Breaking News: Commander Lt. Colonel telh in ralhrang tam ngai an thi!

Breaking News: Commander Lt. Colonel telh in ralhrang tam ngai an thi!
==========
Indaw kahdohnak ah council ralhrang lei in Commander Lt. Colonel Htein Lin San le ralkap 20 an thi! Sagaing ramthen, Indaw peng kahdohnak ah ralhrang lei in Commander Lt. Colonel Htein Lin San le ralhraang 20 an thi tiah Indaw Revolution-IR le KIA sin in theih a si.

November 18 zing, chun le zaan caan ah ralhraang 150 tluk le KIA, PDF fonh in Indaw khua Chaklei ah kahdohnak voi thum a chuak i, ralhrang lei in Commander Lt. Colonel Htein Lin San le ralkap 20 an thih pin ah hma a pu mi an tam tiah theih a si. “Commander le ralhrang 20 an thi ti mi thawng cu fehter a si,” tiah KIA nih Khit Thit Media ah a chim.

Ralhraang pawl nih kahdohnak i a thi mi Lt. Colonel Htein Lin San ruak cu helicopter in Myitkyina lei ah an kalpinak kong le, Lt. Colonel Htein Lin San cu Kachin ramkulh, Hopin peng Takwin khuami a si i MAH Security Guard zong cikkhat a tuan bal mi a sinak kong Indaw Revolution-IR nih a chim.

Ministry of Federal Union Affairs – Myanmar – NUG Nih SAC Ralhrang Nih Ramkhel Thongtla Pawl Am Thlahthanhna Hna Kong He Pehtlai In SAC Ralhrang Lehnak Cathanh A Chuah! “kum 2022 Sikpar ni 17 ah SAC ralhrang phu nih phung ning loin tlaih mi ramkhel thongtla cheukhat an thalh than mi hna cu kan hmuh. Cu thil tuah cu Dothlennak kum 1 le thla 9 leng cung ram pumpi ah a um mi tlangcung mipi vialte nih phun zakip in kahdohnak chungah an luhnak ruang, Ramdang hna nih pehzulh donghcat loin phihkhamnak an tuah ni hna ruangah a chuakpi mi mipi nih teinak kan hmuh pakhat a si.

Nungdam tein thlah than mi remkhel thongtla vialte caah NUG lei zong kan i lom tuk. Luatnak a hmu than mi ramkhel thongtla vialte cu phung ning loiin tlaih in thongtlak mi an si hna nak kong, Phung ning loin tlaih in luatnak a hmu than lomi an um rih nak kong, Luatnak hmuh than loin ralhmai ah a nunnak a liam mi pawl, Thonginn chungin thah a tong mi an umnak kong, dohthlennak chungah a nunnak a pee cang mi tampi an um nak kong cu kan i theih peng lai ii NUG lei zong nih hinak fak deuh in kan i zuam lai.” tiah cu cathanh ahcun an langhter.

Cu pinah NUG nih, dohthlennak a tuahcuahmah mi tlangcung mipi vialte, dohthlennak a tuahtu vialte, Lamzawhnak a tuahtu phu vialte le tlangcung mi zapi sin zongah a bikin lunglomnak bia chim a chim pinah Democarcy le mipi nawlnegihnak cu upat in SAC ralhrang cu cohlang le pom loin Myanmar mipi he hmunkhat teah an kan dirhkamhtu ramdang sin zongah a bikin kan i lom tuk, ti zong lomhnak bia a chim.

Cun, Atu kan hmuh mi dohthelnnak a phichuak cu hrambunh in Myanmar ram ah a takin a fek mi thlennak pakhat a chuah khawh nakhnga dingah dohthlennak cu donghcatter loin pehzulh in kahdohnak chungah luh cio dingin nawlnak a tuah pinah NUG lei zong nih Myanmar ram chungah SAC ralhrang uknak cu a hram in chah dihin Tlangcung mipi hna nih an duhherh mi Federal Democarcy Pyidaungsuu goal tung kan phak hlan lo tlangcung mi hoikom hna he tangti in pehzulh in kahdohnak chungah kan lut peng ko lai, ti zongin an langhter chih.

Baa Ann Peng Ah BGF Nih Ngakchia Pakhat Telh In Minung Pali An Kah Hna I An Nunnak A Liam, Karen ramkulh, Baa Ann peng Mihkaren(မိကရင်) khua ah SAC kuttang BGF nih nizan November 17 zaanlei sml 5:00 hrawngah meithal in inn pakhat an kah caah kum 7 ngakchia pakhat telh in minung pali an nunnak a liam, tiah khuami pakhat nih a chim tiah theih a si.

