Atulio ahcun US le ASEAN upa dihlak nih Kawlram ah mipi nih

US and Asean Summit
=========
Tu thla chung i Washington DC ah US le Asean ramhruaitu pawl tonbiaruahnak an ngeih mi cu lungtling ngai asi ko tiah ka ruah. Kawlram mipi uknak chut tu Min Aung Hlaing caah cun nung nain khur chung i phuum chih tluk asi. Hi ton biaruahnak ah MAH nih tel aduh tuk caah aphunphun ai zuam nain, nang cu ram uktu na si lo, uknak firtu na si caah rak i tel hlah’ an ti tluk khi asi.

Tutan ah Malaysia le Indonesia nih Kawlram mipi an dirkamh ngai ngai ti alang. Politics, ramkhel rian kong in siloin mipi harnak atongmi hna caah bomhnak – Humanitarian Assistance (လူသားချင်းစာနာထောက်ထားမှုအကူအညီ) peknak kong biatak tein an chuah pi. Cun April 2021 i Min Aung Hlaing zong a va kai ve mi ASEAN Meeting i an Biachahnak 5 kha nihin tiang ah hnu zong pil lo, hmai zong fong loin ceih ning khan nihin tiang adir ko caah ASEAN ram pawl nih Kawlram hi an zumhlonak angan chin chin cang.

Ramchung cozah asi rih lomi NUG tiang hmanh ASEAN upa nih ton an duh cang mi hna hi cu SAC uknak hi phungning lo uknak asi ti an pomnak an langhter khi asi ko cang. April 2021 ah an rak sermi Kawlram nih Asean Roadmap 5 azulh ding mi hna cu; 1. Kawlram chung buainak vialte ngol colh dih ding, 2. Mipi duhning le pomning in political parties vialte he adaihnak in tonbiaruahnak ser ding.

3. Asean chairman țuan liomi nih daihnak lam akalpi ning in sermi lamthluan kha Asean Secretary General nih bomhchanh in țuan chuah pi ding, 4. Asean zungpi umnak Headquarters nih Kawlram mipi bomhnak an pek mi kha Kawlram nih rak cohlan ding, 5. Asean nih anmah Asean ai-awh ah palai (Envoy) Kawlram ah an vun thlah mi nih zalawng tein
Kawlram chung ah political parties ton aduh mi pawl tonnak nawl pek ding.

Five ASEAN Consensus; (1) the immediate cessation of violence in Myanmar, (2) constructive dialogue among all parties concerned to seek a peaceful solution in the interests of the people, (3) mediation to be facilitated by an envoy of Asean’s chair, with the assistance of the secretary-general, (4) humanitarian assistance provided by Asean’s AHA Centre and (5) a visit by the special envoy and delegation to Myanmar to meet all parties concerned.

Atulio ahcun US le ASEAN upa dihlak nih Kawlram ah mipi nih phungning tein sermi cozah (Legal Government -တရားဝင်အစိုးရ ) aum lo ti zong an langhternak asi. Kawlram hi 1962 le 1988 ah ralkap nih uknak alaak lio ahcun chikhat te ah cozah (Government -အစိုးရ) siloin uknak (Administration -အုပ်ချုပ်ရေး ) cu an rak ser khawh colh nain 2021 uknak alaak tu hi cu cozah ser khawh chim lo, nihin tiang ah uknak zong aser kho lo, kum khat aluan cang. Vulei cung ah cozah zong aum lomi, uknak zong aum lomi ram cu atulio ahcun Myanmar ram lawng hi asi.

Atulio i ralkap nih State Administration Council -SAC (နိုင်ငံတော် စီမံခန့်ခွဲရေးကောင်စီ) an ti i Naypyidaw in uknak an vun tlaih mi khi adik deuh ning ahcun Naypyidaw khi tapung sakhan (သောင်းကျန်းသူစခန်း) umnak deuh asi. Zei ca ti ahcun anmah nih hriam ngei lo mipi kha ral an kan tuk, uknak an kan chuh pin ah hung kan pom uh, nan kan pom lo ahcun kan in thah hna lai ti in meithal le hriamnam phuntling he ral akan serh tu an si caah Mirang nih “Home Born Terrorist” an timi ramchung ralhrang (ပြည်တွင်း အကြမ်းဖက်သောင်းကျန်းသူ) timi an si ko.

Mah hi chim sawh/țial sawh siloin International Law (အပြည်ပြည်ဆိုင်ရာတရားဥပဒေ) hrimhrim in an sinak langhter khawh asi. Cucaah Min Aung Hliang uknak hi cu adir kho ding asi lo, amahbelte laikeng (or) kinglang bang a zawng aphunphun in zingzan kar ah ai thleng kho mi an si caah Kawl ralhrang hruaitu pawl hi cu i ralrin tak tak cu kan hau hna.

Ram pakhat uknak țhalo sautuk akal cang mi vun thlen timi hi afawi hrim lo, abik in Kawlram hrim cu kum 60 leng ralkap uknak le nawlngeihnak tang ah kan um cang caah hi uknak hi lenglang ral lawng siloin nitin kan nunnak (Social Life) chung hrim ah thuuk pi in apil chih tuk cangmi ral asi caah caan tampi laak ngai in doh le ahram zawh in pakhat hnu pakhat in phawi ahaumi khi asi. Kan ram ah thlennak aum hrim te ko lai, lung dong loin hmai fong chin ko hna usih. Ka lawm. Victor Khen Sang

Be the first to comment

Leave a Reply

Your email address will not be published.


*