Amah pumpak luatnak ruat loin a hawile caah thih aa thim tu Amerie (kum 10)

Amah pumpak luatnak ruat loin a hawile caah thih aa thim tu Amerie (kum 10)
===========
Nai Texas sianginn mithah nawn nak kong ah mipi thinlung a la ngaimi cu Amerie timi kum 10 nute a si. A hawile meithal in an vun kah hna a hmuh tikah amah nunnak ruat loin a chanh hna. A hawitha pakhat a nunnak a dih ruahmah a hmuh.

A dang a hawi caatang khat an kah i a thawh chuah a barh thluahmah a hmuh than. Amah cu zam ah cun a luat hnga nain a hawile a thi cuahmah mi hna bawmh ding ah tiin 911 a chawnh hna. Cu ti 911 a chawnh hna nak ah cun Amerie cu an kah ve.

Hrinhtu a pa a celh lo. “Nangmah zawnhmanh ruat loin na hawile na chanh hna nak ah kah na tong ka fanu te zeihuah dah na huah” tiah a ti. A nun cawntlak a si. Amah luatnak ruat in zam si loin a hmai ah a thi cuahmah mi a hawile sin ah thih aa thim.

Cucu maw Second vanram cu a si ne hnga? Kan Pathian nih kan nih lai miphun zawng ka zaangfah ve i American ram ah kum 10,15,20 reng lo tluak a um mi zawng kan hawng um len ve cang hna. American ram hi athatnak lawng kan hmuh tawn i, achiatnak, aharnak, athatlonak, achamhbaunak le tih anunnak vialte kan hmuh ve lo tik ah apawi ngai.

America mi hi zohchunh awk tlak asinak tampi a um nain, an chiatnak zawng a tam tuk ve. Lak ding le cawnding tampi a um hlawt ding le laimi kan sining he ai milhlo mi tampi a um. Kan then thiam lo ah cun hi ram cu lohlakva hrawnnak le rawhralnak a fawibiknak ram pakhat asi kho tiah ka hmuh ning tlawmpal van langh ter kaduh ve.

America ram cu vancung ram bantuk ah kan rak ruah tak cio kan mawh lo zeicatiah America sining taktak kan rak thei ve lo. Atu ah cu America si ning kan van theih pah ve cang hna. Hi ti ning te in America hi akal ko ah cun, Atu hmanh ah Pathian a um lo ti tluk ah nikhat hnu ni khat an ruah cang. America ram hi “Sodom le Gormorrah” dirhmun aphan lai lo tiah aho nih dah kan chim khawh hnga? Laimi zong nih America lifestyle le nunphung hi, perfect tuk in kan ruah sual le kan lak dih sual ahcun, Kan lairam kan kuali pi Hakha khua zong khi, Sodom le Gormorrah ban tuk ah achuah lai lo tiah kan ti kho te hnga maw?

Kan lai phungthluk ah a um mi cu “Kawltlawng bia le tipil bia” ti bak asi ko tiah ka ruah. Laimi pakhat nih laimi vanram cu America hmanh atluk pek lai lo arak ti. Pakhat nih a ti ve than mi cu, second vanram a ti. Pakhat nih, paradise ati ve than. Adang pakhat nih America ram rumnak, fimnak, thiamnak, minung dawhnak, motor tamnak, lam thatnak, vanlawng tamnak le zeizongte thatnak lawngte zoh in, America cu, vanram nak nuam ati ve. A dik nak tampi a um ve taktak ko e. Asinain laimi mi tampi nih America sining hrap khat lei hi, kan rak hmu kho ve tawn rua lo. Kan phungthluk theo “Kawltlawng bia le Tipil bia” ti mi theo cu a chuak than ko hih.

America minung nih, meithal hi lente celhnak le minung hi, hmuiselnak ah an hman ko cang hih. “Vawleicung ah, thlapa chuilh lawng aba cang” timi khua, a safe bik ti in ruahmi khua, CIA le FBI le police tamtuk nih kilvenmi khua cu, mipi tihphannak tang ah um asi cang. Minung an i kah tuk cang caah FBI le police zong zeitte an ruat kho tuk ti lo ngaihchia taktak asi hi mu cucaah, America hi sullam ngeilo “Lawlessness” in anungmi tamtuk umnak ram si timi cu al khawh ding asi ti lo.