“BGF 20 hrawng cu motor pahnih in an ra i, khua chak ah a ummi inn pakhat cu meithal in an kah caah an chungkhar ning in meithal kuan nih a khen hna. Thawng dik lo an theih caah minung i palhin meithal in an kah mi a si men lai,” tiah a chim chap. BGF nih kahnak in Mihkaren khua ngakchia pakhat, kum 24 tluk pa pakhat, kum 50 tluk nu pakhat le khua chak ah rian a ṭuanmi Kawhpyian(ကော့ဖျံ) khuami kum 30 tluk pa pakhat an nunnak a liam. A nunnak a liammi chungah kum 7 ngakchia le kum 24 tluk pa pakhat hi unau an si i kum 50 tluk nu hi unau hna an pi a si, tiah theih a si.

SAC Ralkap Sii-ai Pechantu Bomb Puahhnawh An Ton Caah Ralkap 20 Hrawng An Thi, Magway ramṭhen, Pakkoku khua in nichuahlei Chaukkan(အရှေ့ချောက်ကန်) khua lei ah sii-ai pek ding in a kalmi SAC ralkap pawl cu, nihin November 18 zinglei sml 3:00 hrawng ah bomb puahhnawh an ton caah SAC ralkap 20 hrawng an thi, tiah theih a si.

SAC ralkap 60 hrawng a phurtu le sii-ai phurtu motor pathum cu Pakkoku khua chuahnak ah bomb in kan puahhnawh hna, tiah Dragon Brothers Guerrilla in bawino Paing Kyi nih a chim. “Nichuahlei Chaukkan khua ah hliamhma pumi SAC ralkap le pyusawhti hna bawmhchanh dingah Pakokku in sii-ai a chantu SAC ralkap motor cu, bomb lung 8 in nihin zinglei sml 3:00 hrawngah kan puahhnawh hna caah SAC ralkap 20 hrawng an thi i 7 hliamhma an pu, an motor lila zong pahnih lawng an lan kho” tiah a chim chap.

Nizaan November 17 zong ah Pakkoku in nichuahlei Chaukkan khua lei ah riahcaw chan dingin a kal mi SAC ralkap motor pahnih zong lam hlat hmehmi bomb in Dragon Brothers Guerrilla phu nih an rak puahhnawh hna caah SAC ralkap 4 an rak thi tiah theih a si.

KNU Hpapon Pengkomh Zarhhnih Chung Kahdohnak Ah SAC Ralkap 30 Leng An Thi, KNU Hpapon pengkomh ah SAC ralkap, BGF le KNLA kar ah zarhhnih chungah voi 60 tluk kahdohnak a chuak i, SAC ralkap 30 leng an thi, tiah theih a si. November 1 in 15 tiang ah SAC ralkap, BGF le KNLA karah kahdohnak voi 58 a chuak i SAC ralkap 35 an thi, 23 hliamhma an pu.

KNLA Brigade 5 in ralkap 3 nih ram le miphun ca ah an nunnak an pek i 3 hliamhma an pu, tiah KNU/ KNLA nih cathanh an chuah tiah theih a si. Cun SAC ralkap le BGF nih tualchung mi an lo hmun le mizapi nih zulhmi lam hna cu, hriamngan in voi 29 tiang timh ciammam te in an kah pinah Hpapon pengkomh chungah a ummi hmun 3 zong ah Jet Fighter in bomb lung 12 hrawng an thlak caah tualchung mi inn le biaknak he aa pehtlaimi inn an rawk.

Tualchung mi a thimi le ai hliammi an um le um lo tu cu fiang in kan thei kho rih lo, tiah cathanh chungah an langhter. Karen zatlang bu hna nih, KNU Hpapon pengkomh Brigade 5 hmunram chungah kahdohnak a zual i, SAC ralkap nih nuhrin covo buar in an cawlcangh caah tualchung mi 130,000 leng a himnak hmun ah an zam i bawmhchanhtu tampi an herh, tiah an langhter.

Gaza Ralhrial Camp Pakhat Mei Nih A Kangh Caah Minung 20 Leng An Nunnak A Liam, Gaza ralhrial camp pakhat mei nih a kangh caah ngakchia telhin minung 20 leng an nunnak a liam tiah theih a si. Gaza ram milu tam ngai an umnak ralhrial camp pakhat ah November 17 ni ah mei kanghnak a chuak i minung 21 nak tlawm lo an nunnak a liam. Cu chungah ngakchia 10 an i tel, tiah sii-inn ṭuanvo ngeitu Dr. Salah Abu Laila nih a chim.

