Bawipa Ṭhatnak Tehtehkhaannak!

Bawipa Ṭhatnak Tehtehkhaannak!
========
Ahmasabik ah Bawipa tuahmi asi caah Amah nih sunparnak co dih ko seh! Bawipa nih (Kawi Lian) Lian Sang le (Thluaiku) Thluai Ku a dawtnak hna le an cungah Thiang Thlarau nih rian a ṭuannak tehtekhaan lai hi a kum in ka hngakmi asi i a tu zong Bawipa nih tehtehkhaannak caanṭha a kan pek caah lawmhnak chim cawk lo ka ngei. Bawipa nih sunparnak co dih ko seh!

Atawinak in, May 2020 kum ah ni 40 le zaan 40 rawlulhnak in caan ka rak hman lio ahhin Bawipa nih vision tampi a ka hmuhtermi lakah pakhat cu “Ramdang kalnak Turkey, Israel le Jordan” hi a ka hmuhter. Asinain zeitindah Bawipa nih rianṭuan lai i, ahodah a hman hna lai i, zeidik kum ahdah ka kal khawh lai tihi ka hngal lo. Asinain nikhat khat ahcun Bawipa biakamhmi cu a tling te lai i ka kal hrim te lai ti ka zumh i lawmhnak ka chim zungzal.

Hlan ah Kawi Lian le Thluaiku he aa thei, aa hngal bal lomi kan si nain “Immanuel Prayer House” thlacamnak tlangah March, 2021 kum ahkhan Kawi Lian he ruah lo piin Bawipa nih a kan tonter. Kan iton i bia kan iruah bakin Thlarau lei in zaangfahnak, siaherhnak le dawtnak ka thinlung ah Bawipa nih a ka pek colh! Cucaah May 2021 kum, zarhkhatnak ah Bawipa khuakhaannak in an umnak khua Columbus, Ohio ah Khrih thawngṭha iruah/ihrawm dingin an sin ah ka va kal. Cu lioah thil pakhat khat ruangah nau an pawi kho lo.

Jesuh Khrih kong bia tampi kan iruah lawng si loin, Bawipa sin ah rosung thluachuah an hmuh nakhnga Bawipa sin ah zaangfah hal/nawl in thacamnak ka ngeih piak hna. Cu thla ka cam lio ahcun Bawipa nih vision a ka hmuhtermi cu “An nuva tein an kut an itlai i, mithmai panh ngai le ilawm ngai khin ka sin lei ah an ra i, an pa nih orhlei kut in fa pakhat aa hruai pah, an nu zong nih kehlei kut in fa pakhat aa hruai ve i an mah pahnih zong an kut an itlai veve i mithmai panhtein le niziam maamtein ka sin leiah an ratmi khi Bawipa nih a ka hmuhter.

Rianṭuan an rak ṭin in ka chim hna i “Bawipa nih naute an pek hna lai” tiah ka ti hna nain an mithmai ka zoh hna i an ilawm ko nain an zum kho tuk lomi khi ka hngalh. Asinain Bawipa pekmi vision cu a tling zungzal tihi ka zumh caah “Ka Pa, fa an duh/herh tukmi na pek hna caah ka lawm” tiah lawmhnak chim in thla ka rak cam. Cu tlawmpal ah August 2021 ah nau kan pawi tiah ruah lo piin thawng an ka thanh tikah Bawipa sin ah lawmhnak in ka khat. Zeicatiah Bawipa pekmi bia cu a tak in a tlin caah asi.

Cuhnu ah October 2021 ahkhan “Turkey, Israel le Jordan” kalnak hi ruah lo piin kan Sianginn nih lam an hun on tikah “Bawipa sin ah zarhkhat rawlulh in ka hal tikah Bawipa nih kan on piakmi lam asi, keimah nih ka khaan lai” ti Bawipa bia ka don tikah ka kut cungah dollars a um lo nain Bawipa bia zumh ngamnak in kal ding min ka pek.

