Breaking News: Naypyidaw ah Russia raltuknak vanlawng a phan cang!

Naypyidaw Ah Russia Ral Tuknak Vanlawng A Phan, Khuapau A Chuah deuh In Vanlei Kahdohnak Fakdeuh Tuah An Timh!
==========
Naypyidaw ah Russia vanlawng a phan, SAC ralkap hna nih khuapau a chuah deuh in cun vanlei kahdohnak a bik in tuah an timh caah van lei kahdohnak an cawng tiah theih a si.

SAC ralkap thawng thanhnak tuahtu hna nih ral tuknak vanlawng hman ningcang hi cu hlan bantuk silo in, strategy tlen in vawlei lei kahdohnak a fah lawng ah van lei kahdohnak bawmh si lo in, van lei kahdohnak tuah hnu ah vawlei lei kahdohnak pehzulh in tuah ding an i tim tiah theih a si.

SAC ralkap hna nih khua a kian deuh in van lei kahdohnak fakdeuh a tuah khawhnak ding caah Magway air force, Naypyidaw air force, Tada Oo air force, Pathein air force, Myitkyina air force ti in vanlei ralkap hna nih ral tuknak vanlawng hmang in ni fatin cawnnak a tuah, Naypyidaw ah SU-30 ral tuknak vanlawng thar in cawnnak an tuah i, Russia vanlawng khaltu hna nih an cawnpiak hna tiah theih a si.

“Naypyidaw ah ral tuknak vanlawng nih ni fatin chun he zaan he a zuan hi zarh khat hrawng a si cang, chun he zaan he ni khat ah voi 5 nak tlawmlo cawnnak an tuah. Cu vanlawng hna cu Su-30 an si, cuhlan kan theihmi MIG-29 nak in a ngan deuh, vanlawng thar an si” tiah Naypyidaw van ralkap a rak tuan balmi pakhat nih feh ternak he a chim.

Nikhat Chung Ah SAC Ralkap 50 An Thi, 26 Nih Hliamhma An Tuar Tiah NUG Nih A Thanh! October 27, nikhat chung a cangmi kahdohnak ah SAC ralkap chungtel 50 hrawng an thi tiah National Unity Government NUG nih cathanh an chuah. Atu ah SAC ralkap a thimi zat langhtermi nak in a leng ah a thimi an tamdeuh kho i, October 27 nikhat chung ah SAC ralkap 26 nih hliamhma an tuar tiah an langhter.

NUG nih mah tein i runvennak ding ca thawngthanhnak a tuah kum khat chungah SAC ralkap chungtel 20,150 leng an thi cang i, 7,000 leng nih hliamhma an tuar tiah an thanhmi ah an langhter. PDF le tualchung hriamtlai phu lei in minung 1,500 luan hrawng an nunnak a liam, SAC ralkap nih rampi huap in a hipkhawhnak hmunhma hi zat ceo hmanh a si tilo tiah NUG caan karlak president Duwa Lashi La nih a chim.

Myanmar ramchung ah a cangmi SAC ralkap le PDF, tualchung hriamtlai, hriamtlai phu dihlak kar a cangmi kahdohnak ah SAC ralkap lei a thimi hna kong he pehtlai in SAC lei nih cathanh chuah in an langhtermi a umlo.

PDF Kalay Ralkap 2 Ralhraang Nih An Thah Hna! PDF-Kalay Battalion 6 in ralkap Lal Biak Tluang le Lal Chan Him hna cu 2022 Tho 10 ah Kalay, Tahan sang ah ralhraang Battalion 228 nih an tlaih hna i an thah hna tiah Zalen nih a tial.

An pahnih in an tlaih hna zaan ah pakhat cu an thah, pakhat cu nikhua hngal lo tiang in an hrem hnuah an thah, thawng kan theih a tlai ngai tiah PDF Kalay Battalion 6 in tuanvo ngeitu nih a chim.