Jabar Laila ralhrial camp a kangmi mei cu caan sau nawn a rauh hnu lawngah ṭuanvo ngeitu hna nih an phalh khawh. Jabar Laila cu Gaza ah a ummi ralhrial camp 8 chungah ai telmi camp pakhat a si, tiah theih a si. Ralhrial camp a kanghnak a ruang hi fiang in hngalh a si lo nain datsi an chiahnak hmun in kangh hram ai thawkmi sidawh a si, tiah tualchung mi hna nih an chim.

Mei kanghnak camp chungah a um mi ngakchia le nu hna cu zeitin hmanh in khamh khawh an si lo, tiah mi bawmchantu pakhat nih a chim. Gaza cu milu nuai 2.3 leng an umnak hmunram a si i, vawleicung huap in milu an tlawm biknak ram a si. UN cazin ning in Gaza milu sing 6 hrawng hi ralhrial camp 8 ah an um, tiah theih a si.

SAC Ralkap Nih Sattwa(ဆပ်သွား) Khua An Khangh Caah Khuami Inn 7 Le Sii-inn 1 A Ciam, Magway ramṭhen, Yesagyo peng Sattwa khua cu SAC ralkap nih an khangh caah khuami inn 7 le sii-inn 1 a ciam, tiah Yesagyo Township Info Committee nih an langhter tiah theih a si.
A luancia November 16 ah SAC ralkap nih Sattwa khua an khangh caah khuami inn 6, zung rianṭuantu an umnak inn 1 le sii-inn 1 a ciamh hi a si.

“Uico ralkap nih Sattwa khua an khangh caah khuami inn 7 le sii-inn 1 a ciam. Khuami a thimi le ai hliammi tucu an um hraw lo, cun sii-ai a kaangmi zong a tam lo. Uico ralkap pawl cu PDF nih an kah hna caah Zitaw khua tiang uico ralkap pawl cu an zam,” tiah Yesagyo Township Info Committee in ṭuanvo ngeitu pakhat nih a chim.

Maungtaw Ah SAC Ralkap Kut In A Nunnak A Liammi Minung 11 Sinah Kyats Sing 5 Cio Pek In SAC Ralkap Nih Ngaihthiam Halnak An Tuah, Rakhine ramkulh, Maungtaw peng, Kyeikchaung(ဂြိတ်ချောင်း) khua ah SAC ralkap hriamngan kuan in a nunnak a liammi minung 11 cu, SAC ralkap nih kyats sing 5 cio le facang he ngaihthiam halnak an tuah hna. Media nih an in hal hna ahcun SAC ralkap nih an kahmi a si lo tiin nan leh hna lai tiah bia an riah ta hna, tiah theih a si.

November 16 ah SAC ralkap kuttang Nah Khah Khah 7 le Maungtaw Kyingchaung(ကြိမ်ချောင်း) 24 Beohar um SAC ralkap nih, hriamngan an kah caah Kyeikchaung khuami 11 an nunnak a liam i, minung 27 hliamhma an pu. A nunnak a liammi hna chungah kum hra tang ngakchia minung pathum an i tel i, kum hra cung minung pakhat ai tel ve, tiah theih a si.

Nizan November 17 zinglei ah Kyingchaung 24 Beohar in Brigadier Pyi Sone Aung le Nah Khah Khah 7 in palik bawi Win Myint Aung telh in SAC ralkap 40 hrawng nih khuami hna cu hi kahdohnak hna hi kanmah kut a si lo, tiah an va chimh hna, tiah theih a si. “Hriamngan a kaptu hi No. 24 Kyingchaung check gate in SAC kuttang ramri hngaktu palik phu Nah Khah Khah 7 an si. Hi kan kahmi hi khoika hmanh ah nan chim lai lo, tiah khuami sinah bia an riah ta hna.

A nunnak a liammi hna cu November 16 zan ah an ruak an vui hna i, hliamhma fak a pumi Min Yet cu Maungtaw sii-inn ah an thlopbul. Midang tu cu an nunnak ca ah thinphang a si lo, tiah theih a si. Kyingchaung khua cu Myo miphun an umnak hmun a si i inn 55 le milu 470 leng an umnak le lo rianṭuan in pawcawmnak a tuah mi an si, tiah theih a si. Crd-The Chin Post