Breaking News; Bochok Twan Mrat Naing nih ralhrang pawl ralrin a pek cang hna!

SAC i nitlak lei Military Headquarters Commander cu AA Commander-in-Chief nih ralrinnak a pek
========
Arakhan Army (AA) Commander-in-Chief Major-General Twan Mrat Naing nih mi lung nan buaiter tuk a si ahcun remdaihnak kha zei rel loin SAC i nitlak lei Military Headquaters Commander Major-General Htin Latt U na thutnak tiang kan rak doh lai tiah May 6 ah a twitter cahmai in ralrinnak a pek.

“Ko Htin Latt U a herh lomi kha tuah len hlah! remdaihnak zong tuak loin na thutnak tiang kan rak doh lai” tiah AA Commander-in-Chief nih a twitter ah a tial. Nitlak lei Headquaters a ummnak Rakhine ram chungah AA le SAC ralkap karlak ah raltuknak lei entainnak a chuah bantuk in uknak lei zong an i zuamcawh lio a si.

Cun, SAC ralkap nih a luancia April thla dongh zarh thok in Rakhine ramchung khuate hna ah a lut i zohfelnak a tuah, Ayeyarwady ramthen, Hai tikulh pawng a ummi Rakhine miphun hna kha AA he pehtlaihnak nan ngei tiah a rak tlaih hna.

SAC hruaitu sawmnak kahdaihnak phu pawl nih an i ruah lio a si, FPNCC phu biakhiahnak an ngei rih lo. SAC hruaitu sawmnak a simi remdaih biaruahnak puai cu kan kai lai i zei pawl dah kan i ruah lai tiah Nationwide Ceasefire Agreement (NCA) min a thumi tlangcung hriamtlai phu pawl nih May 6 ah tonnak an ngei.

SAC hruaitu he tonnak cu caanṭha ah kan hman khawh nak hnga Peace Process Steering Team (PPST) dirhmun le phu khat cio dirhmun in tuni ah biaruahnak kan ngei lai tiah Colonel Khun Okka nih a chim. A tu tonnak ahhin, Chin National Front (CNF) cu SAC nih sawm.a si lo caah a kai lai lo i, Karen National Union (KNU) le Restoration Council of Shan State (RCSS) hna zong kai le kai lo a fiang in an chim kho rih lo.

NCA ah min a thu lomi phu pawl an i fonhnak United Wa State Army (UWSA) hruaimi Federal Political Negotiation and Consultative Committee (FPNCC) zong SAC sawmnak ah kai le kai lo biakhiahnak an ngei rih lo tiah theih a si. FPNCC chungtel a simi Ta’ang National Liberation Army (TNLA) nih phu khat cio kan dirhmun cun kai kan i tim lo nain a dang kan hawikom phu pawl sin in biakhiahnak a chuak rih lo tiah TNLA Major Ta Aik Kyaw nih a chim.

FPNCC cu United Wa State Army (UWSA) nih a hruai hna i Kachin Independence Army (KIA), Shan State Progress Party (SSPP), Arakan Army (AA), Ta’ang National Liberation Army (TNLA), Myanmar National Democratic Alliance (MNDAA), National Democratic Alliance (NDAA) hna fonh in dirhmi a si. KIO nih cun SAC sawmnak ah a kai lai lo tiah a thanh cang.

SAC nih sawmnak KIO nih a cohlang lo; SAC hruaitu Min Aung Hlaing nih May 2 ah keimah pumpak in tlangcung hriamtlai phu pawl kan ton hna lai tiah sawmnak a rak tuah. Kachin Independence Organization (KIO) nih sawmnak chungah i teltum a herh vemi pawl nganhtak le ramkhel lei buainak kongah a phichuak kawlnak a umm lo caah sawmnak ah kan kai kho lai lo tiah May 5 ah cathanh a chuah.

