AA cu Mipi nih an dirpi hna, spy an thawng taktak ti a fiang!

AA cu Mipi nih an dirpi hna, spy an thawng taktak ti a fiang!
==========
June 23 ah Rakhine khualipi ah ummi, AA nih ralhrang bothum le sen 0 pa an tlaih hna ruangah Rakhine khualipi ah check hlatnak fak an tuah.

AA he aa pehtlai mi hna cu, ralhrang nih an tlaih len hna caah AA nih ralhrang le pelek a tlaih in atlaih uahmah ve hna. Hodah tam deuh aa tlai kho lai ti i zuam cawh dawh.

Hitluk an i ralrin ko bu ah an nung bakin an tlaih khawh lengmang mi hna hi cu, AA hi a men an rak men hrim lo ee. An mipi nih an dirpi hna, Spy an tthawng taktak ti a fiang. Kannih State vial ah an hei lawr ning le an duhnak hmun paoh ah an va um mei ko.

AA nih Rakhine khualipi um, ralhrang bothum pa nihin ah an tlaih hoi. Nizan ah palek pathum an tlaih rih hna. Zenkuan hau loin atlaih in an tlaihmi an tlawm tilo. Kan hnu lei ah a kap in kap lo in a tlaih in an tlaih bak ko.

Tulio AA cawlcangh cu dah ngai, ralhrang hi kap loin a tlaih in an tlaih tawn hna. An thah colh lo ahcun a zam ve lai. UN le Geneva nih an kan bawmh mi aum lem lo i Geneva law zulhin kawl rallokap an nung in tlaih in thong thlak hi ngawl cang ah a tha lai. Kah lo in tlaih khawh cu an mak bak ko.

Kawl ralkap nih a tihmi le a celh lo bikmi cu an mah bantukin zangfahnak ngei loin cianh khawh ve hi asi ko. Lu pakhat na lak ahcun na lu pakhat ka lak ve hrim lai timi lam hi Kawl ralhrang nih a celh lo bik si dawh asi. Cucu AA nih a fiang tuk caah Kawl ralkap cu funghreu in voikhat ka mipi na tuk ahcun a tlawmbik voikhat kan tuk ve hrim lai ti phun in atu hi Kawl ralkap /palek pawl cu a tlaih cuahmah ve lio nak asi.

Atulio dohthlennak ah pakhat le pakhat ibawmh peng kan hau. Atlawmbik ah kan lung a rual khawh dih rih lo hmanh ah a hua lomi kan si a hau. Kan thlachuah icheuh zong kan hau. Pakhat le pakhat kan pahrang ning a lo cio lo nain kan iupat thiam le rian kan tuanti thiam ahcun a thawng taktakmi dirhmun ah kan phan ko lai.

Nain iralrin awk ngai asimi cu kan thlachuah a hman zia kan thiam a hau. Kan thiam lo ahcun kan lo kho. Tahchunhnak ah Tlanglei laitlang pawl khi chaklei pawl nih phaisa thluachuah kan hmuhmi hei cheuh siangh loin kan mah ca lawng bakah i hman sehlaw , an mahlei i minung thluachuah ralkap pawl abikin CNA ah a ummi vialte khi rak kir uh tiin au ve hna sehlaw aho ca hmanh ah a tha ding asi lo. Hihi asi kho lo ti ding asi lo, a si kho mi asi.

Cucaah pakhat le pakhat tantinak le itheihthiamnak lawnglawng hi aho ca poah ah a tha. Abikin atu bantuk harsatnak a phunphun lak dohthlennak tuah lio ah aho peng le tlang dah kan lakah a harsat bik le bawmh an herh bik timi zawnruah thiamnak , siaherh thiamnak hi kan herh khun caan asi ko.

Katha ni 11 kahdohnak chungah SAC ralkap 145 nak tlawm lo an thi! Sagaing ramṭhen, Kathar peng chungah ABSDF, Kathar hmunhma PDF, Kathar pengkomh PDF battalion 3, Yatkyae PDF le hawikomh EROs nih june 11-21 tiang SAC ralkap pawl an kah hna i ralkap 145 nak tlawm lo an thi tiah Kathar PDF nih a thanh.

June 11 Laungdaw Oo kahdohnak ah SAC ralkap pawl cu Kathar pengkomh battalion 3 hruainak in ABSDF le PDF phufonh nih an kah hna i ralkap 30 nak tlawm lo an thi tiah theih a si. June 17, Kathar car gate pawng SAC ralkap pawl cu ABSDF hruainak in Kathar pengkomh PDF battalion 1 le PDF pawl fonh in an kah hna i ralkap 20 nak tlawm lo an thi tiah theih a si.

June 17 Kyaukmyathna khua pawng ah SAC ralkap pawl cu Kathar pengkomh PDF battalion 3 hruainak in PDF phufonh nih an kah hna i ralkap 20 an thi tiah theih a si. June 18 Alaykyone khua pawng, Nat tikhor pawngah SAC ralkap le mipi hriamtlai phu karlak ah kahdohnak a chuak ṭhan i ralkap 60 nak tlawm lo an thi tiah theih a si.

June 19 ah SAC ralkap hngahnak Myasesa gate cu mip hriamtlai phu nih drone in bom an thlak hnawh hna i SAC ralkap 5 an i hliam. June 21 ah SAC battalion 121 umnak cu mipi hriamtlai phu nih drone in bom an thlak i ralkap 15 nak tlawm lo an thi tiah theih a si.

