Breaking News; Hakha khuapi chung kahdohnak thawngpang update!

Breaking News; Hakha khuapi chung kahdohnak thawngpang update!
==========
Chin ramkulh, Hakha khuapi ah nihin October 26 zing ah SAC ralkap nih hriamngan an kah, tiah theih a si. Tualchung mi pakhat nih, “Nihin zingka in SAC ralkap nih Timit lei kap ah hriamngan an kah. Voi tam nawn a thawng thang cang. Nizan October 25 zong ah voi tam ngai hriamngan thawng a thang cang,” tiah The Chin Post ah a chim.

Nai hrawng cu nikhua a chiat tuk caah meithal thawng le bomb thawng a dai ngaingai. Nihin October 26 zing cu nikhua a ṭha tuk i hriamngan thawng zong a thang. Nikhua a ṭhat ahcun i kahdohnak a chuak lengmang khomi a si caah kan Chin ralkap hna caah thlacampiak ko hna usi, tiah nutung pakhat nih a chim.

Hakha Ah Zarh Khat Tlukhrawng Mei A Mih Caah Khuami Har An Tong. Chin ramkulh, Hakha ah electric mei zarh khat tluk hrawng pehtlai in a mih caah khuami um thutnak le rawlchumhnak ah harnak an tong tiah theih a si.

“Mei a ratlo caah hin harnak kan tonmi hi a tam ngai, rawl chumhnak zong ah tlamtling lo ngai, phone battery tunnak zong ah kan buai ngai, mei a ratlo caah ti zong a har deuh, ti a har ah cun thil suknak le tak kholhnak ah a har ngai” tiah khuachung ummi pakhat nih a chim.

Hakha he aa naihnak khuapawng hrawng zong ah mei an mit tiah theih a si. Hakha khuachung um mi hna cu electric mei an ngahlo caah, rawl chumhnak caah a bikin meihol hi kan hman bik i meihol dip khat ah 15000ks in kan cawk, dip khat cu zarh khat hmanh kan i za lo tiah Hakha khuachung ummi pakhat nih cun a chim. Cun pha-yaung-dan hi bawm khat ah 1500ks in kan cawk tiah a chimchap.

Thantlang Peng Khuate Cheukhat Ah Tlangrai Zawtnak Faak A Tlung. Thantlang peng khuate cheukhat ah kum dang he ikhat loin tlangrai zawtnak faak a tlung tiah theih a si. “Khuate cheukhat ahcun inn kan lo bak in zawt dih a si, kan zawt tikah Covid-19 zawtnak he zong ai lo mi a lo, a rim theih a si lo, tha zong a kan dih ter ngaingai” tiah khuami pakhat nih The Chin Post ah a chim.

SAC ralkap nih hranhram uknak laak hnu in Thantlang peng ah sii le ai a har caah zawtnak ithlopbul nak kongkau ah harsatnak an tong. “Thantlang peng chung khuate kipah sii khaan kan ngei dih lo, kan ngeih mi cheukhat zongah sii le ai a tlin lo tikah tlangrai zawtnak nih a kan phaak tikah harsatnak a tam ngaingai” tiah a chim chap.

Thantlang Peng Ah Thlichia Le Ruah Nih Tlanglo Facang Le Nelrawn Facang A Hrawh Dih Hna. Chin ramkulh, Thantlang peng ah a luancia zarh ruah a surmi le thli ahrang mi nih facang tam tuk a hrawh hna, tiah theih a si.

Thantlang peng mi pakhat nih, “A luancia zarh ah ruah a surmi le thli a hrang mi nih hleh a za cangmi tlanglo facang le nelrawn facang a hrawh dih hna. Thli le ruah nih a choih i a naan hna caah an kiak i an ṭil dih,” tiah The Chin Post ah a chim.

Tukum cu kum dang bantuk a si lo, Rakhine lei in thlichia a hrang mi nih an kan phak ve caah a si kho men. Ruah fak ngai in a sur pinah thli a hrang tuk. Facang hleh a za deng cangmi hna cu an rawk dih ko, tiah a chim chap. Ral le kokek ral he an kan den tikah zapi zaaran laihlum khuate mi kan caah ahcun mangṭam a tlung ti awk a si ko.

Pipu hna nih mangṭam a tlung an rak ti tawnmi hi, atu kan tonmi harnak bantuk a si ko lai, tiah laihlum pakhat nih The Chin Post ah a chim. A luancia zarh ah fak tuk le pehtlai in ruah a sur caah Hakha khua chung, Falam khua chung le Tedim-Kalay kalnak lam zong an chim, tiah theih a si.

Myanmar Ram Buainak Ruang Ah Hartong Sing 14 Tiang An Phan Tiah UNOCHA Nih A Thanh. SAC ralkap nih hramhram uknak a lak hnu ram chung hmunkip ah kahdohnak le buainak a chuah caah mah umnak hmun kaltak in ralhrial dirhmun a phanmi dihlak hi sing 14 tiang an phan tiah UNOCHA nih nihin October 26 ah cathanh an chuah.

Cu chung ah sing hra leng cu SAC ralkap nih hramhram uknak an lak hnu ah ralhrial dirhmun in a phanmi an si i, sing thum leng hi SAC ralkap nih uknak an lak hlan kahdohnak ruang ah a zaam mi an si tiah an thanhmi ah cun anlanghter.
SAC ralkap hna nih hramhram uknak an lak hlan ah ral hrial dirhmun in a phanmi chung ah Rakhine ramkulh hi a tambik an si tiah an langhter chih.

A luancia September thla chung ah UNOCHA nih an thanhmi ca chung ah SAC ralkap hna nih hramhram uknak an lak hnu 2021, February 1 in 2022, August thla dih tiang ah ralzaam dirhmun phanmi hi 974,400 an si tiah an langhter.