Kawkareik Kahdohnak Ah Tualchung Mi 13 Hliamhma An Pu, Phungki Pakhat A Nunnak A Liam
============
Karen ramkulh, Kawkareik peng ah SAC ralkap le KNLA karah December 27 tiang kahdohnak a chuak i tualchung mi 13 hliamhma an pu, tiah theih a si. December 16 in kahdohnak a chuak i khua chung ah SAC ralkap nih hriamngan an kah caah phungki pakhat a nunnak a liam, tiah tualchung mi pakhat nih a chim.
“Khua a pau in kahdohnak cu pehtlai in a chuah caah December 26 ah phungki pa pakhat a nunnak a liam pin ah tualchung mi 5 hliamhma an pu i tuan deuh ah minung 8 hliamhma an rak pu cang,” tiah a chim chap. December 24 lioah tualchung mi 8 hliamhma an rak pu i Ba Ann sii-inn ah an rak kalpi hna, tiah Pale Phyu mi bawmchantu bu nih cathanh an chuah.
SAC ralkap nih hriamngan in an kah caah tualchung mi 13 hliamhma an put pinah phungki pa pakhat a nunnak a liammi cu KNLA nih drone in bomb an thlak ruangah a si tiin SAC nih December 26 ah cathanh an chuah.
SAC nih nawlngeihnak an lak hnu in SAC ralkap le KNLA cu Karen ramkulh, Bago ramṭhen le Tanintharyi ramṭhen ah kahdohnak fak piin a chuak. KNU central cazin ning in kaphnih kar kahdohnak voi 7,000 leng a chuak i tualchung mi 150 leng an nunnak a liam pinah 333 hliamhma an pu cang, tiah an langhter.
PDF Nih Budalin Kahdohnak Ah Ralhrang Thimi Thawngthanh An Tuah! Sagaing ramtthen Budalin (ဘုတလင်) peng ah SAC ralhrang le PDF karlak ah kahdohnak a chuak i ralhrang 20 hrawng an thi tiah tualchung hriamtlai in nawlngei pakhat nih a chim. Hi kahdohnak ah tualchung hriamtlai phu fonh hna cu Monywa Battalion-14 le Local hriamtlai phu fonh hna an si tiah theihchih a si.
“December 26 ah Budalin khuapi in a rakchuakmi ralhrang pawl cu nichuah lei um khuate hna an luhhnawh hna caah tualchung hriamtlaiphu hna nih hriamngan le Bomb in kan kahhna caah kahdohnak a chuak i ralhrang 20 an thi” tiah a chim.
Kani Peng Ni 8 Chung Pehtlai In Kahdohnak Ah Ralhrang Thimi Le PDF Nunnak Liammi Hna! Sagaing ramtthen Kani (ကနီ) peng ah December 19 in 26 nizaan tiang kahdohnak a chuak i SAC ralhrang 40 renglo an thi, tualchung hriamtlaiphu fonh PDF in minung 6 nih ramle miphun caah nunnak an pek tiah (National Revolutionary Guards) in Bo Maw Kuin nih a chim.
“December 19 in SAC ralhrang tilawng 8 in an rakkai caah humhimnak a lakpiaktu hna ralhrang le a rakkaimi hna he ni 8 chung (nihin tiang) kahdohnak pehtlai in a chuak SAC ralhrang thimi kan theihkhawh tawkmi ah 40 renglo an si, tualchung hriamtlaiphu fonh in minung 6 nunnak a liam” tiah Bo Maw Kuin nih Khit Thit Media ah chim.
SAC Ralhrang Hriamngan Kahmi Ruang Ah kum 7 Hngakchia Nunnak A Liam! Bago ramtthen Kyaukkyi (ကျောက်ကြီး) peng ah SAC ralhrang pawl kahmi hriamngan nih a khen ruangah kum 7 hngakchia nute Tun Wati Kyaw (မသွန်း၀တီကျော် ) nunnak a liam tiah theih a si.
