Aung San Suu Kyi nih Min Aung Hlaing chunmang a rak theih ko nain, a poi ngai ee!

Aung San Su Kyi Nih Ralkap Nih Hranhram Uknak Lak Ding Kong A Hlankan In A Rak Theih Cia
=========
Kawlram uknak hranhram laak dingah ralkap nih an rak i timhlamh mi kongkau Aung San Suu Kyi nih a rak theih cia mi a si ko tiah NLD in tuanvo ngeitu pakhat U Naing Ko Ko nih a chimphuan tiah theih a si. “Keimah ka hmuh ning ahcun Aung San Suu Kyi nih ralkap uknak laak ding hi a theih cia ko, ralkap nih hin uknak a laak dingmi kongkau hi 2018 lio tein an chim cang mi a si.

ASSK Asia Economics Forum a kal lio ah mi pakhat nih “ralkap nih uknak a laak than ahcun zeidah na tuah lai” tiah a rak hal bal, cu biahalnak cungah “uknak a latu dingmi tu va hal ko hna” tiah ASSK nih a rak leh bal” tiah U Naing Ko Ko nih RFA sinah a chim tiah theih a si.

Uknak lak ding kong a chim hmasa bik tu hi KBZ Chariman simi U Myan Than a si i 2019 lio ah hitin a rak chim. “Dollar man 1350 a phanh tikah uknak hi an laak te lai, felfai tein tuaktaan tuah uh, zeitindah tuah a herh tiah cun ralkap bawi Soe Thein he i ceih ding a si tiah a rak chim, mah lio ah cun ASS nih uknak an laak ahcun a latu minung nih tuanvo la te ko hna seh tiah a rak leh bal” tiah U Naing Ko Ko nih thil sining a chim.

U Naing Ko Ko cu NLD Kuzale hna an thiamnak thancho ternak kongkau ah ai tel bal mi a si pinah thimnak kongkau zongah biatak tein tuanvo rak khinh mi a si i atu cu a himnak hmun pakhat ah a umnak a sau rih lo tiah theih a si.

Tamu Khua Pawng Kahdohnak Ah PDF Ralkap 2 An Nunnak A Liam. Tamu khua luhnak meng 4 gate pawngah SAC ralkap le PDF karah September 19 ah kahdohnak a chuak i, PDF ralkap 2 an nunnak a liam, tiah theih a si. PDF ralkap a nunnak a liammi hna cu BSO (Burmese Student Organization) in ralkap Ar Kar Htet(18) le Pah Kah Phah in Lin Yung(40) hna an si.

Ralkap Lin Yung ruak cu an la kho rih lo. Ar Kar Htet ruak tu cu Tamu khua mi bawmchantu phu nih an vui cang, tiah theih a si. PDF ralkap pakhat nih, “September 19 ah kahdohnak a chuak i, mui tiang ah ralkap Lin Yung cu a ṭin ti lo.

A thaizing zingka lawngah a thi, tiah thawng kan theih. Namuntar(နမွန်းတား) khua pawng ah SAC ralkap motor cu bomb lung 4 kan puahhnawh caah a thimi le aa hliammi an um,” tiah a chim. SAC nih nawlngeihnak an lak hnu in SAC ralkap le PDF Tamu kahdohnak ah atu tiang PDF Tamu ralkap 11 an nunnak a liam cang, tiah theih a si.

Indaw Peng Nihnih Chung Kahdohnak Ah SAC Ralkap 8 An Thi, PDF Ralkap 1 A Nunnak A Liam. Sagaing ramṭhen, Indaw peng ah SAC ralkap le KIA ၊ PDF ၊ ABSDF karah nihnih chung kahdohnak a chuak i, SAC ralkap 8 an thi, PDF ralkap 1 a nunnak a liam ve, tiah Indaw Revolution IR nih cathanh an chuah.

Sagaing ramṭhen chaklei, Katha pengkomh indaw peng Nanma kyaing(နန်းမကျိုင်း) tiva pawng ah SAC ralkap 70 hrawng le KIA၊ PDF karah September 18-19 tiang kahdohnak a chuak i, SAC ralkap 8 an thi, tam ngai hliamhma an pu, PDF lei in ralkap 1 a nunnak a liam ve, tiah theih a si. SAC ralkap a thimi ruak hna cu puan in an tuam hna hnuah vawlei an chilh hna, tiah theih a si.

Kyauktaga Khua Chung Bomb Puahnak Ah Pyusawhti 2 Le SAC Ralkap 1 An Thi, Meithal Zun 4 Chuh An Tong. Pago ramṭhen, Kyaukaga(ကျောက်တံခါး) khua chungah nizaan September 20 zaanlei ah bomb puahnak a chuak i, Pyusawhti 2 le SAC ralkap 1 an thi, an meithal zun 4 chuh an tong, tiah theih a si.

Nizan September 20 zaan sml 9:55 ah Kyauktaga khua chungah bomb lung 2 a puak i, zaan sml 10:05 ah a voihnihnak a puak ṭhan i, Phungki sianginn hmai transformer zong a rawk dih. Cu hnuah ralven dingin a kalmi motor cu kah a ton caah pyusawhti 2 le SAC ralkap 1 an thi. An meithal zun 4 an lak, tiah kahdohnak a tuahtu he aa pehtlaimi hna sinin theih a si.

Kyaukaga ah cycle remhnak dawr ngeitu pakhat nih, “Bomb puah thawng zong a thang ngai. Cun kaphnih kar kahdonak meithal thawng cu kan theih nain a thimi zat cu fiang in kan theih lo. Nihin zing cu khua chungah SAC ralkap nih checkhlatnak an tuah,” tiah a chim.

Shinzo Abe Ruakthlahnak Tuah Ding Duhlonak Ah Amah le Mah Mei In A Khang! July thla ah thah a rak tongmi Japan Prime Minister hlun Shinzo Abe rampi nih ruak thlahnak tuah dingmi cu ka duh lo tiin nihin september 21 ah Putar pakhat a mah le mah mei in ai khang i duh lonak a langhter tiah, theih a si.

“Tokyo khuapi Prime Minister Office hmai ah a tak mei a kangmi pa pakhat cu kan hmuh, tuanvo ngeitu hna nih mei cu an hmih piak i sizung ah an kal pi, kum 70 hrawng a si lai, tu a dir hmun cu fiang tein theih khawh a si rih lo, ai khanghnak pawng kam ah kut in tialmi duhlo langhternak ca hna kan hmuh tiah,” pawngkam mithmutu pakhat nih a chim.

Atubantuk in duh lo langhternak kongah Japan cozah lei nih cun zei bantuk biahmanh chimmi an ngei rih lo, Shinzo Abe ruak thlahnak tuah dingmi phaisa hman ding kongah ram mipi tam ngai an lungtling lo tiah, theih a si. Prime Minister hlun Shinzo Abe ruak thlahnak cu September 27 ah tuahtimh a si i ruak thlahnak hman dingmi ah US $ Nuaisawm 11.4 renglo hman an timh tiah, theih a si. Credit: The Chin Post

Be the first to comment

Leave a Reply

Your email address will not be published.


*