America ah Laimi Pastor tthabik pahnih:

America ah Laimi Pastor tthabik pahnih:

US um Laimi/Chin Pastor pawl ii, thawngttha an chimmi — voikhat/voihnik cio hrawng cu ka ngeih pah dih cio cang hna. Cun vawleicung thawngttha chimthiam minthang pawl ii, an chimmi zong kan ngeihmi an tam ngai.

America um Laimi Pastor tthabik ah ka chiahmi hna; ka uar bikmi hna; pumpaak in Pathian he kai pehtlaihnak (relationship) ah thuk deuh in kaar aa ka hlaan ter khotu; zumhnak lei ah ka khuaruahning tampi aa ka siamremhtu pahnih an um. (mah kong hi, cu hlan ah ka chim bal rih lomi asi.)

Cu hna cu Rev. Dr. Hre Kio le Rev. Dr. Van Ni hi an si. Zeimaw kai manh caan, online ka zoh caan ah, a thawngtthachim kai ton poah ahcun – hrelh lo in ka ngeihmi cu Dr. Hre Kio khi asi. Cun Dr. Van Ni hi cu, ka Pastor asi ii, Zerhpinii ah a thawngtthachim kum zeimawzat chung ka ngeih cangmi asi.

Pathian lei ah thuuk deuh in karhlaan, Pathian he thuuk deuh in i pehtlaihnak (relation); kan lungput/ khuaruahnak/ chia-ttha thleidannak chungah – Thiangthlarau nih kan nun lam a hruai chin khawhnak dingah — mah hna pahnih tluk in, cawnpiaktu ttha/a thiammi, Laimi chungah ka thei rih hna lo.

Pathian nih a hman taktak hna, tiah ka zumhmi asi; mah hna pahnih ahhin cun, drama/play/pretend phunphai a um lo; biatak kha asi ning bak in an chim ko. Cun khat lei ah, vawlei lei cawnnak saangpi a ngeimi an si fawn; an hmuhtonmi (experience) pin ah, ca tam tuk an rel ti khi, an biachim le thawngtthachim in, ttha tein ngeih tikah theih khawh an si. Mah hna pahnih thawngttha biachim cu, a man (value) a ngei tuk peng; an bia ngeih hi ka chim bal lo.

Pathian kan zumhnak hi, zumtu asimi kanmah pumpaak kan khuaruahnak, kan chia-ttha thleidannak/thinlungput (mindset/ thinking/conscience) he a rak i pehtlai/aa seengtlai (intertwine) dih; ai tthen kho lo. Hi zawn bak ahhin, Thiangthlarua nih kan nunnak ah, bia a kan chimh bik; lam aa kan hruai (guidance) aa kan tuah biknak asi fawn.

A khuaruahnak/ a chia-ttha thlennak/ a lungput ah — Thiangthlarau nih lam a hruai (guidance) a tuahmi le a mawnghmi cu, nifatin an nunnak chungah a lang peng; an innchungkhar ah a lang peng; khoika a um/an kal poah ah a lang peng; an i dang hrimhrim.

(Note: Micheu khat nih Dr. Van Ni cu, na pastor asi le, na cawihlerh (fak) ko lai, tiah nan ka ruah men lai. Cucu aruang asi lo. A thawngtthachim voi tampi ka theih/ttha tein ka ngaih cikcek lengmang mi asi caah ka chim khawhnak hi asi.) Credit: Van N Elizabeth

Ralhrang Ralkap He Riantuanti Lo Ding le An Pawngkam Ah Um Lo Ding In Mizapi Ralrin Peknak Thawngthanhnak (3/2022). Min Aung Hlaing le a ralkap hna nih 2021 February 1 ni thokin kan miphun le ram cu sal ah ser an kan timh. Hriamnam bochan in mizapi an kan namneh caah CDF-Hakha zong nih hriamnam hmang in mizapi kilvennak cu kan tuah ve.

