Breaking News: Pyusawhti le Khuabawi kah thah an si!

Ralhrang nih rank pekmi khuabawi Thein Soe le Pyusawhti 2 kah thah an si!
===========
Mandalay ramthen, Taungta peng chung, Aungta khua khuabawi Thein Soe cu kah thah a sinak kong cu Natogyi Regional Defense Force sinin thawngpang theih a si. November 30, 2022 ni chun lai ah suimilam 12:00 hrawngah khuachung PDF hriamtlai phu nih an luhhnawh hna i, an thah mi hna a si, tiah thawngpang theih a si.

Ralhrang rian pekmi Khuabawi U Thein Soe cu ralhrang caah riantuantu pakhat a si, khuami sinah a nawlngeihnak hmangin ralrin peknak, PDF phu pawl zong zuamcawlhtu pakhat a si. Hi kong he pehtlai in Natogyi Regional Defense le The Value of Young Men taungta phu pawl fonh in kahdohnak tuah an si, tiah theih a si.

Sagaing ramthen, Tase khuapi ah motor cycle a rak cit mi Pyusawhti phu minung 2 cu PDF hriamtlai phu nih an kah hna caah a pahnih ning an thi. Kuan pawl zong PDF pawl nih an laknak kong cu an tarlangh. Hi hna pyusawhti minung 2 hi cycle pakhat veve an i cit i, December 1, 2022 ni ah an kah thah hna hi a si.

Demoso Peng Ralhrang Nih Hmunhma Khuar In An Uknak Hna Cu Mipi Ralkap Nih An Lak Khawh Ṭhan Cang! Karenni(Kayah) ramṭhen Demoso peng Konethar khua chung i hmunkhuar mi ralhrang hna kuttang ah a ummi hmumhma cu KRU nih an lak khawh ṭhan cang tiah nihin Dipa(2) ah thawng thanhnak an tuah. Mipi ralkap a simi KNDF, KA, KGZ le PDF phukomh ralkap hna zong nih Thaysule(သေးဆူလဲ) khua ah hmunkhuar mi ralhrang hna cu an kah hna i cuka hmunhma cu an lak khawh ṭhan tiah theih a si.

Demoso peng Konethar khua hmunhma an thinhhliamh lio ah ralhrang hna i an riahcaw, zenkuan hna le an thilri pawl zong an lak hna tiah theih a si. Kahdohnak a fak chin kho mi a si caah hriamnam le zenkuan bawmh ding in KRU nih bawmh a hal.

Waimaw (ဝိုင်းမော်) Ah Inn A Kang, Chungkhar Minung 7 A Kangh Chih Hna. Kachin ramkulh, Waimaw peng Naungching (နောင်းချိန်) khuakomh, Innkan (အင်ဂန်း) khua ah nizan December 1 ah inn pakhat a kaang i unau 6 le an piter pakhat cu mei nih a kangh chih hna tiah theih a si.

Inn a kaang i an thilri zong a kangh chih dih. Inn tang i meilul( Phayaungdan) an vaan mi in mei aa thok lai tiah kan ruah. Inn tang i an chiahmi datsi pung a puah hnu lawngah kan theih i meiphalh nak caan zong kan ngei manh lo ngakchia kum 2 tel in Unau 6 le an piter kum 70 tluk cu mei nih a kangh chih hna tiah tualchungmi pakhat nih a chim.

An inn a kangh lio ah hin an pa cu lei(neel) ah a um lio a si i, an nu nih meithah dingin ti cawi ah a kal i a ṭih tuk nak ah lungfim lo in a rak tlu tiah a chim chap. Inn kanghnak in a nunnak liam mi hna hi piter kum 70 le an fa le ngakchia bik kum 2 in upa bik kum 11, an dih lak minung 7 an si tiah theih a si. Cu Inn kanghnak ah cun cycle pakhat, lei thuannak seh pakhat, phaisa sing 20 le innchung thilri a dihlak in a ciam dih tiah theih a si.

