Hakha Circle Council Cathanh!
========
Hakha Circle Council cu CDF – Hakha Council ṭhithruainak tang ah a um i, zatlang uknak circle pali hna lakah Hakha khuachung circle, zatlang uknak a si. 10 September 2021 ni ah, zatlang uknak rak ser mi cu pehzulh in Hakha Township People’s Conference tuah hnu ah ser a si i nihin caan tiang ah tazacuainak siseh, a dangdang zong tawlrel mi le tawlrel lio mi an um cang. Cucaah Hakha khuachung um mizapi nih a tanglei cachuah ning in nan kan zulh piak nak lai upatnak he kan in thanh hna.
1. Hmun le Vawlei Kong: CDF – Hakha Council nih, “1 February 2021, Min Aung Hlaing le a ralkap nih hramhram in uknak an lak hnu ah hmun le vawlei i cawk/zuarh lo ding,” in cathanh a rak chuah cia bantukin 1 February 2021 hnu ah hmun le vawlei i cawk/zuarh mi pohpoh cu dotla an si lo.
2. Dum/Lo Tuahnak Kong: Hakha khuachung siseh, a kiangkap siseh, dum le lo tuahnak hmun a tam. Dum le Lo a tuah mi nih mah le hmun ah i hak beh le i lak beh lo ding a si lai. Dohthlennak a dih tikah a herhning in zohfelnak tuah le rianṭuan a si ṭhan te lai.
3. Sianginn Kainak Kong: Dohthlen lio caan ah ralhrang uknak tang ah a um mi sianginn kai lo ding in cathanh rak chuah a si bantuk in ralhrang uknak tang a um mi sianginn ah sianginn a kai mi poh cu Hakha Circle Council zong nih a cohlang lo i dohthlennak a dih hnu zong ah pehzulh in hnon a si lai. Mayor, Hakha Circle Council, Hakha, Chinland.
Thawngpang A Linsat Chin Lengmang Caah Kahdohnak A Chuak Kho: CDF Zotung. Chin ramkulh, Matupi peng Zotung ram chungah SAC ralkap he zeitik caan paoh ah kahdohnak a chuak kho, tiah CDF Zotung nih theihternak an tuah. “Atu tiang cu kahdohnak a chuak rih lo nain January thla dih lai hrawng ahcun kahdohnak a chuak khomi dirhmun kan phan cang,” tiah CDF Zotung in chimpuahnnak nawlngeitu John nih a chim.
Zotung peng Cca Cce Khua cu SAC ralkap nih kahdohnak um loin January 26 zanlei ah vanlawng in an rak kah caah tualchung mi cheukhat hliamhma an pu i inn le cacawnnak sianginn hna zong an rawk ngai, tiah theih a si. Cca Cce Khuami 300 hrawng cu an khua pawngkam ah ralhrial in an zam i eidin ti le rawl, hruk-aih hnipuan le a dangdang thilri tampi an herh, tiah theih a si.
Hluttaw Vice Chairman Htun Htun Hein Cu SAC Nih Kum 33 Thong Thlak Dingin Bia An Khiahpiak. NLD Party central chungtel Pyithu Hluttaw Vice Chairman Htun Htun Hein cu 2020 thimnak ah ning cang loin thil na tuah ti ruangah SAC nih case pathum in taza an cuai i, Shan ramkulh Naungcho peng biaceih zung nih thong kum 9 thlak chap dingin bia an khiahpiak ṭhan, tiah theih a si.
Yarzatatkyi section 130(a) in case pathum in taza an cuai i case pakhat ah thong kum 3 thlak ding a si.
A hlan lio zong ah rampi rawiphiarnak section 122 in taza an rak cuai i thong kum 22 thlak ding le 505(a),(b) in thong kum 4 thlak ding a si rih caah a dihlak thong kum 33 thlak dingin bia an khiahpiak, tiah theih a si. Kum 74 a simi Htun Htun Hein cu 2020 thimnak ah Shan ramkulh, Naungcho peng Pyithu Hluttaw Palai in a rak i zuam i teinak a hmumi a si. SAC nih nawlngeihnak la hna hlah sehlaw Pyithu Hluttaw Chairman a si lai tiin an zumh ngaingai mi a si.
Htun Htun Hein cu SAC nih 2021 Febuary 7 ah Naypyitaw a inn ah an rak hren i a chuahsemnak a khua Naungcho peng ah an ṭhial, tiah theih a si.
NLD nih cazin an khawmhsuatmi ning ah SAC nih nawlngeihnak an lak hnu kum 2 deng chungah NLD Hluttaw Palai 3 telh in NLD chungtel 84 thah an tong i 1,280 leng tlaih an tong, tiah an langhter.
Ayartaw Peng Ah SAC Ralkap Le Pyusawhti Sakhan Pakhat PDF Nih An Lak, SAC Ralkap Le Pyusawhti 20 An Thi. Sagaing ramṭhen, Ayartaw peng Taleba khua um SAC ralkap le pyusawhti sakhan cu PDF ṭangṭi phu hna nih kan va kah i kan lak, tiah PDF ṭangṭi phu nih an langhter.
January 27 zinglei sml 9:00 hrawngah Taleba khua um SAC ralkap le pyusawhti sakhan cu, PDF ṭangṭi phu hna nih kan va kah pinah SAC ralkap le pyusawhti 70 leng an umnak phungki sianginn zong 80m, 60 mm in kan kah hna caah SAC ralkap le pyusawhti 20 an thi, tiah PDF ṭangṭi phu nih cun an langhter.
Zaanlei sml 4:50 ah Teleba khua sakhan in pyusawhti pawl cu an zam i PDF nih an va dawi hna. Zaanlei sml 6:15 ah pyusawhti khua zong PDF nih an khanghpiak hna. Zaan sml 8:00 in Taleba lei in SAC ralkap le pyusawhti nih rallam an sial ṭhan i, cu hnuah PDF ṭangṭi phu hna cu khua chungah an lut i an khangh, tiah theih a si.
Leave a Reply