Hakha khua chungah ralhrang pawl nih mizapi an namneh tuk cang caah CDF-Hakha nih hi cathanh chuah ni thok in ralhrang ralkap hna cu kan hmuhnak paohah kahdohnak kan tuah cang lai. Ralhrang ralkap he rian a ṭuan ṭimi zong ralhrang ralkap bantukin ruah nan si lai.

Ralhrang ralkap nih mizapi cu ralphaw ah hmang in himnak an kawl i an uknak fehter an timh fawn. Cucaah ralhrang ralkap umnak pawngkam ah mizapi nan um nakhnga lo thawng kan in thanh hna.

Ralhrang ralkap he rian na ṭuan ṭi ruangah kut na tuar ah siseh, an umnak hmun, zung le sianginn pawl pawngkam ah na um ruangah kahdohnak hma na tuar ah siseh, ralhrang ralkap le nangmah palh a si lai, CDF-Hakha nih tuanvo a la lai lo.

Kan ram le miphun a luat hlan lo nunnak thap in dothlennak tuah ṭi ding in kan in sawm hna. CDF-Hakha Council. Pehtlaihnak – 959453724463.

Hakha CDF ralkap caah US $ 100,000 bak an pek! CBCUSA CDF Supporting Committee sinah an rak pek lawng siloin, tutan Dohthlennak caah Hakha Dawrhlun sang pawl nih Hakha CDF hrimtlai phu caah $1 bak an hlut, tiah thawngpang theih a si. Hakha Dawrhlun sang hruaitu upa hna he Biaruahnak ngeih a si la. Hakha CDF ralkap caah US $ 100,000 bak an pek.

Lawmhnak: USA Cinkhua ($ 5,000.00), Global Cinkhua nih CBCUSA 10 million project caah Hakha peng aiawh in $ 117,500.00 thazaang an kan chuahpiak. Cupin ah CDF-Hakha kan ralkap cawmnak ding caah $5,000.00 renglo thazaang a kan chuahpiak rih. USA Cinkhua cungah CDF-Hakha Support Team of North America nih lawmhnak roca kan tial.

Lawmhnak: Global Sakta ($ 20,000.00), Kan Chin miphun dohthlennak caah a biapimi CBCUSA 10 million project caah Global Sakta khuami nih Hakha peng aiawh in $ 100,000.00 thazaang an chuahpiak lawng siloin kan ralkap cawmnak ding caah $20,000.00 renglo thazaang a kan chuahpiak rih. Global Sakta cungah CDF-Hakha Support Team of North America nih lawmhnak roca kan tial. Hakha-CDF kan ralkap caah sang le khua in siseh, peng le tlang in siseh, thazaang chuah ve cio hna u si.

Lawmhnak: Global Tinam ($ 10,000.00), Kan ram dohthlennak ah pumpak le chungkhar pin ah sang le khua, peng le tlang tiang in cawlcangh cio a si. Cu miphun rian ahcun Global Tinam zong nih Hakha peng aiawh in $ 10 million project caah $ 150,000.00 thazaang an chuah pinah kan ralkap cawmnak ding caah $ 10,000.00 thazaang a kan chuahpiak rih.

Global Tinam cungah CDF-Hakha Support Team of North America nih lawmhnak roca kan tial. Kan Chinram khualipi vengtu CDF-Hakha nusal pasal tha hna caah a lamkip in thazaang chuah cio khawh i zuam hram u si. Zohchunhawktlak Tinam khuami hna cungah kan I lawmtuk e. Tinam khua/ram leng um Bawipa nih Thluachuah in pe chin hna seh! Kan rak I lawm cio. Nan chaw va nan lung thin ram dawt nan ngeih mi nih tei nak luat nak kan hmuh piak lai.

Lunglawmhnak: Pu Tawk Lian Thang le annu Mercy (Florida)nih CDF-Hakha kan ralkap hna meithal cawknak caah meithal zuun khat man $ 2,000.00 thazaang na kan chuahpimi cu lunglawm tein kan hmuh. Kan i lawm tuk hringhran. Bawipa tu nih a biakam bantuk in thluachuahnak in pe chin ko hna seh tiah thlaza kan in campiak hna.

