Breaking News: Ralhrang Ralbawi le a nupi cu an motor chungah an kah thah hna!

SAC ralkap bawi le a nupi an mawtaw chungah an kah thah hna!
=======
Yangon khuapi ah SAC ralhrang bawi le a nupi cu PDF nih mawtaw in len an i timh lio ah an va kah thah hna tiah theih a si. Tuzing Chiapa 18 sml 9 hrawng ah SAC ralhrang bawi Aung Naing Pyo le a nupi cu an mawtaw chungah PDF nih cun an va kah thah hna.

Aung Naing Pyo cu a mawtaw chungah a thi colh, a nupi tu hi a hnu deuh ah a thi ve. “Dalan pei an kah thah rua kan rak ti, asinain SAC ralkap media nih an bawi pa le a nupi an thahnak kong an langhter hnu in kan rak theih ve” tiah tualchung mi pakhat nih a chim.

Yangon khuapi chungah ralhrang kah kan duh hna tikah mizapi sin ah theihternak kan tuah zungzal taw, asinain a zul duh lo tu an um i, cu hna nih cun ralhrang pawl thawng a pek tawn hna caah zei hmanh kan chim cia ti lo. Cucaah Hledan bazaar zong ah dalan 2 Chiapa 4 ah kan rak thianh hna, Chiapa 16 ni zongah ralhrang sanguk bawi Maung Latt kan fimtawl cang fawn.

Tuchun Chiapa 18 ni zongah ralhrang bawi kan thah fawn, hmailei zongah ralhrang lei a ttang mi cu kan fim tawl cuahmah rih ko hna lai tiah PDF nih cun an langhter.

Mobye khuapi chungah kahdohnak chuak. Mobye khuapi chungah PDF le SAC ralkap karlak kahdohnak a chuak tiah theih a si. Tuzing sml 2:00am hrawng in SAC ralkap pawl cawlcanghnak an ngei cang tiah PDF ralkap pakhat nih a chim. Cun sml 500am hrawng ah kahdohnak thawng a thang thluahmah tiah tual chung mi nih an chim.

Khuapi chung kahdohnak ah SAC ralkap nih tong kah in bomb an kah caah innlo a kaang mi an um tiah an chim chap.
Mizapi nih khuapi chung um mi hna nih lengchuah lo tein le i chawklet lo tein um ding in PDF nih ralrinnak an pek hna.

Matupi Ah Bohmu Thah A Ton Hnu Ah Khuapi Tlaimi Minung Pa 2 An Thlah Than Hna. Chinram chak lei, Matupi hrambunh ခလရ(၁၄၀) Bohmu Than Naing Win thah a tonnak kong he pehtlai in SAC ralhrang nih mipi tlaih mi minung pa 6 chungah minung pa 2 an thlah than hna tiah theih a si. Mah thah a tonnak hmun pawngkam hrawng ah SAC ralhrang nih khuami minung pa 6 an rak tlaih hna tiah theih a si.

CDF-Matupi nih Bohmu Than Naing Win cu Matupi khua leng lei ah an auh hnu ah July ni 15 ah an rak thah beh tiah thawng theih a si. Mah an thahnak kong he pehtlai in SAC ralhrang nih pa pa 3 le nu pa 3 an zaa piin pa 6 an tliah hna i mah hna chungah nu pa 1 le pa pa 1 an thlah than hna tiah theih a si.

SAC ralkap mawṭaw 100 leng cu Magway ramṭhen, Pakokku peng in Laitlang lei ah an rak kai tiah CDF-Mindat nih a thanh. Pakokku in SAC ralkap mawṭaw cu a voikhatnak ah mawṭaw 30 leng an rak kai cang i atu ah mawṭaw 100 leng he an rak kai ṭhan tiah a langhter.

Mawṭaw pawl cu ṭha tein an khuh dih caah zeidah an phorh timi a fiang in theih a si lo tiah CDF-Mindat biachimnak nawl a ngeitu Salai Ha Om nih People’s Spring ah a chim. “Mawṭaw hi 100 an luan lai tiah ruahdamh a si. Pungṭaung Pungngia lei zongah an samh chap. Mah mawṭaw he cun Matupi lei ah an kal lai tiah ruahdamh a si”.

SAC ralkap Matupi an phak a si ahcun, Matupi an kal a voi linak a si cang lai. A hlan voithum tiang ah SAC ralkap pawl cu CDF-Mindat nih an kah lengmang hna i SAC ralkap a thimi an tam. “Matupi hi Chin ramkulh a laifang ah a tla. Cun, Chin ramkulh chaklei le thlanglei a pehtlaihnak karlak ah Buha an ngeih caah eidin, lahkhah le hriam bawmh ah an ratmi a si men lai” tiah Salai Ha Om nih a chim.

SAC ralkap pawl Mindat-Matupi lamcung an rat a si ahcun fak piin kan kah hna lai tiah CDF-Mindat nih timhtuahnak a ngeih. Chin ramkulh ah thlah a simi ralkap hna nih CDM tuah nan duh a si ahcun lunglawm tein don nan si lai tiah Kanma, Pauk, Kyaukhtoo le CDF-Mindat nih an thanh.

Monywa Ah Mino 2 SAC Ralkap Nih An Kah Hna, Monywa Thanlar(သံလ်လာ) sang ah mino pa 2 saikel ai phirh mi cu July 17 zaan Sml 7:00 tluk ah SAC ralkap nih Moekaung le Semaung lam aa tonnak an phak mawtaw in an pah hna i meithal in an kah hna tiah tualchung mi nih an chim.