Pale Peng Nithum Chung Kahdohnak Ah SAC Ralkap 30 Nak Tlawm Lo An Thi, PDF Ralkap 4 An Nunnak A Liam Ve. Sagaing ramṭhen, Pale peng ah nithum chung kahdohnak a chuak i, SAC ralkap 30 nak tlawm lo an thi, tiah theih a si. A luancia Octobber 25 in Pale peng Pah Kah Phah an zung bik(Headquarter) cu SAC ralkap Helicopter 5 in an kah caah nizan October 27 tiang kahdohnak a chuak i, SAC ralkap 30 nak tlawm lo an thi. Cu hnuah SAC ralkap pawl cu Monywa Nah Mah Khah ah an kir ṭhan, tiah theih a si.

SAC ralkap an kir hnu in PDF nih hmunhma thianhhlimnak an tuah i Pah Kah Phah zung ah an rak tlaihmi thongtla minung 12 cu SAC ralkap nih an thah hna pinah an ruak cu Teypingye(သဲပြင်ကျယ်) khua inn 6 he an khangh chih dih hna, tiah PDF sinin theih a si.

Kahdohnak hmun hnih ah a chuak i SAC ralkap 30 nak tlawm lo an thi, kanmah lei in PDF ralkap 4 an nunnak a liam ve i, ralkap 2 hliamhma an pu, tiah hriamtlai phu hruaitu nih an chim tiah theih a si.

Vanlawng Kan Kham Khawh Nakding Ah Lam Thar Kan Kawl A Hau- U Ye Mon. SAC nih vanlawng in an kan kahmi hi kan kham khawhnak ding ah lam thar kan kawl a hau i, ral kan tuk ning thlen remh a haumi cu kan thlen a hau, tiah NUG runvennak vuanci U Ye Mon nih a chim. PDF ralkap hna sinah NUG Radio in nizan October 27 ah U Ye Mon nih a cunglei bantukin a chim hi a si.

NUG cozah ṭuanvo ngeitu hna nih Vanlawng i kamnak hriamnam kan ngei cang tiah an ti ko nain October thla chungah SAC nih vanlawng hmang in bomb a thlak lengmang lioah NUG nih vanlawng kahnak hriamnam a hman lomi cungah biahal awk a um, tiah cheukhat nih an ceihphai.

Cu pinah NUG nih van ral i khamnak hriamnam cheukhat kan ngei cang tiah an thanh hnu nikhat ah SAC ralkap nih Sagaing ramṭhen chungah PDF training an tuah lioah vanlawng hmang in an rak kah cang hna. SAC ralkap thazaang a der tuk cang caah vanlawng hmang in kahdohnak an tuah cang. Cucaah biatak tein i ralrin ding in U Ye Mon nih PDF cu ralrin a pek hna, tiah theih a si.

NUG Le BPLA Cu Ral Tuknak Le Ramkhel Kong Ah Hmunkhat Kal Ṭi Dingin Hnatlaknak An Ngei. National Unity Government(NUG) le Bamar People’s Liberation Army(BPLA) cu ral tuknak le ramkhel kong ah hmunkhat ah ṭangṭi in kan kal canglai tiah NUG runvennak lei vuanci zung nih cathanh an chuah.

Cu an cathanh cu October 27, zaanlei ah an thanh i, cu chungah NUG, runvennak lei vuanci, ramkomh vuanci U Yi Mon, U Naing Htoo Aung le BPLA in ṭuanvo ngeitu Maung Saung Khah, sakhan-hmu Yoe Ann Min hna October 26 ah ton biaruahnak an ngeihnak kong an langhter chih.

Ton biaruahnak a dih hnu ah Ministry of Defence (MOD), Tualchung hriamtlai phu (PDF) le Bamar People’s Liberation Army(BPLA) kar ah mah le hmunhma cio ah raltuknak lei ah hmunkhat te ah i funtom ding le ramkhel lei ah kaphnih in i upatnak ngeihding he hmunkhat ah ṭuanṭi dingin lungtlinnak an ngei tiah theih a si.