“December 26 zaan slm8:00 tluk ah kahdohnak umlo bu in SAC ralhrang nih Kawpin (ကော့ပြင်း) khua ah duhpaoh in an kahmi hriamngan nih inn pakhat a tlak i kum 7 hngakchia nute a khen caah a nunnak a liamcolh” tiah tualchungmi nih Yangon Khit Thit Media ah a chim. Kyaukkyi (ကျောက်ကြီး) pengchung ah hin tualchung hriamtlai fonh KNLA, PDF hna le SAC ralhrang karlak ah kahdohnak a chuak lengmang tiah tualchungmi hna sin in theih a si.
December 27: Myanmar Rampumpi Huap In Ralhrang Thimi Le Tualchung Hriamtlai Nunnak Liam Mi! December 27.2022 nikhat chungah Myanmar rampumpi huap kahdohnak ah taulchung hriamtlai phu hna nih thawngthanhnak an tuah mi cu SAC ralhrang 57 an thi. Tualchung hriamtlai lei in minung 7 nih ram le miphun caah nunnak a pek tiah theih a si.
Tualchung hriamtlai phu hna nih thawngthanhnak an tuah mi cu a tanglei bantuk in Khit Thit Media nih a langhter. (1) Karen ramkulh Kawkareik ah ralhrang 5 an thi i tualchung hriamtlai in minung pakhat nunnak a liam. (2) Mon ramkulh Ye peng ah ralhrang 2 an thi. (3) Mandalay ramtthen Ngazun ah ralhrang 4 an thi.
(4) Magway ramtthen Myaung ah ralhrang 2 an thi. (5) Sagaing ramtthen Kani peng ni 8 chung kahdohnak ah ralhrang 40 an thi i tualchung hriamtlai in minung 6 nunnak a liam. (6) Sagaing ramtthen Butalin kahdohnak ah ralhrang thimi an tamlai tiah zumh a si. (7) Bago ramtthen Shwetaung ah ralhrang 1 a thi. (Karen ramkulh KNU Battalion-5 hmunhma ah ralhrang 3 an thi tiah theih a si.
“Mizoram” Covid-19 BF.7 Zawtnak Hrik thar Kong Lam! December 27 , 2022; vawlei cung hmun dang dang Covid hrik thar BF.7 nih a vun tlak hnawh lio ah mizoram indian chung cu a ning ngai i, Mizoram ah hi virus thar hi lut lo in ni 15 chung bak Covid-19 zawtnak ngei hmuh mi an um ti lo.
Covid-19 zawnak hrik chuakthar mi nih Mizoram luh tik ah i vennak ding in ti ah tuni chun suimilam 12:00 ah khan Health le Family Welfare Deparment Principle Secretary Esther Lalruatkimi he Healt le Family Welfare Department Officers Meeting tuah si; hi meeting-ah hin a harh ning in cawlcang ding in biakhiah si.
1. Vawlei cung hmun dang dang Covid hrik thar BF.7 zawtnak nih vawlei pumpi a culh lio ah indian ram cu phan rih lo a ning rih ngai: Mizoram zong hi virus thar nih hin a phan rih lo i, ni 15 chung bak Covid-19 zawtnak ngei mi an um ti lo ti ah theih si.
2. Meeting ah hin Covid test naak ding hmanrua kan ngeih mi zong a tha rih ti ah an chim. 3. Cozah nih duh ning cun Covid-19 zawtnak hmuh an si ah cun, zei bantuk zawtnak dah si ti theihnak dingah Whole Genome Sequencing (test) ngeihter si lai.
4. India ram International Airport dang dang ah khual tlawng lut minung 100 ah pahnih (2%) lawng nih Covid-19 BF.7 test ah zawtnak an ngeih lo ruangah, ram dang in Mizoram ah rak tlung mi hna cu Covid-19 symptom an in test hrim hrim a hau ti ah theihter naak an tuah. Ref: Zalen News, Lungmili Post
Leave a Reply