SAC Ralhrang Nih PDF Chungtel Minung 3 An Tlaih Hna!
==========
February 03 khan Karen ramkulh Kawkareik peng ah SAC ralrang le PDF karlak ah kahdonhnak a chuak tiah theih si. Hi kahdohnak ah SAC ralhrang nih PDF chungtel minung 3 an tlaih hna pinah pakhat a nunnak liam tiah theih si.
Hikong ah SAC ralhrang cozah, Telegram spy network nih ralthuam keng PDF an tlaih mi hna hmanthlak hi an langhter. Hmanthlak ah a langh ning cun PDF chungtel pa 3 an tlaih mi hna hi, fakpi in kut an thlak hna tiah theih khawh si.
Kachin Ramkulh (KIA) Ralkap Kuttang Ah Ummi Ram Cu, SAC Ralhrang Nih Bomb In A Kah! Nizan zingka ah Kachin ramkulh Mohnyin peng Kachin (KIA) ralkap phu 8 umnak hmun cu, SAC ralhrang nih bomb in a kah tiah chindwin nih a langhter.
Sagaing ramṭhen PDF le Kachin ralkap (KIA) hna nih hi ram in SAC ralhrang ṭhawl ding in ṭuantinak an ngeih ruang ah, SAC ralhrang nih Kachin ramkulh um (KIA) ralkap umnak hmun cu bomb in a kah tiah theih si.
SAC Ralhrang Nih Hriamngan In Loikaw Khuapi An Kah Ruang Ah Khrihfa Biakinn Le Mipi Inn 20 Renglo An Rawk! Kayah ramkulh Loikaw khuapi ummi SAC ralhrang pawl nih tinhchih tein hriamngan duhpaoh in an kahmi ruang ah RC Biakinn le tualchung mipi inn 20 renglo an rawk tiah PKPF nih an langhter.
Nohawng February 4 zaan ah Loikaw khuapichung hmunhma pakhat ah SAC ralhrang le tualchung hriamtlai hna karlak ah kahdohnak fakpi a chuak i, SAC ralhrang pawl nih kahdohnak umlonak hmun khuate hna le khuapichung hna cu hramhram in hriamngan he an duhpoh an kah, tiah theih a si.
Nohawng February 3, zaanlei suimilam 3 in zaan suimilam 6:30 tiang SAC ralhrang nih Loikaw khuapichung hmunhma cheukhat hna ah cunglei in bomb an thlak hna caah ralzaam hna umnak inn, sianginn le sii-khan hna zong an rawk dih tiah Khit Thit Media nih a langhter.
Myanmar Ram Pumpi Huap Nikhat Chung Ah SAC Ralkap 54 An Thi. Myanmar ram pumpi huap February ni 4, nikhat chung ah SAC ralkap 54 an thi tiah tualchung hriamtlai phu hna nih cathanh an chuah ning in le an chim ning ah theih a si.
Nifatin SAC ralkap a thimi cazin cu Yangon Khit Thit Media nih khomhsuat in cathanh an langhter. Cu an thanhmi ah cun SAC ralkap a thimi zat langhtermi hi tualchung hriamtlai phu hna nih cathanh an chuahmi le an chimmi cu funtom in cathanh chuah chin a si tiah an langhter.
2023, February ni 4, nikhat chung ah Sagaing ramṭhen in SAC ralkap 42 an thi, Chin ramkulh Matupi ah SAC ralkap 10, Yangon ramṭhen ah 1 le Mandalay ramṭhen ah 1 tiin SAC ralkap 54 an thi. Mon ramkulh Ye peng ah SAC ralkap pakhat tlaih a tong tiah an langhter.
Mingaladon Peng Sang 5 Cu SAC Hmunhma Tiin An Hrawhpiak Hna Caah Umnak Ngei Lo Mipi 300 Leng Mah Umnak Cio Kir Ding In An I zuam. Yangon ramṭhen, Pyinmapin khua komh sang 5 cu SAC nih kan hmunhma si tiin an thawnter hna, an hrawhpiak hna hnu ah umnak ngei lo mipi hna nih an umnak hmun kir khawh ṭhan ding in thlacamnak an ngei tiah theih a si.
2022, November thla ah SAC nih Mingaladon peng sang 5 ah khuasa tualchung mi hna an umnak inn, phungki sianginn, phungki nu sianginn hna cu ṭheng (Bulldozer) in an hrawhpiak hna. Santamadi sang cu SAC nih fak tuk in an rak hrawhpiak hna caah umnak ngei lo tualchung mipi 300 leng cu mah umnak hmun kir khawh ṭhan ding in an i zuam lioah SAC ralkap le palik nih an kham hna tiah theih a si.
“Nihin February ni 5, zinglei in mah umnak cio um khawh ṭhan ding in an hmunhma cu an fuh nain sang chung ah SAC ralkap nih an ṭhawl hna caah lamkam ah dai tein an ṭhu, SAC ralkap nih kapkhatlei in meithal he an hngah hna. Inn hlan chom khuasak ding in an tlamtlin cio lo caah minung 200, 300 hrawng nih an umnak hmun ngah ṭhan ding in an i zuam” tiah tualchung mi pakhat nih a chim.
Hramhram uknak a la tu SAC ralkap nih 2022, November thla chung ah Mingaladon peng, Pyinmapin khua komh Myae Myan Aung sang(မြဲမြံအောင်), Dalapala(ဓလပါ လ), Santamadi(စံသမာဓိ), Gonhnginni(ဂုန်ညှင်းနီ) le Myawady sang tiin sang 5 ah inn 10,000 hrawng an hrawhpiak hna caah minung 50,000 hrawng umnak ngei loin an um.
Wetlet Peng Kahdohnak Ah SAC Ralkap 5 An Thi. Sagaing ramṭhen, Wetlet peng kahdohnak ah SAC ralkap 5 an thi tiah GZ Special Task Force – Wetlet phu in ṭuanvo ngeitu pakhat nih a chim. February ni 3, ah Wetlet peng nitlaklei Makyitone(မန်ကျီးတုံ) khua in Takaungmin(တကောင်းမင်း) khua lei ah rallam sialtu SAC ralkap cu GZ Special Task Force – Wetlet nih hriamngan in an kahdoh hna caah kaphnih kar kahdohnak a chuak tiah theih a si.
“Zinglei suimilam 11:00AM hrawng in kaphnih kar kahdohnak a chuak, SAC ralkap lei 5 an thi. Tualchung hriamtlai phu lei hliamhma tuarnak um loin hnu kan tolh kho ṭhan” tiah GZ Special Task Force – Wetlet in ṭuanvo ngeitu pakhat nih a chim. SAC ralkap hna cu GZ Special Task Force – ṭatkhuai 4, Mine Bilu ṭatkhuai, Yekyat phu le Daung Bayin phufonh hna nih an kahdoh hna tiah theih a si.
Leave a Reply