A Thi Ding Menmen CDF Val Kan Si Lo!

“A Thi Ding Menmen CDF Val Kan Si Lo”
==========
Thih cu kan thi dih cio ko lai! Ralram ah maw kan thih lai asiloah ralram lo zongah! Nain, a thi ding menmen cu kan si ruam lo. Dothlennak ruang i kan thih si cun ‘Miphun le Ram’ ca nunnak pekin kan thi va si ko hnga, nain mah zong cu a menmen a si ruam lo.

Kan naupa William TL Thang nih ‘CDF Valpa’ timi hla a phanmi hi a tha ngai ko. Tuanbia pakhat a tial a si ve. A hla bia kongah dodalnak zeihmanh ka ngei lo. Nain, hi hla ruangah kan ralkap tampi hna an lung a zor sual hnga maw ti bel cu ka van phang pah bia a si.

CDF-KKG kan ralkap pawl nih an ka chim tawnmi cu ‘ralram kan kal ah hin 70% cu a thi cia in kan kal tawn,’ tiin. Nain, mahti kan kal ko bu ah kan lung kan thawnter ve peng i, a thimi cu kan thi ve, hliam a pumi zong kan um, a him dam mi zong kan um ve.

CNF Chairman nih a rak chim tawnmi cu ‘Ral kan dohnak ah hin kan thinglung (moral) a biapi tuk. Kan moral a dawng cun kan ral kan tei kho lai lo,’ tiin. Zei harnak paoh ton aikun, CDF val nih cun kan lung kan thumh lo a biapi tuk. Kan lung kan tawnter peng hna lai.

Kan ral pawl zong nikhat hnu nikhat kan tei ziahmah cang. Tuan ah cun Offensive in an rak kan nor nain atu cu Defensive lei tu ah an i mer cang, hmun tampi ah. Kanmah tu Offensive in kan kal lio a si caah kan tei lai te hna i kan lung a dongh/zor sual lo nakhnga ‘CDF Val’ tang tulmal ko hna usih. Teinak thantar le niceu dawh zong kan hmaika teah a um.

Biapeh: “‘CDF Val’ cu ithim hlah uh! Thaizing kiptuh men an si,” timi hi, Kei nih cun thim ko hna uh! ‘CDF Val’ tluk pasal tha an um lai lo! Thaizing kiptuh kan si zongah ‘a thi ding menmen cu kan si lo.’

Palh chap than ti lo a biapi! Tutan kan ram dothlennak cu kanmah chan ah a voi khatnak kan tonmi a si. Cu tikah, ka tuanmi rian hi a sen maw a nak hme ti hmanh kan thleidang thiam tawn lo. Miche cu dothlennak nih a chuahpimi reng sangsang hna kan van i khinh, kan liang cung cio a phak tikah zeitin kan phurh lai i zeitin hmailei ka kalpi lai ti hmanh kan thiam tawn lo.

Tuan/Cawn/Hmuh/Ton– bal lomi rian lawngte a si tikah kan hmaika ah le Ningzah/Mualpho/Tisual/Chimsual– palhnak phunzakip nih a rak kan hngah peng ve! Minung cu ahopaoh aa palh pengmi le aa palh kho pengmi kan si hna—Jesuh dah ti lo. A luancia caan kan palhnak cu kan remh than kho ti hnga lo, nain palh chap than ti lo ding cu kan tuah khawh ciomi a si.

Cu ‘CHAP’ than ti lo nakhnga kan palhnak zong kan i theih i kan pom a hau ve. Palhnak a thei i aa pom ngammi cu remh than duhnak lungput a ngeimi le palh chap than ti lo ding a vengmi an si hna i mah cucu mizei paoh zong nih ngaithiam khawhmi a si.

Ka palh ko ti aa theimi nu zong cu Jesuh zong nih sual a rak phaw ve lo. Nain, a sual bel va sual ti hlah tiin a rak ti (John 8:7). ‘PALH’ cu minung kan nunnak ah a phung si ko. ‘PALH CHAP’ than lo tu kha a biapi. Credit: Za Bawi Thawng

Be the first to comment

Leave a Reply

Your email address will not be published.


*