Aizawl ah CDF Hriamnam an tlaihmi cu aho te tal dah a si!

Aizawl ah CDF Thantar le Meithal pawl an Tlaihpiak Than Hna!
=========
Mizoram khuapi Aizawl pawng ah Myanmar lei ah kuat ding CDF thantar le hriamthil cheukhat Assam Rifles nih nihin May 1 zing Sml 2:30 hrawng ah an tlaih, tiah tualchung thawngzamh hna nih an langhter. Nihin May 1 zinglei ah Mizoram, Aizawl khuapi Nichaklei ah a ummi Kelsih timi hmun pawng ah Kawlram lei kuat ding in an fimmi meithal pawl cu Assam Rifle nih an tlaih tthan.

Mawtaw 2 cung ah CDF thantar 10, CDF badge tom(box) 3, air gun zuun 3, le meithal zuun 8, scope 1 le bomb puahnak thilri bawl an tlaih i, India mi mawṭaw khaltu 4 zong tlaih chih an si. An tlaihmi lak ah CDF thantar 10, CDF ralkap liangbenh (badge) bawm 3, meithal 8 le bomb sernak thilri cheukhat an i tel. Zei bantuk CDF hriamtlai bu thilri an si timi belte The Chin Journal nih fiang in kan thei kho lo.

Ruah Fak Tuk In A Sur Caah CDF-Mindat Umhmun Khuarnak Cheukhat An Rawk! CDF-Mindat nih umhmun an khuarnak sakhan cheukhat cu ruahpi fak tuk sur in, thli a hran caah voihnih tiang an rawk, tiah theih a si. “April 19, ah voikhatnak ruahsur ruangah remh a si cang. Cun, April 29 ah ruah fak tuk in a sur ṭhan caah a rawk dih ṭhan i, ruah voihnih hrawng lawng a sur nain chumhchuannak le ihnak ṭhalo in an rawk.

Atu hi ruahti tlak caan zong kan phan rih lo nain hitluk in a rawh caah, fur caan tikah cun a fawi lai lo, raltuknak hmun ah nunnak thap in a kal mi hna an tlun caan ah umnak ṭhaṭhi zong a um lo, mu-ca (မိုးကာ) cungcih hna cu hman awk an ṭhat ti lo caah canphio cungcih le vampang tal he sak khawh kan duh ko.

Tung ca ah cun kan ralkap hna nih an i dinh caan ah an kan ah piak ko. Cucaah nan tuah khawh tawk cio in bawmhnak kan pe cio ko uh tiah kan in nawl hna,” ti in CDF-Mindat nih mipi sinah bawmhnak an hal. Bawmhnak pek a duh mi hna nih: +95 9777182971, +95 9898786900 ah pehtlaihnak tuah khawh a si lai.

Hriamnam he Hakha kan rak lut hmasa bik ni (April 29); Ralkap cawnnak thlakhat chung kan laak i kan dih hnu 2021 April 28 zaanlei suimilaam 3:00PM Camp Victoria in Hakha lei ah CNA minung 18 le CDF Hakha minung (a zat ka philh) hna he Hakha lut dingin hriamnam he kan rak i thawh. UCCF Pastor Rev. Tluang Hre nih thla an rak kan campiak.

A voi khatnak ralram kan rak kal lai a si ca ah biakinn hmai in CNA kan nulepa hna nih mitthli tla pah in an rak kan thlah. Ruah siamsiam tein a sur. Khual lam let awk a that lo ca ah kan rak pah chih. Cuticun kan kal i, Tlangkhua kan phak hrawng ah khua a mui cang. Kan motorcycle a rawk i Tlangkhua pawng ah kan rak chiah.

Khuallam kan peh than, Tiahdai lampial kan phak ah khua a mui tuk cang. Lam a chia, lam a nal. Ruah nih a chei lo ca ah vawlei a khut ning ti awk a tha lo. Suimilaam 11:00PM hrawng Falam Peng Lungtar le Tal khua karlak (Tal kan luh lai) ah ralkap motor a ngan mi pahnih le palek motor a hmemi pakhat nih an van kan fuh thluahmah kan hmuh.

