Breaking News: Min Aung Hlaing ralhrang phu lungretheih ngaiin an um cang hna!

Breaking News: Min Aung Hlaing ralhrang phu lungretheih ngaiin an um cang hna!
========
Ohkayithta kahdohnak ah SAC nih vanlawng bom thlak a palh ruangah ralkap tampi an thi. Karen ram, Myawaddy peng, Ohkayithta sakhaan kahdohnak ah SAC ralkap nih van lei in bawmhnak a pek hna i bom thlak a palh sual caah SAC ralkap a phuphu in an thi tiah theih a si.

Cu kong he pehtlai in SAC biachimnak nawl a ngeitu Major-General Zaw Min Htun nih Ohkayithta sakhaan cu a sung rih lo. PDF lei in vanlawng hmang in bawmhnak an pek tiah a chim fawn.

Ohkayithta kahdohnak ah SAC ralkap 40 leng an thi. A luancia June 26 in aa thokmi Karen ram, Myawaddy peng, Ohkayithta sakhaan kahdohnak he pehtlai in Khit Thit Media nih KNDO Commando Venom Commander biahalnak a tuahmi a si.

Ohkayithta sakhaan bawmhding in a raami SAC ralkap kah an tong, tampi an thi i Drone telh in hriam tampi chuh an si. Karen ram, Myawaddy peng, Ohkayithta sakhaan kahdohnak bawmh ding in a raami SAC ralkap pawl June 30 zinglei ah Captain L Sewa Oo hruaimi phu nih an kah hna caah SAC ralkap tampi an thi i hriam tampi chuh an si tiah thawng theih a si.

SAC nih Ohkayithta sakhaan an sunghnak hnga lo vawlei in bawmtu tampi a thlah i van zong in fak taktak in kahdohnak a tuah. Atulio ah mipi hriamtlai phu nih an lak deng cangmi Ohkayithta sakhaan cu van lei in fak ngai in a kham chih tiah theih a si.

Myawaddy khua Ohkayithta sakhaan ah kaphnih kar kahdohnak a fak, kaphnih a thi an tam (Muicawl). Myawaddy khua, Ohkayithta sakhaan ah SAC ralkap le KNLA phufonh hna karlak ah zarhkhat deng chung kahdohnak a fak cang i kaphnih kar a thimi le hliamhma a tuarmi an tam tiah RFA nih a langhter.

June thla ni 6 ni in 19 chungah upadi vuang chungah a lut mi PDF phu chungtel minung 205 an si tiah SAC ralhrang in chimnawl ngeitu Zaw Min Htun nih a chim.A tu bantuk in a chimnak hi Tuni July thla ni 1 nak NayPyiDaw ah tuah mi thawngzamh thianhhlimnak ah a chim.

” June thla ni 6-19 tiangah Upadi vuanchung ah a lutin PDF phu chungtel pa 156 le nu 49 an zaa piin minung 205 an si cang” tiah a chim. Upadi vuang chungah a lut mi hna cu Irrawaddy ramthen i 119, Yangon ramthen chungin minung pa 9, Mandalay ramthenin minung 42, Magwe ramthen chungin minung 12, Sagaing ramthen chungin minung 18, Kayin, Shan le Mon in pakhat cio, Bago ramthen in minung 9, Kaya in minung 3 tibantukin an umanak kong zong a chim.

” Lam a pial sual mi mino pawl cu luhthan in auh an si lio ah pehtlaiin rak ngei cio uh, dawtnak he theihter kan duh hna, Aa pehtlai mi pawl zong i fonhtom in i bom cio uh tiah theiter kan duh hna” ti zongin Zaw Min Htun ih a chim. June thla ni 6 in 29 karah hraimnam a chia mi PDF chungtel pa 156, nu 49 azn zaapi 205 hna cu SAC ralhrang nih bomhnak thilri an peek hna hnu ah chungkhar sinah an kuat hna tiah theih a si.

Relchap, Sagaing ramțhen, Boețalyi peng Kodaw palik sakhan cu a voi 4 nak kan kah hna i SAC ralkap 6 an thi tiah Black Dragon Special Task Force phu Nihin July 1 an thanh. Hi Sakhan hi June thlachung ahkhan voi 3 kahdoh an tong cang. June 28 zanlei Sml 3:30 hrawngah Boțalyn peng Kodaw palik sakhan chungah 40 mm lung 6, 40mm lung 4 in kah an si tiah Black Gragon Special Task Force phu nih cathanh chungah an langhter. Cu kahdohnak ah KaNaung People’s Defence Force le Black Dragon Special Task Force phu hna an i bawm.

Mon ramkulh, ThaTone(သထုံ) peng ToneBuLay(ထုံးဘိုလေး) khua pawng ah SAC ralkap le PDF an i kap i, PDF ralkap 2 an nunnak liam, tiah ThaTone pengkomh PDF ṭuanvo ngeitu pakhat nih a chim. June 26 ahkhan SAC ralkap le KNLA ṭangṭi phu kahdohnak a chuak i, PDF ralkap Thi Ha Zaw le Si Thu Aung an nunnak liam hi a si. PDF ralkap pahnih hna cu ThaTone pengkomh KNLA Brigade 1, Battalion 1, PDF No. 1 Battalion ralkap an si, tiah ṭuanvo ngeitu nih a chim.

An nunnak liammi PDF ralkap pahnih hna cu, khuapau dohthlennak ah pasal ṭha an si i, an i pekchanhnak le tuanbia an ṭialmi pehzulh dingin kan i zuam lai, tiah KNU ThanTone Partnership Oversight Committee nih cathanh an chuah. ThaTone peng ToneBuLay khua kahdohnak ah SAC ralkap nih inn 150 leng mei in an khangh i khuami 10 nak tlawm lo an thah hna. Atu lio hi ThanTone peng ah kaphnih kahdohnak a zual tuk caah tualchung mi 3000 leng an zam, tiah theih a si.