Lunglawmhnak: Pu Shiang Kung le chungkhar (Maryland) nih CDF-Hakha kan ralkap hna meithal cawknak caah meithal zuun khat man $ 2,000.00 thazaang na kan chuahpimi cu lunglawm tein kan hmuh. Kan i lawm tuk hringhran. Bawipa tu nih damnak in pe hna sehlaw nan khuasaknak ah thluachuahnak in pe chin ko hna seh tiah thlaza kan in campiak hna.

CDM a tuah mi siangcachim saya/mah minung 223 ralhrang sin ah kir than! Ralhrang uknak kan duh lo tiah CDM a tuah mi Chin Ramkulh chung siang ca chim saya/ma hna lak ah minung 223 cu ralhrang nih honmi sianginn ca chimh rian tuan ding in an kir than tiah theih a si. CDM in a kir than mi saya/ma minung 223 hi 2022 June 7 tiang a kir mi an si i ralhrang nih June 14 tiang a duh mi rak kir khawh than a si tiah a ni caan a sauh.

Chin Ramkulh fimcawnnak zung lutlai pakhat nih, “A hram thok ahcun June 7 tiang lawng kir thannak nawl pek a si. Asinain, cung lei nih June 14 tiang a nicaan an sauh. June 7 tiang ah 223 an si i minung pazat dah an i chap than lai ti cu theih a si rih lo,” tiah a chim.

June thla thok in Chin Ramkulh Peng cheukhat ah sianginn an hon i sianginn a kai mi zong an um cang. Cun, kum 5 in kum 12 kar zong COVID 19 raikham sii an chunh hna tiah kan theih.

CDM Ralhrang Sin An Kirnak Hi NUG Ruangah A Si. CDM a tuah ciami ralhrang sinah an kir than hi NUG ruang bak a si. NUG santlaih lo a si ko.

Ralhrang nih uknak an lak kaa ah khan NUG nih cozah riantuan vialte CDM tuah dih uh an ti hna. Nan lak khah cu kanmah nih kan in pek hna lai an ti hna. Kan in bawmh hna lai an ti hna. CDM an tuah thuahmah hna. Mah le si khawh tawk cio in CDM cu bawmh an si. Mah le miphun cio zong in CDM cu bawmh an si. Kanmah Chinmi zong kan rak bawmh ve ko hna.

Sinain can a hung sau i a kum hna a van rauh hnu ahcun mah le pengtlau cio cun i bawmh cawk a si ti lo. Kan miphun hriamtlai tu kha bawmh deuh an hau cang. CMD a tuah mi hna hi an har taktak. A hlan ah lahkhah tein a nung mi an si. A tu lahkhah an lak ti lonak a sau tuk cang tikah an harsa taktak. Thilman le a kai tuk fawn. Zingzan ei ding kong hmanh ah lungrethei in um a si cang.

Cu tikah an celh ti lo caah ralhrang sinah an luh than hi a si bik ko. Cozah rian kan tuan ahcun lahkhah tal kan ei lai i kan i ning deuh lai ti kha a si ko. Ralhrang uknak an duh cu a si hrimhrim loh. Hakha ah CDM a tuah cia mi sianginn cachim minung 220 leng ralhrang sinah an kir than. Sianginn an kai than. Chungkhar khuasaknak a har tuk caah a si ko.

NUG nih bia a kamh hna ning bantuk in a tuah kho lo. NUG nih a bawm kho hna lo, an bia lawng a si. NUG nih tha tein bawm kho hna sehlaw CDM a tuah cangmi pawl hi ralhrang sinah an kir than lai lo. Hakha hmanh ah CDM in ralhrang sinah a kirmi an tamtuk va si kaw Kawlram lei chinchin ahcun zeitluk in dah an tam lai ti khi ruah khawh a si ko. Lung a fak ngaingai. Credit: Cung L Ceu

Be the first to comment

Leave a Reply

Your email address will not be published.


*