Breaking News: Falam le Hakha karlak ah kahdohnak thawngpang!

Falam-Hakha karlak ah kahdohnak aa thok cang
======
Falam le Hakha karlak ah Chinland Defense Force le SAC ralkap karlak ah July 7 zinglei in kahdohnak aa thok cang tiah theih a si. June 29 in SAC ralkap pawl cu Kalaymyo in Laitlang lei ah mawṭaw 22 he an rak kai.

Cu SAC ralkap mawṭaw pawl cu CDF,CNDF le CNA phufonh nih an kah hna hi a si. SAC ralkap pawl an rat ruangah Kalay-Hakha lamcung khuate in mipi pawl cu June 30 in inn le lo an zaamtak cang tiah theih a si.

Matupi ah ni 2 chung kahdohnak a chuak i SAC ralkap 7 an thi. Chin ramkulh, Matupi peng ah CDF-Matupi phufonh le SAC ralkap karlak ah ni 2 chung kahdohnak a chuak i SAC ralkap lei in a thimi le hliamhhma a tuarmi an um tiah CDF-Matupi nih a thanh.

Matupi peng, Lailenpi in Matupi ah ke in a kalmi SAC ralkap le CDF-Matupi karlak ah ni 2 chung kahdohnak a chuak i SAC ralkap 5 an thi, tampi hliamhma an tuar tiah theih a si.

July 7 zinglei sml 6:00am ah Matupi peng Amihlai khua ah CNA, CDF-Matupi, CDF-Zotung phufonh le SAC ralkap karlak ah kahdohnak a chuak i SAC ralkap 2 an thi i 6 nak tlawm lo nih hliamhma an tuar tiah a langhter.

A cunglei langhtermi kahdohnak chungah phufonh lei in hliamhma a tuarmi an um lo tiah a langhter. SAC ralkap cu June 28 ah Lailenpi khua in an rak kai i kahdoh a chuaknak a pawngkam khuate inn pawl zong an khangh tiah CDF-Matupi nih a thanh.

Bom Accident ruangah CDF-Hakha hriamtlai 2 an nunnak a liam. Chin ramkulh, Hakha khua, July 7 zaan sml 9:30pm hrawngah No. 1 B.E.H.S Hakha pawngah bom puah sualnak a cang i CDF-Hakha in hriamtlai 2 an nunnak a liam tiah theih a si.

Hakha khuami pakhat nih “Atu hi nizaan bom puahnak ruangah sianginn a kaimi hngakchia zong an dinhter hna. Bom pakhat a puak rih lomi a tan caah a puah hngah a hau tiah hngakchia sianginn a kaimi zong an khirh ṭhan hna” tiah The Chinland Post ah a chim.

SAC leiṭang thawngzamh nih cun Hakha khua ah bom puah thawng a thang i SAC nih zohfelnak an ngeih lioah CDF hriamtlai 1 a ruak he hmuh a si tiah an Telegram cahmai ah an langhter. A nunnak a liammi ruak pawngah AK zuunkhat, kuan bawm pakhat le kuan 23 hmuh a si tiah an langhter.

SAC ralkap nih thah ruangah mipi a thimi 2070 hrawng an phan. Myanmar ram ah hramhram in uknak lak a si hnu kum 1 leng caan chungah SAC ralkap nih hramhram in thah ruangah mipi a thimi 2,068 le tlaih a tongmi 14,502 an um tiah Assistance Association for Political Prisoners (AAPP) nih a thanh.

Atu langhtermi cazin hi 2021 February 1 in 2022 July 6 tiang AAPP nih a khawhsuatmi a si i a taktak dirhmun ah a thimi an tam deuh kho tiah a langhter. Pau dothlennak chung, tuni tiangah minung 11,436 tlaih an si i cu chungah 1,214 cu thongthlak dingin nawl chuah an si.

Sualpawtmi chungah kum 18 tang hngakchia 2 telh in minung 74 cu thah ding in nawl chuah an si tiah a langhter.
Hriawhnak in thah ding tiah nawl chuah a simi 41 telh in minung 115 cu thih ding in nawl chuah an si tiah a langhter. Hrenmi vialte chungin minung 3,045 cu thlah an si cang tiah AAPP thawngthanhnak in theih a si.

YDF Shwesomngyo sakhaan pakhat SAC nih an hrawh. Magway le Chin ramri ah a ummi YDF battalion -15 (SSN) Shwesomngyo sakhaan cu SAC ralkap nih June 30 ah an luhhnawh i cycle 11, hriam le sakhaan chung hmanmi thilrii tampi an khangh tiah YDF Battalion-15 nih a thanh.

SSN sakhaan in hriamtlai pawl cu June 29 Htilin peng chungah thazang 100 hrawng SAC ralkap pawl he kahdohnak a chuak. Kahdohnak a chuah lioah Shweaungtha lei in thazang 200 hrawng he a raami SAC ralkap pawl le CDF-Mindat cu Magway ramṭhen Chin ramkulh ramri SSN sakhaan pawngah kahdohnak a fak.

June 29 CDF-Mindat he kahdohnak chungah a sung tukmi SAC ralkap pawl nih June 30 ah SSN sakhaan an khangh. YDF battalion-15 (SSN) hriamtlai chungin hliamhma a tuarmi an um lo tiah theih a si. A zaammi hriamtlai pawl nih hmundang ah i ṭhial a si caah a herhmi thilrii pawl bawmhchanh ding in mipi pawl sin ah bawmhhalnak zong an tuah chih. Credit: The Chinland Post

Be the first to comment

Leave a Reply

Your email address will not be published.


*