Breaking News; PDF 9 an i surrender timi kongah thawng fiang an chim cang!

PDF 9 an i pe timi kha khua chung mi sawhsawh an si tiah an chim!
========
Nizaan nai te ah SAC ralkap hlennak thawng thlah tu hna nih PDF minung 9 cu an hriamnam he an i pe (surrender) tiah thawng dik lo mi an rak thanh. Cu hna cu tuchun Pur 13 ni ah sualnak nan ngei lo tiin donnak puai an tuah piak hna.

Hi hna hi PDF siloin in khua a hngak mi sawhsawh an si ko tiah anmah a thei tu hna nih an chim. “An 9 lak ah zei maw zat kan theih mi hna an si ko. A taktak tiah cun PDF hrim hrim an si lo. Duhlonak langhter nak ah an i tel. Cun SAC ralkap nih mi an tlaih thluahmah tikah khuadang ah an vai dor.

Asinain SAC ralkap sin ah biakamnak he an rak kir tthan ko. An lak ah pakhat nih hna cu nikum ah khan nupi a tthi mi a si. Cu hna cu tunai ah an tlaih hna i PDF lem an can ter hna hi a si” tiah khuami nih an chim. SAC ralkap nih PDF pawl lungzawr ding in an tuah hna nak a si caah PDF chungtel an lung a zawr timi biahal nak cu PRA – Magway nih hi tin an leh hna.

“Kan hawile phudang chung zong in aho hmanh an i tel lo. SAC ralkap lei a ttanh mi Media cheukhat nih cun an duhning poh in thawng dik lo hi an thanh ve sawh le a si ko. Khua chung ah a um mi hna hi kha hna 9 kha mi zei bantuk dah an si timi an kan theih diam cang. Kha ruang men ah khan mizapi ruahnak ai dang lai le PDF lak zongah ruahnak phir a chuaklai timi kong ah zei hmanh phan ding a um lo” tiah an leh hna.

Hpruso peng ah KNDF nih SAC ralkap an kah hna, a thi mi an tam. Karenni ram Hpruso pengah SAC ralkap hna cu KNDF B-02 nih an va kah hna caah ralhrang lei in a thi mi an tam tiah KNDF nih thawng an thanh. Hpruso peng Dawnye hku khua Biakinn ah hmun a khuar mi SAC ralkap hna cu KNDF le KA fonh nih an va kah hna caah a thi mi an tam tiah an langhter.

“Nizaan Pur 12 zaanlei sang ah khan Hpruso oeng Dawnye Hku le Htee Paw So khua i hmun a khuar mi SAC ralkap hna cu KNDF le KA fonh nih kan va kah hna. SAC ralkap lei a thi mi an tam. Hriamnam zei maw zat kan lak khawh. Kanmah lei aho hmanh thi le hliam kan um lo”tiah KNDF lei nih thawng an thanh.

Tutan ah KA le KNDF fonh nih an kah mi hna hi Pur 11 ni ah khan Hpruso ah Ke bak in ralhmai a ser mi an si hna. A ruahhlan ah SAC ralkap a thi mi zat le hriamnam lak khawh mi pawl kan langhter colh lai an langhter.

Thayet khuapi chung ah GAD zung ah Bomb a puak. Magwe ramtthen Thayet district GAD zung chungah bomb a puak tiah theih a si. Tuchun Pur 13 ni sml 12:00pm hrawng ah bomb a puah hi a si. “GAD zung chung rianttuan tu pawl chuncaw ei ding in an ttum cuahmah lio pi bak bomb a puah hi a si. Zung chung i a puak mi a si caah zei hmanh thawng fiang theih mi a um rih lo” tiah khuami pakhat nih a chim.

Thayet khuapi GAD zung chung i bomb a puah tu hi Thayet-KaMan PDF an si. Hi bantuk in SAC ralhrang nun khuasauhnak he ai pehtlai mi hrimhrim kan doh hna lai nain Mizapi tel nak Sianginn, Sizung, le Dawr tibantuk cu hna kan hnawh lai lo tiah an langhter chap.

Mizapi ralkap fonh nih SAC ralhrang Palik camp an tuk i an lak, Palik thi le tlaih mi um. Karen ram Myawaddy peng Wa Lay khuapi um mi SAC ralkap palik camp pakhat cu KNDO le mipi ralkap fonh nih an tuk i an lak khawh, Palik a thi mi le a nung in tlaih mi an um. Tuzing Pur 13 ni ah KNDO le mizapi ralkap fonh nih Wa Lay palik camp cu an va kah hna i an lak khawh. Palik minung 2 an thi i, a nung in 3 an tlaih hna. Hriamnam zei maw zat, 60mm hriamngan pakhat le hriamhme 3 an chih.

“Myawaddy peng Wa Lay khuapi Palik camp cu tuzing sml 4:29am hrawng ah an kah hna. Camp cu an lak khawh cang. Palik 2 an thi, a nung in 3 an hliam tuar mi an tlaih hna. Hi camp ahhin ralkap an um lo Palik lawng bak an si. SAC ralkap nih an umnak camp i hriamngan in an van kah len. Palik tam u cu an zaam dih. Camp commander le palik pakhat an tlaih hna” tiah khuami pakhat nih Khit Thit Media ah a chim.

Hi camp hi Wa Lay khuapi SAC ralkap camp he ai hlat tuk lem lo nak hmun ah a um mi a si. SAC ralkap nih cun heh tiah hriamngan in an van kah ve hna. KNDO le mizapi ralkap hi camp ahcun sau um lo in hnu an pil colh tiah KNDO he naihniam nih an langhter.

Hi Palik camp laknak ahhin KNDO in special commando ralkap bawi Sa Lone timi nih a hruai hna i mizapi ralkap dang he i fonh in an va kah hna hi a si. ralbawi Sa Lone hi SAC ralkap lei ah a ttang mi DKBA in KNDO sin ah a rak i fonh mi hna kha an si.

KNDO le mizapi ralkap fonh nih Palik camp pakhat an lak. Karen ram Myawaddy peng Wa Lay khuapi um mi SAC ralkap palik camp pakhat cu KNDO le mipi ralkap fonh nih an tuk i an lak khawh. “Tuzing Pur 13 ni ah Wa Lay khuapi um mi Palik camp cu an lak khawh cang i, hriamnam zei maw zat zong an lak chih. Mithi an um rua lo, fiang tein theih a si rih lo” tiah khuami pakhat nih a chim.

Palik camp an kah ahhin a thi mi um le umlo kongah thawngfiang a um rih lo nain Palik hi tlawmpal te lawng an si caah mizapi ralkap fonh nih an rak kah hna bak in an zaam colh hna tiah mi cheu nih an chim.

Hi Palik camp laknak ahhin KNDO in special commando ralkap bawi Sa Lone timi nih a hruai hna i mizapi ralkap dang he i fonh in an va kah hna hi a si. ralbawi Sa Lone hi SAC ralkap lei ah a ttang mi DKBA in KNDO sin ah a rak i fonh mi hna kha an si.

Be the first to comment

Leave a Reply

Your email address will not be published.


*