Kathar peng chungah SAC ralkap 400 hrawng cu Kathar khuapi ah hmunhma an khuar i Kathar peng nichuah lei le nitlak lei ah kahdoh an tuah i Nga Oo Infantry 121 nih thazang 200 hrawng in Shweli tiva kam, Htichait ramri hna ah kahdohnak a tuah caah i phukhat le phukhat i bawm in kahdohnak tuah ding in Kathar peng PDF nih cathanh an chuah.

Karen ram ah kahdohnak 30 leng a chuak, Chin ram ah kahdohnak lei entainak a fak. Karen ram, June thla chungah kahdohnak 30 leng a chuak i SAC ralkap 48 nak tlawm lo an thi tiah Karen National Defense Force (KNDF) nih a thanh. SAC nih Karen ram ah hramhram thiltuahnak a buar lengmang i June 1-15 tiang nifatin kahdohnak a chuak i kahdohnak 30 hrawng a chuak tiah KNDF nih a thanh.

June 15 ah Pharuso peng Dawngee khua Catholic biakinn, Father umnak le hall zong SAC nih a khangh. KNDF lehrulhnak ruangah ni 15 chungah ralkap 48 nak tlawm lo an thi i tampi nih hliamhma an tuar tiah theih a si. “SAC nih hriamtlai phu pawl a tonnak hna hi dothlennak thazang der seh ti a duh caah a si. June thla chungah SAC ralkap he kahdohnak hi 30 deng a cang.

June 1-15 tiang pehtlai in kahdohnak a chuak. Nikhat ah voihnih/thum kahdoh a chuahnak hmunhma zong a um. Chunnitlak kahdoh a chuahnak zong a um. June thla chung lawngah SAC a thimi hi 48 cazin kan lak khawh. Mah nakin a tam deuh kho” tiah KNDF biachimnak nawl a ngeitu nih DVB ah a chim. Myanmar ram chaklei hmunhma le Karenni ram ah nifatin kahdohnak a chuak i a thimi zong an tam.

Chin ramkulh chung ahcun SAC nih khuapi hna ah hmunhma a khuar ko nain CDF nih lak khawhmi dirhmun a si tiah Mindat mipi uknak phu nih a chim. CDF nih a hlan bantuk in mah le mah i kham si loin relh lo kar kahdohnak pawl tuah a si caah SAC nih mipi pawl an umnak hmunhma ah hriamngan in a kah i a bawhtu pawl a ṭhencheu hna. June thla chungah Mindat, Matupi, Paletwa peng hna ah nifatin in entainak a fak.

Mindat mipi uknak rian ngeitu Ko Yaw Man nih “Khuapi an tlaih ko nain CDF nih duh caan poah lak khawh a si. 40/50 phu khat hrawng in kah si ti loin 40/50 hrawng in hmun 3/4 ah hmakhat tein kah a si cang. Mah kha an ṭih ngaimi a lo. Cucaah mipi pawl an hrem ṭhan hna. CDF nih an kan kah ruangah a si tiah mipi le CDF an kan huatter” tiah a chim.

Kahdohnak he pehtlai in SAC nih thawng a thanhmi um lo nain PDF pawl nih an sualmi a si tiah a puh ṭhan lengmang.
SAC hruaitu nih tlangcung hriamtlai phu pawl he tonnak ngei ding in sawmnak a tuah ko nain 2008 phunghram kalh in uknak a chuh, ASEAN hnatlaknak 5 a upat lo, mipi inn le lo a hrawh, kahdoh, tlaih, thah, ram hruaitu pawl tlaih le sualphawt, ram pumpi kahdaihnak buar in tlangcung hmunhma ah hramhram in thil a tuah caah ṭha tein biaruah ding ah a caan a tlai cang tiah ramkhel lei thiamsang pawl nih an ruahdamh.

SAC ralkap mawṭaw 98 cu bom puah hnawh a ton caah 15 an thi, mawṭaw 3 a rawk. Monywa in Mandalay lei ah a kalmi SAC ralkap mawṭaw 98 cu June 21 zinglei ah Sagaing ramṭhen Chaung U khua luhnak ah voi 5 bom puah hnawh a tong i SAC ralkap 15 an thi tiah theih a thi.

Mawṭaw 9 chungah SAC ralkap an um i adang mawṭaw ah thilrii pawl an phor tiah Chaung U PDF rianngeitu pakhat nih The 74 Media ah a chim. “15 an thi timi hi zeitindah kan fianh khawh ti a si ahcun, SAC ralkap pawl nih an chimmi a si. Kan kahnak hna pawng khuate ah an buai. Kan minung 15 an thi, nan khua kan khangh lai tiah an tlerh hna. Mah bia thawng in 15 an thi tiah kan theih khawh” tiah a chim.

Khinmon khua le Chaung U khua karlak ah voithum bom puah hnawh an si i Chaung U luhnak ah bom voihnih puah hnawh lioah SAC ralkap mawṭaw 3 a rawk tiah a chim.SAC ralkap pawl nih kah thlorh in an kahmi a um ko nain hliamhma a tuarmi an um lo tiah theih a si.

Be the first to comment

Leave a Reply

Your email address will not be published.


*