Cu tikah Bawipa nih Kawi Lian le Thluaiku an thinlung ah rianṭuan i Air Tickets a dih hnga ding vialte ṭuanvo kan lak lai an ti. Culawng siloin kal/umnak ah a herhmi pocket money le a herhmi tete cawknak zong zumtu tampi an thinlung ah Bawipa nih rianṭuan i a hman hna i an ka bawmh cio caah ram dang ah ka kal khawhnak hi asi. Keimah phaisa le fimthiamnak le thilti khawhnak pakhat hmanh aa tel lo. Bawipa dawtnak le vel le rianṭuannak thawng lawngte an si.

Midang cu Bible Sianginn an kai ruang, Pastor an si ruang,Evans an si ruangah, chawva an ngeih ruang, kal an duhtuknak ram asi ruangah le an fimthiamnak ruangah Turkey, Israel le Jordan ram zong an kal/phan men ko lai.
Asianin keimah cu zeihmanh keimah sinak lei pakhat hmanh aa tel lo. A hramthok in a dongh tiang Bawipa tuahmi lawngte an si caah Bawipa sunparnak ka langhter lengmang nak le thilfa, thilngan thleidan loin kai lawmhnak a sang khunnak hi asi.

Culawng asi lo, a tu zong a tak in Bawipa nih a pekmi hna fapa rosung a mui te kan hmuh ṭhan tikah Bawipa ṭhatnak, dawtnak le vel hi a lianngan tuk zia hmur le kaa nih chim phuan cawk asi lo. Aa dawh kho tuk fawn! Abikin March ah Turkey ka kal, cun May ah “Isreal le Jordan” ka kal i kaa lim bakin May 22 ah U.S ka phan i, an due date asi lo nain May 23 zaanṭim ah naute an ngei ve. A hramthok in a dongh tiang zoh tikah Bawipa rianṭuanning, ni le caan khiahmi, le Bawipa tuahmi plan hna hi khuaruahhar asi tawn. Kan ruah khawh lo leng tiang khi asi. Bawipa sunparnak caah si ko seh!

Kan Pathian hi a nungmi asi. Zeizong vialte tuah khotu asi. Asi kholomi asi ter khotu asi. Zeizong vialte hi Amah ta lawngte an si dih. Amah sermi lawngte kan si. Cucaah Amah ibochan le i hngatchan in zumhnak in nun, a duhnak kawl, a biatak le dinnak itlaih in a kan dawtnak zahpi loin a min sunparnak caah tehtehkhaan lengmang ahcun kan tlingtlak lo bu le kan chambau ko bu le kan sual/palh ko buin a dawtnak vel hi kan caah a lianngan zungzal. Bawipa vel hi a dong kho lo.

Cucaah Bawipa na zumh ahcun na nunnak ah na tonmi thil zeizong vilate: harsatnak siseh lawmhnak siseh a sunparnak Bawipa nih a langhter zungzal lai (Johan 11:40). Vision, mang le Bawipa aw theih hna hi a tuchan ah a zumlomi pastors, Evans zong an tampi ko lai. Khakha an hman ko. An palh lo.

Asinain cu vialte a zummi hna caah cun an zumh bantukin Bawipa nih a cawnh hna i a tak in a tlinter zungzal. Jesuh Khrih zong mi vilate caah a thi nain a zummi lawng nih zungzal nunnak an hmuh. Cubantukin Pathian bia na zumh ahcun na zumhning bantukin a thluachuah na co ko lai. Na zumh lo bantukin na zumlomi kha na co ve ko lai. Bawipa nih ahohmanh hi hramhram in a kan hnek lo. Duhthimnak a kan pek. Bawipa nih a tuah dih cang. Kanmah nih tuahchap ahau ti lo. Zumh i inunpi lawng hi asi.

Hi vialte hi Bawipa rianṭuannak, dawtnak le vel asi caah Bawipa nih sunparnak co dih sehlaw, keimah siseh, anmah nupa siseh thangṭhat le sunparnak pek ding le co ding kan si lo. Bawipa tu thangṭhatnak le sunparnak pe hna usih! Kan Pathian cu nifatin Thiang Thlarau in rian a ṭuan zungzal. Bawipa hi a ṭha hringhran! Bawipa caah asi kho lomi zeihmanh a um lo (Matt 19:26). Credit: James Vanneilian

Be the first to comment

Leave a Reply

Your email address will not be published.


*