KNU Brigade 5 Hmunram Ni 5 Chung Kahdohnak Ah SAC Ralkap 8 An Thi! Karen ramkulh, Brigade 5 hmunram ah KNLA le SAC ralkap cu a luancia October 22 in 26 tiang ni 5 chung kahdohnak a chuak i SAC ralkap 8 an thi, 4 hliamhma an pu, tiah theih a si.

October 22 zing sml 2:00 ah KNLA le SAC ralkap kahdohnak a chuak i SAC ralkap 2 an thi. October 23 zing sml 10:45 ah Nukhawde(နိုခေါးဒေး) hmunram ah kahdohnak a chuak ṭhan i, SAC ralkap 1 a thi chap, 1 hliamhma a pu, tiah theih a si.

October 24 ah Kataingdi(ကတိုင်တိ) le Bawgyulay(ဘောကျို့လယ်) khua karah kahdohnak a chuak ṭhan i SAC ralkap 4 an thi, 3 hliamhma an pu. Cun October 25 ah KNLA le SAC ralkap kahdohnak voihnih a chuak ṭhan, tiah KNLA Brigade 5 nih cathanh an chuah.

October 26 ah Salawgyu(ဆာလော်ကျိုး) Brigade 5 um SAC ralkap sakhan cu KNLA Brigade 5 ralkap hna nih an kah ṭhan hna caah SAC ralkap 1 a thi. Dwelu peng Nyaungpin khua cu SAC ralkap nih zanlei sml 1:47 ah hriamngan in voi 11 an kah caah tualchung mi inn pakhat a rawk, tiah theih a si.

KNU Brigade 5 hmunram Mutraw pengkomh ah SAC ralkap le KNLA kahdohnak a zual ngaingai, tiah Mutraw News nih cathanh an chuah.

Myanmar Hrambunh Joom Application Software Deu Hmang In Tangka Kyats Sing Thong Tam Tuk An Hlen Cang Hna! Vawleicung minthang Online Companny pakhat a simi Joom Companny min le Logo hmang in website deu, software deu le application deu hmang in MLM phun in tangka an rawnter hna i, mi an kawl hna caah kyats sing thong tam tuk an hlen cang hna, tiah hlen a tong mi hna nih Khit Thit Media ah an chim.

Myanmar ram chungah Joom Companny le Logo deu hmang in minung 19,000 leng hlen an tong cang hna, tiah theih a si.
“Joom Software in hlen a tongmi an tam tuk cang. Cheukhat cu harsat tuk ruangah do an cawi i a lutmi zong an um. Cheukhat cu rian an hmuh lo caah a lutmi zong an um. Joom Software ah tangka chuah kan duh kan ti len zong ah a ngah rih lo an kan ti lengmang,” tiah hlen a tong vemi pakhat nih a chim.

Joom Software ah chungtel pakhat in luh ahcun $ fang 3 nan co lai i mithar nan hmuh chap khawh hna ahcun nan rian a kai lai, tiin an hlen hna. Chungtel sinak in luh duh ahcun $70 pek a si. Thilri zong order deu in ṭin ahcun ni fatin tangka a lut lai tiah an rak hlen hna i, Kpay in tangka cu chuah a ngah lai an rak ti hna i, nihin tiang minung tam tuk an hlen cang hna, tiah theih a si.

Myanmar hrambunh Joom Software deu cu a luancia September thla lioah ngiathlaitu hna nih ralrin peknak ca an rak ṭialhnawh cang hna. Vawleicung minthang online company Joom cu thil dik thil hman tein thil a zuartu a si.

Joom Software min deu hmang in minung 19,000 leng a hlengtu hna phone number cu a tanglei langhtermi hna hi an si.
09- 670048290 ၊ 09 686547123 ၊ 09 686074205 ၊ 09 674089529 ၊ 09 665758024 ၊ 09 699323483 ၊ 09 670623721 ၊ 09 683063206 ၊ 09 689495943 ၊ 09 691939818 ၊ 09 675892933 ၊ 09 686334027 ၊ 09 691752239 ၊ 09 774691325 ၊ 09 965077891 hna an si. Credit: The Chin Post

Be the first to comment

Leave a Reply

Your email address will not be published.


*