Rakhine Ram Ah Khua Bawi 80 Leng Nih Rian Chuahnak Ca An Ṭial Ko Nain SAC Nih An Cohlang Lo! Rakhine ramkulh, Panarkyun(ပုဏ္ဏားကျွန်း) peng ah khua bawi rianṭuantu 86 nih a hnu bik November 18 ah rian chuah dih ding in ca kan ṭial ko nain, nihin November 30 tiang ah SAC nih chuahnak nawl an kan pe lo, tiah rianchuahnak ca a ṭialtu sang bawi le khua bawi hna sinin theih a si.

“Atu bantukin rian chuahnak ca ka ṭialmi hi khuami an nunnak kongkau ah bia kai kam ngam lo. Pakhat khat thil ka tuah khawhmi a um lo pinah khua bawi rian ka ṭuan hi man ngei lomi bantuk a si caah chuahnak ca ka ṭial,” tiah min langhter a duh lomi khua bawi pakhat nih a chim.

Peng uktu pa nih rian chuahnak ca nan ṭialmi cu keimah nawl in chuahnak nawl kan pe kho hna lo. Pengkomh le ramkulh uktu hna nih chuahnak nawl an in pek hna hnu lawng ah nan chuak kho an kan timi hi cunglei nih chuahnak nawl an kan pek lo zong ah khua bawi rian hrimhrim kan ṭuan ti lai lo, tiah khua bawi pakhat nih a chim.

A luancia November 10 zanlei ah Panarkyun khua ah hram a bunhmi Khah Mah Yah 550 Battalion kuttang SAC ralkap nih, Sin Ingkyi khua an rak khangh pinah khuami 10 an rak thah hna caah atu bantukin khua bawi pawl hi rian chuah ding in ca an ṭial hi a si, tiah theih a si.

Panarkyun peng ah khuakomh 96 a um i, cu chung in khua bawi 86 nih peng uk sinah rian chuahnak ca an ṭial, theih a si. SAC nih nawlngeihnak an lak hnu in Rakhine rammi le khua bawi 300 leng tlaih an tong cang, tiah AA nih an langhter.

Kokang Ah SAC Ralkap Le MNDAA Kar Kahdohnak A Chuak, 2 An Thih Hleiah 7 Nih Hliamhma An Tuar! Kokang hmunram ah SAC ralkap le MNDAA kar ah kahdohnak a chuak tiah MNDAA nih nihin November 28 ah cathanh an chuah. Kokang Chinshwehaw (ချင်းရွှေဟော်) ah November 28, zinglei suimilam 8:00 ah SAC ralkap, pyituhsit phufonh le MNDAA kar ah kahdohnak a chuak.

Kaphnih kar i kahdohnak ah SAC ralkap lei in minung 2 na thi, 7 nih hliamhma an tuar tiah an cathanh an chuah mi ah cun an langhter. Nihin November 29, zinglei suimilam 9:30 hrawng ah SAC nih kahdohnak an tuahthan nain chunhnu suimilam 1:00 ahcun kahdohnak a dai than tiah MNDAA nih an thanhmi ah cun an langhter chih tiah theih a si.

Wetlet Peng Ah SAC Ralkap Tam Tuk Nih Rallam An Sial Caah Khuate 15 In Khuami 10,000 Leng An Zam. Sagaing ramṭhen, Wetlet peng chung khuate ah SAC ralkap tam tuk nih rallam an sial caah khuate 15 in khuami 10,000 leng cu ralhrial in a himnak hmun ah an zam, tiah theih a si.

Nizan November 28 ah Wetlet peng nitlaklei ah Wetlet khua chungin SAC ralkap motor le Shwe Bo lei in ralkap motor hna nih, ralkap tam tuk an phurh hna i rallam an sial caah khuate 15 in khuami vialte cu an zam dih hi a si.

“Wetlet khua nitlaklei ah uico nih rallam an sial i Hlataw khua in Shwe Bo khua tiang motor lamthluan ah an um dih. Uico nih hmun 6 hrawng in rallam an sial caah Wetlet nitlaklei khuate 10 hrawng cu a himnak hmun ah an zam dih,” tiah tualchung mi pakhat nih a chim tiah theih a si.

