM cawlcanghnak a tuah tiah CDF/CDM-Siyin nih October 15 ah cathanh an chuah.
Zam Chan Dawl cu SAC ralkap thilsual tuahmi cung ah a lungtlin tilo caah cu rianṭuannak a kaltaknak hi a si. Cun SAC ralkap kuttang um rianṭuantu hna nih ram le miphun dawt le kilven nan duh a si ah cun nan mah he ai naihnak PDF sin ah a rannak in CDM tuahcio uh tiah CDF/CDM-Siyin nih an thanhmi ah cun an langhter chih.
Gangaw Pengkomh Chungah A Voi 6 Nak Drone Training An Tuah. Gangaw pengkomh chung ah a voi 6 nak drone training cu HUF hriamtlai phu hruainak in tlamtling tein an tuah khawh cang tiah theih a si.
Yaw hmunhma chung tualchung hriamtlai phu simi CDF-KKG, Gangaw thlanglei PDF, PDF(Gangaw), le PDF (Htilin) ralkap hna an i tel tiah theih a si.
Mara kong buainak pawl ka rel ah a ka tuaitam ngaimi tete an um! MDF an dirh hlan ah MA hruaitu le Kawl media rak i tonnak ah, “Mara ram chung ahcun ral a um lo a hau. Cu lo ahcun Thantlang bantuk in kan ttio dih lai i Mararam chuahtaak dih a hau kho,” a rak ti. MDF hruaitu hna nih online bia ruahnak ah, “hriam Kan tlamtlin deuh in ral cu Kan tu lai. A dang pawl hi Hriam nei huaha lo in ral an tuk caah an thih lengmang nak a si,” tiah hmun tam nawn ah an chim tawn.
Ngaphaipi I kahnak a chuah hnu ah Mizoram i a ummi Mara area Siaha district chung ah khua a sami chung in MDF a ttanh lo mi paoh chuah dih ding tiah an thanh. Cun Mara ram chung in Kawlram i hriamnam luhpi nak Kan kham lai ti a si. Mara mipi nih an ruah chih ve awk ah ka ruahmi cu pengdang mipi nih CDF an ttanh deuhnak hi Dr. SaSa an dawt ruang ai tel timi hi a si.
Mara ram chung i ral umter lo an duh ahcun frontline ah ral an tuk ve ding a si. Thantlang in maw, Matupi in maw, Paletwa in maw ralkap rak zut hna seh law an i ven khawh hlei lo ding a fiang. An ram humhimnak an duh taktak ahcun frontline ah ral an tuk bak ding a si ko.
Hriam tlamtling loin ral an tuk ruang ah tamtuk an thih nak a si timi hi a dik ve ko nain Mindat CDF ralkap nih a nam hna mi zoh khawh lo ruang ah pengkip mino nih tlamtlin lo bu in an i ot cionak a ruang ah ai tel. Phundang cun miphun hawi temtuarnak i hrawm ruang ah a si.
Saiha district chung in mipi tthawlnak phun le hriamnam hna kham ding in an i hrocer mi hi Mara caah a hlawknak a um ngai hnga maw ka ti. Chinram le Mizoram an i ramritnak zoh ah Mara district hi hrial awk ttha lo in a um mi a si lem lo. Cun ralzaam an tam tikah hnahnawh nak a um ve lai nain an khua le an ram ah Tangka lutchuak zong a tam deuh ve. An sung thlu lem lo tibia.
Mizoram in an tlangtlak tukmi hna a langh tuk ahcun MDF lila hi ZRA bantuk in hmuh te an fawi te. Khuachak Mara nih zeitluk in an dirpi ko hna hmanh ah Kawl nih influence mi ralkap bu nih cun India hriamtlai phun ah chiah hramhram i rialchih khawh an si men hnga. Hiti ti tikah Mara CDF ka ttanh hlei bia si loin online chung i an cawlcangh ning ka sia a rem lomi ka langhter bia a si. MDF i an policy taktak zong ka theih lo caah ka palh kho.
Hei ti ko ahcun ral hna kan tei khawh ahcun Chak Mara le Thlang Mara, Chak Laimi le Tlang Laimi cu chim lo Mizoram le Chinram khi cozah dang veve tang i Kan um hmanh ah ai pehmi ram bantuk ah ser khawh a si te ding khi a si ko. Atu ah mah peng le Tlang I ven tuk hi sullam a ngei tuk te lem lai lo. Credit: Mang Hram Kung
CNA Ralkap Thang Do Kap le Bawi Cung Nung Ruak Tlamtling Tein Vui An si. Ram Le miphun ca ah a nunnak pemi CNA Ralkap Thang Do Kap le Bawi Cung Nung ruak cu zinglei suimilam 6 le cheu ah tlamtling tein an vui hna tiah theih a si.
October 15 zinglei suimilam 4 hrawngah an ruak phanhpi a si hnu, pumhnak service tuah hnu zinglei suimilam 6 le cheu ah tlamtling tein an ruak vui an si. A sinain ram ca ah a nunnak a petu CNA pakhat tu cu a ruak laak le phanhpi khawh a si rih lo tiah theih a si. Ram le miphun ca ah a nunnak petu dihlak upatnak sangbik kan in pek hna.
Paletwa Ah SAC Ralkap Nih Tualchung Mi 2 An Tlaih Hna. Chin ramkulh, Paletwa khuapi ah SAC ralkap nih khualtlawng cazin kongkau he pehtlaiin October 13 ah mino 2 cu an tlaih hna tiah tualchung mi nih an chim. Tlaihkhih a tongmi hna cu kum 20 luan mino an si i, an pahnih in pa-yan rianṭuanmi an si tiah theih a si.
Tlaih a tongmi pahnih chung in pakhat cu October 13 zaan ah khualtlung cazin an checklio ah an tlaih i, pakhat cu a thaizing zinglei ah an tlaih tiah tualchung mi nih an chim. An pahnih in Paletwa khuachung Rakhine sang tiah auhmi(Rakhine miphun tampi an umnak) Paloauktaung(ပလုတ်တောင်) sang ah an tlaih hna. A tutiang ah tlaihkhih a tongmi hna an konglam thawng theihmi a um rihlo tiah tualchung mi pakhat nih a chim. Credit: THe Chin Post
Leave a Reply