Breaking News: KIA le Ralhrang fak ngain in an i phomh i, ralhrang tam ngai an thi!

Hpakanh Ah KIA Le SAC Ralkap Faak Ngai In An i Kap i, SAC Ralkap 25 An Thi!
=======
Hpakanh Ah KIA Le SAC Ralkap Faak Ngai In An i Kap i, SAC Ralkap 25 An Thi!: Kachin ramkulh, Hpakanh(ဖားကန့်) peng Saezin(ဆယ်ဇင်း) ah KIA le SAC ralkap hna cu July 16 zinglei suimilam 7:00 hrawng in July 17 zinglei tiang faak ngai in an i kap i cu kahdohnak ah cun SAC ralkap lei 25 nak tlawm lo an thi lai, tiah tualchung mi nih an chim.

Kaphnih kahdohnak ah SAC ralkap lei a thimi an tam caah nihin July 17 zinglei suimilam 8:00 tiang SAC ralkap nih raltuknak vanlawng hmang in kahdohnak an tuah, tiah theih a si. “Kahdohnak cu nizaan July 16, zinglei suimilam 7:00 hrawng in Saezin(ဆယ်ဇင်း) khua he mengkhat tluk aa hlatnak ah a chuak i SAC ralkap lei a thimi an tam i, nihin July 17, zinglei tiang i kahnak thawng theih a si.

Raltuknak vanlawng hmang in voithum tiang bomb an thlak, raltuknak vanlawng a kir hnu tiang ah kahdohnak a dai rih lo. Nihin zinglei tiang ah SAC ralkap lei 25 hrawng an thi cang,” tiah tualchung mi pakhat nih a chim.

Myinchain-NuaHṭukyi Lamcung Ah SAC Ralkap Motor Pakhat Bomb Puahhnawh A Si I, Ralkap 2 An Thi! Mandalay ramṭhen, Myinchain-NuaHṭuakyi(နွားထိုးကြီး) lampi ah nihin July 17, tuzinglei suimilam 11 hrawng ahkhan NuaHṭukyi lei ah a kalmi, SAC ralkap 10 hrawng nih zulhmi motor hme pakhat cu bomb puahhnawh a ton caah, a chung cuangmi SAC ralkap 2 an thi, tiah NuaHṭukyi PDF nih an thanh.

Moepawze Khua Ah Ngakchia Pakhat Bomb Aa Lamh Sual I A Nunnak A Liam! Moepawze Khua Ah Ngakchia Pakhat Bomb Aa Lamh Sual I A Nunnak A Liam!: Shan ramkulh Muse peng Moepawze(မိုးပေါ်စျေး) khua ah ngakchia pakhat cu July 16 zing Sml 11 hrawng ah, thlamchung ah bomb aa lam sual i a nunnak a liam, tiah tualchung mi sin in theih a si. “A hawile he an um lio ah ni a lin tuk tiin thlamchung ah a lut i, puahkeh thawng kan theihtik ah kan va zoh cu a rak maan dih,” tiah tualchung mi pakhat nih a chim.

A thi mi ngakchia pate hi kum 11 hrawng a si i Tuluk(Chinese) mi sin ah na(saṭil) a khal mi a si. A pi le a nu a cawmkengtu a si, tiah an chim. Tualchung mi hna nih an ruahdamh ning ah cun Bomb cu SAC ralkap nih an hmanh mi a si i, atu bantuk in minung kalnak le umnak hmun ah bomb an hmanh/tarh mi hi tualchung mi caah ṭih nung ngai mi a si, tiah an chim.

Moepawze khua ah tukum chung ah ngakchia nih bomb i lamhsualnak in an thih hi a voikhatnak a si i, atu bantuk in thil a can ti nakhnga lo ngakchia hna cu bomb kong he aa pehtlai mi theihtlei an chimh hna, tiah tualchung mi sin in theih a si. Moepaw hmunram hi SAC ralkap, Pyithusit, KIA, MNDAA le chaklei ṭangrual phu hna an i chawhlehnak hmun a si i, SAC ralkap le KIA, MNDAA hna cu atu le tu an i kap, tiah theih a si.

Tamu Kahdohnak Ah PDF Pakhat le Civil Mi 3 SAC Ralkap Nih An Thah Hna! Tamu Kahdohnak Ah PDF Pakhat le Civil Mi 3 SAC Ralkap Nih An Thah Hna!: Sagaing ramṭhen Tamu ah SAC ralkap le tualchung PDF kahdohnak ah PDF ralkap pakhat a nunnak a liam i, civil mi 3 kahthah an tong, tiah theih a si. Nizan July 16 zing Sml 6 hrawng i kahdohnak a chuahnak hmun cu Tamu khua hrialnak lam Win Phung Naing(ဝင်းဖုန်နိုင်) datsi dawr pawng ah a si, tiah theih a si.

PDF a thi mi pakhat nih cun a meithal le a phone a kaltak i, kahdohnak pawngkam ah a ummi mawṭaw chung i civil mi a cuang mi 3 cu SAC ralkap nih an kahthah ve hna, tiah tualchung PDF nih an thanh.

“PDF cu hmunhma zohfelnak tuah ding in an kal lio ah SAC ralkap nih rak bawh in an kah hna caah kahdohnak a chuak. SAC ralkap nih tualchung mi an thah mi hna ruak cu an khangh hna,” tiah tualchung PDF pakhat nih a chim. PDF lei in bawmtu ralkap an rat caah a thi mi PDF ralkap ruak cu an laak khawh, tiah theih a si.

Kahdohnak ah a nunnak a liam mi PDF ralkap pa cu kum 40 a si i, a nupi le a fale 2 a liamtak hna, tiah theih a si. Kahdohnak ah SAC ralkap lei a thi mi an um le um lo cu fiang in theih a si rih lo. PDF ralkap a thi mi phone cu SAC ralkap nih an laak caah amah he aa pehtlai mi hna cu i ralring ding in tualchung PDF nih an theihter hna.

Yangon Nichuahlei Pengkomh Biaceih Zung I Sihni Pakhat Cu Hriamtlai Phu Pakhat STA Nih An Thah!: Yangon ramṭhen Mingalar Taungnonh(မင်္ဂလာတောင်ညွှန့်) peng nichuahlei pengkomh biaceih zung i sihni(Lawyer) U San Lin(ဦးစန်းလင်း) cu July 15 zaan ah meithal in kahthah a si, tiah Special Task Agency of Burma-STA nih July 16 ah thawng an thanh. U San Lin nih cun mino hna cu ramkhel lei case he pehtlai in taza a cuai hna i, sualphawtnak an ton tawn ruangah kan thahnak hi a si, tiah STA nih an thanh.

U San Lin a thihnak kong he pehtlai in a chungkhar pehtlaih khawh an si lo i, SAC lei zong nih hi kong pehtlai in thawng an thanh mi hmuh a si rih lo. STA nih zahan zaan ahkhan Hlaingtharya(လှိုင်သာယာ) peng biaceih zung cu bomb an puahhnawh, tiah an langhter fawn. Credit: The CHin Post

Be the first to comment

Leave a Reply

Your email address will not be published.


*