SAC Nih AA Chungtel Thongtla 17 Kan Thlah Hna Tiah An Thanh Nain 3 Lawng An I Tel! A luancia November 17, national day lio ah SAC ralkap nih thongtla mi hna chung in AA chungtel 17, KIA 20, RCSS/SSA 5 le KNU/KNLA 2 kan thlah hna tiah November 18 ah cathanh an rak chuah. SAC nih AA chungtel 17 kan thlah hna tiah an thanhmi chung ah AA chungtel 3 lawng an i tel i, a tangmi minung 14 cu tualchung mi an si tiah nihin November 28 ah tuahmi AA thawngfianternak hmun ah AA in chim phuannak nawl ngeitu Khine Thu Khah nih a chim tiah theih a si.

“SAC nih an thlahmi hna chung ah kanmah AA in minung 3 lawng an i tel, a dang cu ULA/AA nan si tiah an rak puhmi tualchung mi an si. Kanmah lei in luatnak a hmutu hna nih cun headquarter ah theihternak an kan tuah, midang tualchung mi tu nih cun kan sin ah pehtlaihnak a kan tuah lo” tiah a chim.

“SAC nih ULA/AA chungtel tiah min bunh in tualchung mi sawhsawh cung ah tlaihkhihnak a tuah, cozah rianṭuantu hna zong an i tel i tlaihkhih a tongmi dihlak chung in minung 85 an thlah hna” tiah a chimchap tiah theih a si. Rakhine ramkulh ah SAC rallap le AA kaphnih kar kahdohnak a daih caah SAC nih tlaihkhihnak a tuahmi tualchung mi hna thlahpiak ding ah khuami le tlaih a tongmi chungkhar hna nih an i ruahchan tiah theih a si.

Taningtharyi Peng Ni 3 Chung Pehtlai In A Cangmi Kahdohnak Ah 6 An Thi. Taningtharyi peng, Laytit khua ah rallam sialtu SAC ralkap le tualchung hriamtlai phu kar kahdohnak ah SAC ralkap 6 an thi tiah theih a si. November 25, 26 le 27 ah Laytit khua ah rallam sialtu SAC ralkap cu tualchung hriamtlai phufonh nih an kahdoh hna caah SAC ralkap lei 6 an thi tiah nihin November 28 ah tualchung hriamtlai phufonh nih cathanh an chuah.

SAC ralkap hna cu Taningtharyi tualchung hriamtlai pah-kah-phah hruainak in battalion 2 tat-khuai 2 PDF, Myait pah-kah-phah phufonh hna nih ni thum chung pehtlai in an kahdoh hna tiah theih a si.

Thanmoe Taung Sakhan Kahdohnak Ah SAC Ralkap 15 An Thi, Tualchung Mi Pakhat A Nunnak A Liam Hleiah Pahnih Hliamhma An Pu! Karen ramkulh, Thantaungkyi(သံတောင်ကြီး) peng Thantaung chaklei Taungngu(တောင်ငူ)- Thantaung motor lampi cung ummi Thanmoe Taung SAC ralkap sakhan ah kahdohnak a chuak.

SAC ralkap 15 an thih caah vanlawng hmang in kahdohnak an tuah i, tualchung mi pakhat a nunnak a liam hleiah pahnih hliamhma an pu, tiah theih a si. November 26 zing sml 6:30 hrawngah Thantaung Division 3 le Taungngu PDF Battalion 3501 Division 3, le 4 nih Thanmoe Taung um SAC ralkap sakhan kan kah, tiah Pago ramṭhen PDF in ṭuanvo ngeitu nih a chim.

“SAC ralkap sakhan hi khua he ai naih ngaingai. An sakhan chungah ralkap 15 hrawng lawng an um. Cuka sakhan a ummi SAC ralkap 15 cu kan thah dih hna. An sakhan kan lak hnik lioah vanlawng hmang in bomb an thlak caah hnu kan kir. Kanmah lei in a thimi le ai hliammi kan um lo, tiah a chim chap.