Kan hmaikal a si mi mithi kan naupa Salai Phun Sang nih, “Eh khah, an SAC ralhrang an rak kan fuh hih kir zok uh kir zok uh,” a kan ti i rianrang takin kan ratnak lam cia in kan kir. Lampi cun lamchak le lamthlang in kan bawh hna. Minung i thah timi zaan mang hmanh ah manh lomi meithal kan tlaih a voikhat a si tik ah kan tha a kan therh. Nu pakhat te nih a rak kan zulh (zoh ah zaang a fak. A hmai thikhal in a khat dih).

Keile bang cu minute 30 hrawng kainak tlang (a cho ning a mak) min 5 ah ka phan manh (ka meithal, AK Kuan 1500 le ka bag kai put pah). Kan hawipa pakhat AK zuun 5 bak cu cho ahcun ai kai pi ve (keimah nakin a rang deuh). Meithal kan tongh ka bak cu si kaw kuan rawn hmanh kan i harh rih (thinphan rawltam a si rih). Kan motorcycle lamthlang a remnak poh ah kan nawk dih. Cuticun caan sau nawn kan bawh hna… an rak chuak lo, “Aaa…hihi kan i palh maw a si hnga an rak chuak bal lo e,” kan ti i khuami kan chawnh hna. Khuami nih le kan hmu hna lo ti a si. Ummm… a fiang an kan rat hnawh ko kan ti i kan bawh rih hna.

Kan chawnh than hna i motor cu an len cang an kan ti le kan bawh hna nakin cun kan chuak i Tal lei ah kan pang. Suimilaam 12:00AM hrawng si cang. Thlanrawn tiang khi Hakha CDF nih an rak kan don. Kan paw a tam tuknak ah kan hmuh mi poh ei kan i tim rawh.

Thlanrawn in kan khuallam cu slm 1:30AM hrawng in kan peh than. Hriamnam he uniform he kan si tik ah lampi in kan kal ngam lo. Thlanrawn khuataw in kan kal i lam a chiat tuk ning hi chim pit bak si (lam kan i sam pah). A chuk caan ahkhin kan hmur nih kan paw tawng deeng tiang a chuk. A cho caan ah le kan paang nih kan cal a dai deeng (perh pah mu). Lam a bit tuk ning hi caku cung i suai chom mi a lo.

A lam hi a chiat le a bit lawng si lo. Ai kual tuk meisei hoi. Thlanglei zoh sual ahcun lungtur in rilh thluahmah ding tluk khin a sang. Slm 3:00AM hrawng ah khua pakhat kan pha. Lam a chiat tuk tik ah kan motorcycel a rawk dih. Hakha a naih pah cang. Kan kal than i khua pakhat kan pha. Mino nih zaanriah an rak chumh i kawbi meh he. Pawtam tuk lung cu si kaw, a bel tiang kan liah dih (a nuam bak hoi).

Slm 6:00AM ah Hakha pi cu kan pha. Zaan khuadei kan kal tik ah kan baa kan mit a ku. Kan naupa Phun Sang (tleicia) hna cu a cycle khalh pah in ai hngilh i luti hor ah a rak tlu. Hakha kan luh ahhin ralhrang nih Gate an hngah ka cu si kaw, an kan hmuh tung men ko la, nain zei an rak kan ti lo. Hakha kan hmuh lonak zong cu a sau le khua a dei Hakha kan luh cu kan batnak vialte kan philh dih (Hakha pi kan zoh ah).

Ni hnih hrawng kan i din le mission ngeih ding timhlam kan tuah. A hmun kan zoh, a sining kan i chim hna, Khuachung ah meithal he zapi hmuh in kan rak kal. Lamkam in mipi nih an kan don ti rawl tangka a phunphun an kan pek, an tap an mitthli a tla. Credit: Salai Tluang Te

Be the first to comment

Leave a Reply

Your email address will not be published.


*