Chin National Front (CNF) zong nih SAC sawmnak kongah lungawtawm ding a si lo. Hramhram uknak doh kha kan hmuitinh a si ko caah kan dirhmun a feh hau tiah CNF biachimnak nawl a ngeitu Salai Htet Ni nih a rak chim.

Hakha chuahnak Gangaw lam gate ah tlaih a tongmi thlah than an si cang; Hakha in Gangaw lei ah aa thawhmi mawṭaw pawl cu Gangaw lam gate ah SAC ralkap nih mino nan tamtuk tiah chunitlak an check hna minung 66 an tlaih hna. A cheu cu mawtaw chungah an riahter beh hna tiah thawng theih a si.

Gangaw lam gate ah dirter a simi mawṭaw pawl cu May 6 zinglei ah an lan ṭhan kho cang i tlaih a tongmi vialte an thlah than cang hna tiah thil sinning he aa naihniam mi pakhat nih The Chinland Post ah a chim.

Kawl ralhrang nih Ramthlo, Tlangzar le Dokthek ah an khanghmi 43 cazin; Ralkap nih hramhram uknak lak hnu thok 2021 February 1 in pehzulh in kum khat fai a hun rauh hnu i a thawkmi kahdohnak a chuakmi ruang ah Hakha le Falam karlak ah a ummi Ramthlo, Tlangzar le Dokthek khua thum fonh ahhin, inn 43 tluk hi May 4, May 5 ah siseh, cun a luancia March 2 ah an khangh cang tiah theih a si.

Khua 3 Inn khanghmi Cazin – 43 Inn; Ramthlo (Vantualrawn) inn khanghmi, 2022 May 4; Pa Ni Kam inn; Pa Lal Din Pui inn; Salai T’ial Thang inn; Pa Hemt Al inn(tleicia); Salai Tawk Kam inn; Nu Sung Taang inn; Pa Sui Thawng Lian inn
Pa Than Dai Lo inn (Satawbery dum i inn hnih); Rev. L. Hrang Hnin inn; Pa Biak Lian Thang inn; Tlangzar Inn; khanghmi Cazin, 2022 May 5; Phun Lian; UPC Church Quarters; Har Sung; Emanuel; Lian Hlun (Valte te umnak); San Lian
Rual Sang (Inn thing pi si); Za Nawl Cung, Cung Bik Ceu, Khen Hnok, Thang Hi, Chan Thleng, Za Helh, Lal Hmung, Zung Hnok, Pu Tum Ceu, Van Hlawn Cer.

Nimzua (Dokțhek) inn khanghmi, 2022 March 2; Khua Inn, Pu Biak Cin, Pu Tawk Ceu, Pu Than Tlir, Pu San Bawi, Pu Ceih Bik, Pu Mang Sum (Biakinn Quater), Pi Tawk Men, Pu Khua Er, Pu Sual Ling, Pu Rual Pum Thang, Pu Hrang Lian Sam, Pu Siang Tun, Pu Ngun Dai, Pu Lal Hup Thang, Pu Hrang Pian (inn 16 a kaang), Pu Lal Than Mawi, Pu San Ceu (Hi sungkhar hnih hi meithal ngan (လက်နက်ကြီး) tuarmi an si).

Tutan May zarhkhatnak kahdohnak ahhin hi a cunglei langhtermi khua thum kiangkamh kahdohnak ah Chin miphun ralkap 9 nih an nunnak an pek tiah theih a si. Cun, Kawl Ralkap lei bel minung 18 fai cu nithum chung kahdohnak ah thah an si tiah thilthei mi sin in kan theih.

A cunglei ah langhtermi cazin hi, Salai Thawngpi/Ramthlo nih a pumpak facebook cahmai ah a langhtermi chung in lakchin mi a si. Kawl ralhrang nih Ramthlo, Tlangzar le Dokthek ah an khanghmi 43 cazin. Credit: The Chinland Post

Be the first to comment

Leave a Reply

Your email address will not be published.


*