Breaking News: Ralhrang Check Gate cu Mipi ralkap phu nih an doh hna caah ralhrang lei a thi mi!

Breaking News: Pakokku Check Gate PDF Nih An Doh SAC Ralhrang Pathum An Thi!
===========
Maguei ramthen, Pakokku khuapi um SAC check gate pakhat cu tukdoh an si i, ralhrang pathum thi in hriamthil fimtawl a si nak Earthquake People’s Defence Force nih an thanh. Nihin chunhnu Sml 1 hnu ah Pakokku- Myaing khuapi kalnak lampi Chauhkan khua pawng Yawngmasun petrol (dat-si) dawr hmai um SAC check gate cu Earthquake People’s Defence Force nih an tukdohhna hi a si.

Tukdohnak ngeih lio ah gate chung ah hin ralhrang pa(4) an um i, pa(3) hmunril in an thi,pa(1) hliam a si. SAC ta a si mi MA3 zun khat, G3 kuan (500), G3 kuan bawm (2), Motor (1) phaisa MMK -300000 le thil dangdang hna zong fimtawl a si nak theih a si.

Mindat Khua Hrambunh Kha Lah Yah 274 In SAC Ralkap Pakhat A Meithal He CDM A Tuah. Chin ramkulh, Mindat khua ah umhmun a khuarmi Khah Lah Yah 274 in SAC ralkap pakhat cu a meithal he CDM a tuah, tiah CDF-Mindat sinin theih a si.

Nizan December 16 ah Mindat khua ah umhmun a khuarmi Khah Lah Yah 274 in SAC ralkap Myo Thet Paing cu CDF-Mindat sinah a meithal zun khat he CDM a tuah, tiah theih a si. CDM a tuahtu Myo Thet Paing nih Ma1 zun khat, kuanbawm 4, meithal kuan 65 le uniform tuah khat cu CDF-Mindat sinah a pek hna, tiah theih a si.

NUG Nih SAC He Cabuai Cung Biaruah An I Tim Maw? Kan hnulei Dec 1, 2022 ah khan NUG caankarlak President Duwa Lashi La nih Reuter he tonbiaruahnak ah “Kan duhmi thil pa 5 hi an lungtlin ahcun SAC he biaruahnak ngeih khawh a si hnga” tiah a chim. Hi bia nih hin nunnak thap in dohthlennak a tuah cuahmah mi hna thinlung ah lungawṭawmnak a chuahter. A thin a hungmi le a ing a puangmi zong an um len.

Kan hnulei November 8 ah NLD Central Committee nih Myanmar buainak tuahremh dingah cun ramdang palai hna hi Suh Kyi he zalong tein an i ton lawngah a tlamtling lai tiah cathanh an rak chuah bal cang. Cu kongah soiseltu an tam ngai nain khatlei ah a lungtlingmi zong an um len ve. NUG nih Sept 7, 2021 ah i runven kahdohnak (D-Day) a thanh hnuin ramchung hmunkip ah hriamtlaibu an dir i SAC cu an ngeihchun hriamnam hmangin an doh cio. Minung tampi nih nunnak an pek cang i tlaihkhih le hremnak phunphun a tuarmi zong an tampi.

Culioah NUG nih SAC he cabuai cung biaruah ding kong an chim tikah cheukhat an lau, cheukhat an khuaruah a har, cheukhat an thinhung. Hriamtlai mino tam deuh nih cun thisen leiba kongah biaruah ding a um lo (သွေးကြွေးမှာဆွေးနွေးစရာမရှိ) tiah an au ve.

NUG nih SAC hi bia kan ruah lai an tinak cu a si lo. Kan duhmi thil pa 5 an lungtlin ahcun cabuai cung biaruahnak ngeih khawh a si (Reuter nih a ṭialning tein Duwa Lashi La said the door was not closed to negotiation but the military had to stop killing civilians, vow to withdraw from politics and abolish the constitution that enshrines their power. Then, we would probably have dialogue,” he said) an timi khi a si.

NUG nih thil pa 5 an timi cu “SAC ralkap nih mipi an thahnawnmi ngol ding, ralkap cu ramkhel in kan chuak ko lai tiah biahrennak tuah ding, ramdang in minung hawi zawnruah bawmhnak kongah hnahnawhnak pek lo ding, 2008 phunghrampi hrawh ding le biaruahnak ah ramdang nih tlangtlak ding” ti hna hi an si.

Hi hna hi SAC nih an lungtlin ahcun cabuai cung biaruahnak kan ngei kho lai tiah NUG caankarlak President nih Reuter ah a chim. Hi thil pa 5 hna hi SAC nih pom ding cu a har ngaingai. SAC nih biaruahnak ngeih tikah zulh ding tiah an rak thanh cangmi a um ve. Cu chungah SAC hi hrawh lo ding, a aiawh zong ser lo ding, biaruahnak ah 2008 phunghrampi hi cherhchan ah hman ding” ti hna an i tel. Cucaah NUG nih thil pa 5 an timi hi SAC nih an pom lai lo ti a fiang ngai.

ASEAN palai nih NUG sinah an ruahnak a hal hna i NUG nih ralkap cu mipi uknak tangah chiah ding, ralbawizik Min Aung Hlaing zong thongthlak ding tiah an leh. Cu tikah ASEAN palai nih NUG dunak le SAC duhnak cu nichuah le nitlak bantukin an i hlat tiah a chim phahnak a si. SAC nih nawlngeihnak an lak ni Feb 1, 2021 thok in nihin tiangah nunnak a liammi 2,500 leng, tlaihkhih a tongmi 13,000 renglo le thihdan pekmi 139 an si cang tiah AAPP cazin ningin theih a si.

Cun ISP-Myanmar nih a thanh ning ah SAC ralkap nih inn an khanghmi hi 40,000 hrawng a si cang i ral hrial in a zammi nuai khat le sing ruk (1.6 millions) an si cang. Hi vialte nunnak a liammi le inn-lo kan sunghmi hna hi cabuai cung biaruahnak men in cham khawh phun a si lo.

Cucaah NUG nih SAC he biaruah lam a um kho an timi cu a si kho lomi chunmang sawhsawh a si ko. Mipi le dohthlennak ralkap hna zong nih an cohlang lai lo ti a fiang. Cucaah kan ngeihchun hriamnam he Pathian i bochan buin hriamtlaih dohthlennak cu pehzulh a herh rih ko lai. Credit: Salai CP Lian, The Chin Post Weekly Journal

Be the first to comment

Leave a Reply

Your email address will not be published.


*