Karen ramkulh le Shan ramkulh ramri Hpekhong peng LywiMaKu(လွယ်မကူး) khua le LywiHe(လွယ်ဟယ်) khua ah, umhmun khuarmi SAC ralkap cu nihin zinglei ah Central Division Special Operations Sniper phu le Fighter phu nih Sniper in an kah hna caah SAC ralkap 7 an thi, Central Division Special Operations nih cathanh an chuah.

June 23 zong ah LywiMaKu umhmun khuarmi SAC ralkap pawl cu thiamhlei phu le Sniper phu nih an kah hna caah SAC ralkap 2 an thi. June 29 ah Hpekhong peng LywiMaKu umhmun khuarmi SAC ralkap pawl cu Sniper phu le Fighter phu i bawm in an kah hna caah ralkap 5 an thi, tiah theih a si.

Karen ramkulh, Myawaddy peng, Okerihta sakhan kahdohnak bawmh ding ah a ra mi SAC ralkap hna rallam cu nizan June 30 zinglei ah KNDO BuKyi Alsewa (အယ်စေးဝါး) hruaimi phu hna nih an kah hna i SAC ralkap a thimi an tam, hriamnam tampi an lak khawh tiah theih a si. SAC ralkap nih Okerihta sakhan cu an sunghlo nak ding caah bawmtu tampi a thlah i vanlawng zong voi tampi a hman. Okerihta SAC ralkap sakhan kahdohnak bawmh dingin a ra mi hna cu nizan zing ah BuKyi Alsewa hruaimi phu hna nih lamtan in an kah hna caah hriamngan tel in hriamhme hna le kuan tampi an lak khawh.

KNU Brigade 6 hmunram, LayKeyGaw tlangpar ah June 29 zanlei ah hriamngan in an kah hnuah voihnih kheng te rallam a sialmi SAC ralkap le Cobra phu kahdohnak ah, SAC ralkap 2 an thi i, 7 hliamhma an pu. Cobra phu in ralkap pakhat hriamngan kuan nih a khen caah a nunnak liam, tiah theih a si. June 29 zanlei sml 6:00 hrawng ah SAC ralkap cu 40 mm, 81mm le 120 mm hriamngan an hman i, Cobra phu he zan sml 10:00 tiang hrawng kahdohnak a chuak i hnu ah an kir.

Zan sml 11:00 hrawng ah SAC ralkap cu rallam an sial ṭhan i, an hnu leiin hriamngan in an kah piak hna. June 30 zinglei sml 1:00 hrawng ah Cobra ralkap pakhat cu hriamngan kuan khennak in a nunnak liam, tiah Cobra nih cathanh an chuah. Cobra phu nih hmunhma humhimnak an lak lioah SAC ralkap nih an kal takmi 60mm bomb lung 1, 40mm bomb lung 1, RPG kuan 1 le zen thluan 1 an chuh hna, tiah theih a si.

Shwebo Ah Hriam Keng Lo PDF 9 Thah An Tong!: Sagaing ramṭhen, Shwebo peng Kyonseih(ကွန်ဆိပ်) khua pawng ah GZ Special Task Force (Wetlet) in PDF 9 cu SAC ralkap kut in an nunnak liam, tiah GZ Special Task Force (Wetlet) le an chungkhar hna nih June 30 ah RFA ah an chim. PDF chungtel hna cu June 29 chun ah khan Wetlet peng in, Shwebo peng lei panh in Ayadaw peng ah sii-ai thlopbul lei cawng ding in an kal lio ah SAC ralkap nih an tlaih hna i, an thah hna, tiah GZ Special Task Force (Wetlet) in rianngeitu Bo GZ nih a chim.

“Thah a tong mi hna cu hriamthil an i put lo i, sii-ai thlopbul cawng ding in a kal mi an si. Hlathlainak kan ngeih hnu ah lampi a him ko tiin kan thlah mi hna an si. SAC ralkap nih zeitin an tlaih hna cu kan fiang lo. Nizaan ah tlaih an tong ti tiang lawng thawng kan theih khawh i, an hmanthlak kan hmuh hnu lawng ah kanmah lei an si kan hngalh khawh hna,” tiah a chim.

Thah a tong mi nu hna cu kum 14 a si mi Ma Pah Pah Khine(မပပခိုင်), Ma Win Ei Kyaw(မဝင်းအိကျော်) kum 15, Ma Naing Naing Aung(မနိုင်နိုင်အောင်) kum 24 le Ma Thit Thit Hlaing(မသစ်သစ်လှိုင်) an si. Pa ah cun kum 17 a si mi Ko Pho Thong(ကိုဖိုးထောင်) le Ko Bong Kyaw(ကိုဘုန်းကျော်), Kum 21 a si mi Ko Thein Tan U(ကိုသိန်းသန်းဉီး), kum 27 a si mi Ko Aung Kyaw Moe(ကိုအောင်ကျော်မိုး) le Ko Pho Nyin(ကိုဖိုးငြိမ်း) hna an si.

Mino hna thah an ton cu chim awk ṭha lo in ka lung a fak tuk hringhran, tiah PDF nu a thi mi hringtu nu pakhat nih lungfaak ngai in a chim. SAC lei nih PDF 9 thihnak kong he pehtlai in an thanh mi a um rih lo.

Be the first to comment

Leave a Reply

Your email address will not be published.


*