Bible Theihtlei. ..

BAIBAL THEIHTLEI

231. Bawipa A Kawlmi Cu
Sam 34:10 = Chiandeih tumno hmanh hi
ei awk ngei lo in rawltam in an um tawn;
sihmanhseh law Bawipa a kawltu cu thil tha an chambau lai lo.

Kan ram lawng si lo in vawlei cungmi tampi
atu hi kan lau i an lau cio ko. Vawlei ralpi a
tho sual la le eidin kan har tuk la ti hi an phang ngai cio. Hi lio caanah zumtu hi Pathian bia in kan i fawrh a herh ngai tiin
ka ruah caah, Bawipa kawl le a nawl zulh a thatnak kong van tial ka duh. Kai din la ka ti nain tial ah san a tlai ko la ti ka ruah caah
tawiten kan hrawmh ko hna hih.

Baibal kan rel le kan cawn tikah Pathian nih
ami hna ei le din a peek hnanak kan hmuh i
kan theih len ko. Culakah a mak cemmi cu
Israelmi kha ramcar ah kum 40 van in manna a thlak hna. Sa an hawt i an vuivai
tikah mimte sa thla khat chung a dangh hna. Minung 5000 ( nu he nau he cun 20000 in 30000 hrawng an si lai) zong changreu tlang nga le ngafate pahnih in khim ko rawl a dang hna pinah sei 12 a hlei.
Cu Pathian cu kan Pathian asi. A fale kha
pee khotu le pee duhtu a si. Philippines ka um lio ah ka hawipa nih aka chimh bal.
RCM chung in piangtharmi an saya zong nih vawikhat cu Manila khua i pangpar dum
ah an i pumh lio ah thla a cam i changreu le
sa a karhter ve le mi tampi nih an ei aka ti.
Mitampi nih an thei lem lai lo. Ka u Ngen Sui Pa ( Hakha Peng Council Ohkathah a rak tuan balmi Pu Co Zah) nih aka chimhmi
van telh rih ning. A fanu upa Ngen Sui va a rak ngeih lio ah Dawr Thar sang an innah
puai zawhtu an tam tuk i an sa a ek deeng.
Zaanlei asi caah sa cawk ding a um ti lo.
A ei rih lomi 120 hrawng an tang rih. Zeti awk hngalh lo hnu ah kan ihnak khanah ka bok i Pathian sinah thla ka cam ati. Cun a um zat poah pee dih ko hna i ka ti i saa cu an
suah i an peek hna tikah minung 120 an ei
dih pinah chung tuan ei ding tiang a taang rih aka ti. Pu Co Zah bia cu ka zumh bak ko. Pathian tih le kawl le a nawlngaih hi
cu a hlawk hrimhrim ko ti uu.

Mr.He Li cu a tar tuk lawng asi loh, asi fak tuk fawn. Cucaah a naupa, khuahrum biak-
nak i an tlangbawi nih eiding rawl le meh hi
a hung peek lengmang. A peek tik paoh ah
Mr. He Li nih, ” Vancung Ka Pa vel thawng in,” ati zungzal. A vawi a tam tuk tikah a nau pa nih thinhung ngai in, ” Keimah nih kan peek le pei asi ko cu,” ati. Mr.Li nih, ” Na lung chungah peek duhnak an ngeihter
le hme asi cu,” ati. Tlangbawi nih, ” Kan pee ti la loh, zoh te hnik ca,” ati. Ni tlawmpal ape taktak lo. Mr.Li cu a rawl a tam tuk nain Pathian sinah thla a cam peng. Ni khat cu a in tual cungah langak lianpipi an i tuai ur. Saa le changreu
an i zuanpi mi an i cuh hna. Ruah lopin voksa tum le changreu hlum khat an thlaak.
Ava char le voksa cu a hringmi asi caah bel in a chuan. Cu lioah a nau – tlangbawi cu a ra. ” Vancung na Pa nih cun eiding cu an pee ne maw?” ati. Mr.Li nih zoh ko hmanh
ati i voksa bel cu a hmuhsak. Cun langak nih an thlaknak kong a chimh. Kha tikah a
thinlung a tawngh tuk i Pathian kong cu ka chim ve ati. Mr.Li nih a cawnpiak i anih zong a lung ai thleng i an unau tein khrihfa
an si ti hna. Cun tlangbawipa cu Tiluk ram i Boxer pawl nih zumtu an hrem hna lio ah martar in a thimi ah ai tel ( Sunday School Times ah an rak chuahmi asi).

Cucaah zeipoah tong ko hmanh usih, Jehovah Pathian cu i bochan u si law a nawl ngai ko usih. Kan herh taktakmi cu a
bia bang pee lo in a kan um lai lo. A min zongah pei JEHOVAH JIREH asi cu! Gen
22:14. Bawipa min thangthat si ko seh.
Amen and Amen.

Credit. Thioza

 

Be the first to comment

Leave a Reply

Your email address will not be published.


*