PDF ṭangṭi phu nih atu bantuk in SAC ralkap sakhan kan kah hi a voikhatnak a si, tiah Pago ramṭhen PDF in ṭuanvo ngeitu nih cun a chim.

SAC ralkap nih Jet Fighter hmang in bomb an thlak caah Thanmoe Taung khua ah a tlawngmi May Lay cu bomb kuan nih a khen caah a nunnak a liam. Pa pahnih zong hliamhma an pu, cun bomb kuan nih inn cheukhat zong a khen hna, tiah theih a si.

Rakhine Ramkukh Kyauktaw Peng Ah Chungkhar Minung 6 Le An Zuatmi Uico Ruah Lo Piin An Nunnak A Liam. Rakhine ramkulh, Kyauktaw(ကျောက်တော်) peng Thet Htin(သက်ထင်) khua ah chungkhar minung 6 le an zuatmi uico hna cu ruah lo piin an nunnak a liam, tiah tualchung mi hna nih an chim.

Rakhine ramkulh, Kyauktaw peng Thet Htin khua ah Myo miphun Thaw Kyia Aung telh in chungkhar minung 6 cu November 26 ah ruah lo piin an zawt caah Way Kyi Daungh (ဝဲကြီးထောင့်) sii-inn ah an kalpi hna nain nihin November 28 zinglei ah an dihlak in an nunnak a liam, tiah theih a si.

An nunnak a liammi hna cu U Thaw Kyia Aung(kum 54) le a nupi Khine Than Nu(kum 54), an fanu u pa bik San Dar Win(kum 25), an fanu a lai Soe Than(kum 23), an fapa Kyaw Ngein Htun(kum 13), le an pi kum 70 an si, tiah theih a si. “A nunnak a liammi Soe Than hi thla 8 ngakchia pa pakhat a ngeimi a si i, a vapa cu Kachin ram Hpakant ah pum pawcawmnak ca ah rian a ṭuanmi a si.

An fapa cu inn pawngkam um mi hna nih an zohpiak,” tiah a chim chap. Zei ruang ah dah an nunnak a liam timi kong tucu siibawi te nih a phi an chuah kho rih lo. An ruak vui ding kong tu ahcun tualchung mi hna nih an tawlrel cuahmah, tiah theih a si.

SAC Nih Tuluk Ser FTC 2000 G Fighter An Cawk I Namsan Khua A Phanhnak Kong Thawngpang A Len Caah Ṭuanvo Ngeitu Checkhlatnak An Tuah Hna. SAC nih Tuluk ser FTC 2000 G Fighter 6 an cawk i Namsan vanlawng headquarters a phanhnak kong cu, Khit Thit Media nih a luancia November 22 ah an rak langhter. Cuti thawngpang a len ruangah vanlawng lei ṭuanvo ngeitu hna cu SAC nih checkhlatnak an tuah hna, tiah theih a si.

“Namsan vanlawng tual ah Fighter 6 a phanhnak kong thawngpang a len ruangah Min Aung Hlaing a umnak zung nih Namsan vanlawng headquarters uktu pa cu an sik, cu caah headquarters uktu pa nih vanlawng lei ṭuanvo ngeitu hna cu checkhlatnak a tuah chin ve hna pinah an phone zong a checkpiak dih hna,” tiah SAC ralkap vanlawng lei rianṭuantu hna sinin theih a si.

SAC nih Tuluk ser FTC 2000 G Fighter 6 an cawkmi cu atu le atu training an tuah i a ra laimi December 15 SAC vanlei ralkap hna nih an tuahmi puai ah hmuksaknak an tuah te lai, tiah theih a si. Mi ram dang he Kai tu la ti ruam in Jet fighter le Miakpi lawng hi a caw le Jet Fighter le Miakpi nih teinak chuahpi lo e chuahpi sehlaw Vietnam ral ah US a mualpho hnga loh US pi hmanh a mual rak pho khah.