Ni zaan ah Dallas khua ah kum 18 pa nih hngakchia duh nung tete tam tuk a khah hna kha mu America cu tih a nung taktakmi, rammui kan si ko cang hih. Rammui a rak kan timi ram tu nih, mission tuan kan hau cang lai hih! Democracy le Freedom an uar tuk ruang ah, “Freedom abuse” an tuah ruang ah asi. Plato nih, Democracy taktak cu vawleicung ah aum kho lo ee” a rak timi kha a dik tuk ka ti ve. Hi ram freedom hi, tih a nung tuk cang hih an freedom an uarnak nih zeidah a chuahpi chih van zoh tuah than hna usih!

America ram hi mithahlainawn atambik nak, ngakchia tambikthahnak ram, vacung paduh atambiknak ram, nuva tangthen atambiknak ram (50-54% an ithen), Fir atambiknak ram, thawngtla an tambiknak ram, cozah nih minung tambik thahnak ram, tlaihhrem a tambiknak ram “Second paruk ah nu pakhat an tlaihhrem ti asi” Lakfapawi a tambiknak ram “Kumkhat ah lakfa 1300000 renglo an chuak” nu pakhat nih va voi tambik neihnak ram” mi pakhat va 15 ngeimi tampi an um”, kumtlinglo vangei tambiknak ram, tawzuar tambiknak ram pakhat ah aa chuah. Cucu maw “Laimi vanram nih atluk hnga lo? Cucu maw vancung khua le paradise cu asi ne hnga?

Tu hrawng chinmi hna nih kan ton mi thawngpang hna cu kan theih dih nan theih dih cio hna. Chinmi hi ramthum nak ah hin a fawi nak cun kum 10 fai tluk lawng kan um rih mah chung hmanh ah kan zo za rang a lang dih manh cang hi mu, Hi pin lei ah kan ton ding mi an tam tuk rih ti cu chim hau lo in a fiang rih mi asi. A ngaingai ti ah cun ramthum nak hi na laihri kan laihri kan i ten nak ram asi lo cuh!

DUI tibantuk thonghna na rak tlak bal thil hna kan fir nupi le fa le hna kan vuak hna tibantuk ah cun an ram minung na si ko cang hmanh ah i ral rin ngaingai kan hau nan hau cio hna cuh! Ramthum nak hi kan laihri ten nak ram taktak a si lo ti hi kan theih cio peng ding hna asi!

Jerry Springer show minung tampi nih cun, nu le pa sualnak cu lentecelhnaktluk in an ruah men. Vacung paduh cu, va le umlo kar ah “Umhar pheng thil” men ah an ruah. Nupi le tawzuar cu, family income ah an chiah men. Chiatha khat sualnak “Sodom le Gormorrah” Sualnak cu, “lifestyle, personal choice” an ti men. Rilikam khua tampi ah, College le tanghra siangngakchia pawl, nuamcen le chun laicer ah, nu le pa sualnak abubu in tuah le video thlak, nu nih an chiatha piah kha, “tuition fee” kawlnak ah an ti men. Aw laimi nih vanram bantuk ah kan rak ruahmi, laimi vanram nih a tluklo mi ram hi, amuihnak lei in zoh ahcun, khangh ding tlak, “Sodom le Gormorrah” bantuk asi nak a um ve ko cang.

Cu vial lawng maw si nai sai hlah nai teah kan mah America ram i a um mi Pastor pakhat lairam lei a va tlawng ka chimh mi pakhat cu laitlang lei zawng “Sodom le Gormorrah” sualnak tluk in an sual deuhnak tampi a um len ve cang e tiah ka chimh. America ram ah siseh Lairam ah siseh Democracy, freedom timi bia hmang in, mah bantuk lifestyle a hmang mi an karh chin lengmang cang. Bible le Pathian a ralchanh mi mifim an tam tuk cang fawn.

Kan bible ca cu, Darwin cawnpiaknak nih alan chin lengmang. Chim duh mi cu Pathian zong tih ti lo, Bible zong zumh ti lo, minung nunnak zong upat le i tihzah zawng a um ti lo, ni zaan ah zei sualnak ngei lo ngakchia hna misual kut in chikkhat teah duh nung tuk mi tete an nun nak an liam ruangmang hna kan theih cu kanngaih a chia cio kan vawlei pi hi a him hrimhrim ti lo ee… Cucu maw Second vanram cu a si ne hnga? Credit: Valukcung Ta can

Be the first to comment

Leave a Reply

Your email address will not be published.


*