” Mino pa 2 cycle aa phirh mi cu SAC ralkap nih mawtaw in an hnu lei in an dawi hna i hramhram in an pah hna i an tluk pah ah meithal in an kah chap hna. An hma a fak i an nun khawh ding a fawi lo,” tiah tualchung mi pakhat nih a chim. An kah mi pa 2 cu an hliamhma he SAC ralkap nih sakhan ah an kal pi hna tiah theih a si.

Monywa khuachung, khua leng, sang chung ah lam vialte ah SAC ralkap nih mawtaw le cycle aa chawk mi ni fa tin an check i cycle pakhat ah pa 2 an i pherh ah cun an tlaih hna i phaisa an hal hna pin meithal zong in an kah hna caan a um tiah tualchung mi sin in theih a si.

A luancia May 9 zong ah khan Monywa Zalot(ဇလုပ်) timi hmun pawng ah cycle aa phirh mi pa 2 cu SAC ralkap nih an kah hna i a hmun ah an thi colh.

NayPyiDaw Pawng Ah Kahdohnak A Fak, Bago ramțhen, Karen ramkulh le Naypyidaw SAC hmunhma chung hna ah kahdohnak a fak ngai tiah Naypyidaw PDF battalion 802 nih thanh. TanTaungKyi peng , khuate lei ah SAC ralkap 1000 hrawng rallam an sial caah Naypyidaw PDF Battalion 802 le țangți hna nih an kah hna hi asi.

July 14 in July 18 tiang, ni kahdohnak a chuak i SAC ralkap battalion commander tel in 20 leng an thi. Mizapi ralkap lei in ralkap pakhat a nunnak a liam ,pakhat a tlau i pehtlaih khawh a si lo tiah battalion 802 nih thanh.
” Nihin July 28 zing ah MiEgyi( မိအီကြီး) khua cu SAC ralkap an khangh caah kaphnih kahdohnak a chuak țhan tiah Naypyidaw PDF battalion 802 i tuanvo ngeitu nih a chim.

KhinOo, Tawaddy, MonHla le PinSing Khin Khua Kam Ah kahdohnak Um Lo In SAC Ralkap Nih Helicopter In An Kah, Sagaing ramțhen, Khin Oo peng nitlak lei, Tawaddy khua, MonHla khua, PinSing Khin khua tel in a pawngkam khua hna cu SAC ralkap nih helicopter in nihin July 18 zinglei Sml 10:00 ah an kah hna tiah khuami hna sin in theih a si.

” July 17 ah YeeOo in thazaang 100 leng cu Tawaddy khua tlanglei ah an lut. Zan a phan i khuachung phungki sianginn ah umhmun an khuar. Zingkaa te ah khua chaklei cu hriamngan lung 10 leng in an kah. Zei ruangah an kah ti zong kan thei lo. Cu hmun ah cun kahdohnak zong a um lo. Cu hriamngan an kah hnu ah helicopter 3 a rak phan i an kah. A cheu kan zaam, A cheu kan i thup. Tliknak cu MonHla khua lei lawng ah lam a um. Cu kaa lei a zaam mi hna cu an kah hna tiah khuami pakhat nih a chim.

July 14 zongah Depeyin peng nichuahlei kap ah SAC ralkap nih helicopter in an kah hna caah khuami pakhat a thi i pahnih hliam an tuar, a tu helicopter in na kah nak Tawaddy khua, MonHla khua, PinSingKhin khua i khuami hna zei an lawh ti theih an si rih lo.

Matupi Khah- Mah- Yiah Battalion 304 In SAC Ralkap Pakhat CDF Matupi Sin Ah CDM A Tuah, Matupi pengchung , Paletwa lam lei um Khah- Mah- Yiah Battalion 304 in U Phyo Wai Oo , Pumpak Number 1/ 50092 cu 2022 June 10 ah CDF – Matupi sin ah CDM a tuah. CDM a tuahmi ralkap U Phyo Wai Oo cu a himnak hmun ah kan kuat cang tiah CDF Matupi nih an thanh.

Hlaing Peng Ah SAC Ralkap Captain Pakhat Le A Nupi Kahthah An Si, Yangon ramțhen, Hlaing peng No. 2 sang No. 9 lam ah SAC ralkap captain Aung Naing Phyo(အောင်နိုင်ဖြိုး) le a nupi Ma Juu Juu (မဂျူးဂျူး) cu mawtaw in an rat lio ah kah thah an tong i an thi colh tiah tualchung mi sin in theih a si.

Captain Aung Naing Phyo le Ma Juu Juu hi Bayinh Naung (ဘုရင့်နှောင်) No.4 lam ah ah a ummi an si i mawtaw in an rat lio i Bayinh Naung No.9 lam an phak ah minung 2 nih naih tein meithal in an kah hna i an hngawng le an hna an hnabek ah an khen hna i an thi tiah SAC thawngzamh News of Myanmar nih a țial.

” Zing Sml 9 ah a si. Dalan tiah kan ruah nain SAC ralkap nuva an si. Mawtaw chung ah hmakhat te ah an thi colh, ” tiah tualchung mi pakhat nih a chim. ANONYMOUS URBAN GUERILLAS nih nihin. July 18 ah SAC ralkap captain Aung Naing Phyo cu Hlaing peng No. 2 sang lam 9 nak ah kan fimtawl tiah thawng an thanh.

Be the first to comment

Leave a Reply

Your email address will not be published.


*