Myaungmya Hluttaw Palai U Wai Lin Aung Cu Kum 26 Thongthlak Ding In Biakhiahnak An Tuahpiak. A luancia kum 2021, December thla lio Kayin ramkulh Laykaekaw Myotit ah tlaihkhih a rak tongmi Myaungmya pyituh hluttaw palai U Wai Lin Aung cu Myawaddy pengkomh biaceihzung nih kum 26 thongthlak ding in nihin November 28 ah biakhiahnak an tuahpiak tiah theih a si.

U Wai Lin Aung cu SAC ralkap nih a luancia 2021, December 14 ah Laykaekaw Myotit ah an rak tlaih i, poh-mah 52(a), 50(a), 50(j) le poh-mah 122 tiin tazacuai a tongmi a si. Pyituh Hluttaw palai si mi U Wai Lin Aung cu tlaihkhih a ton kum khat a rauh hnu ah a tu bantuk in kum 26 thong thlak ding in biakhiahnak an tuahpiak hi a si.

U Wai Lin Aung cu hluttaw palai a si hlan ah Myaungmya Ga-yu-na-shin(ကရုဏာရှင်) mi bawmhchanhnak phu dirhtu a si i, 2020 thimnak lio ah NLD palai in pyituh hluttaw palai a tlingmi a si.

Taze Peng Ah SAC Ralkap Nih Tualchung Mi Inn An Khangh Caah Inn 150 Hrawng A Ciam. Sagaing ramṭhen, Taze peng chaklei ah a ummi Htanpin Seih(ထန်းပင်ဆိပ်) khua ah SAC ralkap hna cu nizan November 27 chun ah rallam an sial i voithum tiang inn an khangh, tiah theih a si.

Htanpin Seih khua cu SAC ralkap nih atu le atu an pal tawnnak khua a si i a hlan zong ah voihnih tiang an rak khangh bal cang. Atu a voithumnak an khangh caah a khua ning in a ciam ti tluk a si ko, tiah tualchung mi hna nih an chim.

“A voithumnak an khanghmi ah hin inn tam tuk a ciam. Va phalh kan duh ko nain SAC ralkap le pyusawhti an um caah kan kal ngam lo. Pyusawhti hi tualchung mi lawngte an si i anmah nih SAC ralkap pawl cu lam an hmuhsak hna,” tiah tualchung mi pakhat nih a chim.

SAC ralkap nih Htanpin Seih khua cu a voithumnak an khangh caah inn 150 hrawng a ciam kho, tiah tualchung mi hna sinin theih a si. Ralhrial bawmchantu pakhat nih,” Htanpin Seih khuami hna cu ralhrial in a himnak hmun ah an i dor. An khua ah an kir ngam rih hna lo. Umnak hmun serisiam piak an hau lai,” tiah a chim.

ZinKyaik Khua Ah Uihrut Nih Ngakchia 10 Telh In Minung 11 A Seh Hna. Mon ramkulh, Zinkyaik(ဇင်းကျိုက်) khua Falat sang ah uihrut nih ngakchia 10 telh in minung 11 a seh hna caah hliamhma an pu, tiah theih a si. November 27 zing sml 9:00 hrawngah Falat sang um Kong Htauk(ကုန်ထုတ်) hlei pawng ummi uihrut pakhat nih lam ah ai chawkmi le ngakchia 10 telh in minung 11 a seh hna, tiah tualchung mi hna sinin theih a si.

“Uihrut nih ngakchia nu a hmai ah a seh dih hnuah a zam i inn chungah a ummi zong a va seh hna. Bazar zong ah a va lut i mi a seh hna pinah Khalauk Ing(ခလောက်အင်း) sang a ummi pakhat zong a seh,” tiah tualchung mi pakhat nih a chim.

Uihrut nih ngakchia 10 le upa pakhat a seh hna i an hmai, an ke le an baan ah a seh hna, tiah theih a si. A luancia September 11 lio zong ah Paung peng Pankone khua in Zinkyaik khua lei ah a zammi uihrut pakhat nih, ai chawkmi le inn chungah a ummi minung 20 leng a rak seh bal cang hna, tiah theih a si. Credtit; The Chin Post

Be the first to comment

Leave a Reply

Your email address will not be published.


*