Mandalay ah SAC ralkap anmah le anmah I kah nak a chuak I Sergent Kyaw Myo Tun a thi
==================
Mandalay ramthen, Mahar Aung Myae (မဟာအောင်မြေ) peng electric manager zung ah venhimnak la mi Sergent 2 kar biaelnak a chuah hnu in I kahnak a chuah I Sergent Kyaw Myo Tun a thi tiah ralkap lei thawngzamhnak nih a chim.
Nizan October 9 chunhnu sml.2:20 ah 35 lam 87 ×88 lam kar Mya Taung (မြတောင်) hnu I Mahar Aung Myae (မဟာအောင်မြေ) electric zung ah venhimnak la mi Sergent Myat Noe Aung (မြတ်နိုးအောင်) nih amah cung simi Senior Sergent Kyaw Myo Tun cu a kah I hmunri ah a thi.
An pahnih in Kah.Pah.Sah-13, Magway ramthen, Sin Paung Wai (ဆင်ပေါင်ဝဲ) in an si veve. A kap tu Sergent Myat Noe Aung cu siangpahrang inn (နန်းတွင်း) ah an hren. A thi mi zong a inn ah timhtuahnak ngeih cia a si cang I a chungkhar cu sakhan leng ah an um, thawng thanh an si rih lo tiah ralkap lei thawngzamhnak nih a chim.
Cinthlaknak Caah Phaisa 140 Billion Kan Bomh Hna Lai-Min Aung Hliang! Facang le a hringso cinthlaknak caah phaisa 140 billion tiang bomhnak peek dingin timhtuahnak an ngeih nak kong, SAC ralhrang lutlai Min Aung Hlaing nih kum 2022, October ni 6 ah a chim. kum 2022, October ni 6 Nay Pyi Daw ah tuah mi Myanmar Rice Conference-2022 toanbiaruahnak a chim.
SAC ralhrang lutlai Min Aung Hlaing nih, “A rauh hlan ah a rak phan hnga mi thal facang a chuah caan caah acres ting (8.5) ah thathnemnak hmuhnak Contract farming riantuan ding caah rampi cozah nih Acre khat ah zatuak in ting (2) in phaisa cawihnak cu timhtuahnak ngeih a si lai i, Facang le a hringso caah phaisa 140 billion tiang bomhnak peek dingah timhlamhnak ngeih a si nak kong,
Cu phaisa bomh peknak pawl cu nawn..etc..tiabantuk in cinthlak mi a thattertu, cithlak pawl caah thazaang bomhchanhnak a pee khotu pawl caah bomhnak peek a si lai i, Cu pawl he aa pehtlai mi mipi lei nih eibar a theitlai a chuah khawh nak hnga ding ah le thathnemnak hmuh khawh nak hnga ding ah felfai te le siamrem tein tuanvo lakti a herh.” tiah a chim.
SAC ralhrang lei nih rampi a tha-nuam i a rum khawhnak le eidin ti le rawl humhimnak timi miphun riantuannak pa (2) cu hmathlak in tuanvo lak a si nak kong, Kan ram ah 70% cu leirian in a paw aa cawm mi an si hna i, Cinthlak, Saram cawmkennak cu hrambunh in chawlehnak cu thanchoter dingah tuanvo lak a si nak kong, Facang hi a bikin cin bik mi le chuah bik mi cintlak a si i, cinthlaknak hmun area hi 34% hrawng a um nak kong, zong Min Aung Hlaing nih a chim.
KIA le PDF Phufonh Nih BanMauk Palik Sakhan An Kah Hna, SAC Ralkap 11 An Thi. Sagaing ramṭhen, BaMauk palik sakhan cu KIA le PDF phufonh nih an luhhnawh hna i an kah hna caah SAC ralkap 11 an thi tiah BanMauk Revolution-BR nih October 9 ah cathanh an chuah. BaMauk palik sakhan cu kahnak hi a luancia October 4 ah luhhnawh in kah an rak ton mi a si, cu kahdohnak ah cun SAC ralkap 11 an rak thi.
Asinain cu kahdohnak kong ah SAC ralkap nih thawngdik thanh duhlo in, a thli tein an umnak sakhan hmunhma chung ah a thimi ralkap ruak cu an rak vui tiah Banmauk Revolution – BR nih an langhter.
Launglon Peng Ah Pyusawhṭi Pakhat Kah A Tong, Kutser Meithal Telh In Meithal 2 An Chuh! Launglon peng Maungmakan(မောင်းမကန်) khua in SAC ralkap hmanrua pyusawhti phu chungtel simi Zaw Win Shing cu kah a tong tiah Dawei Guerrilla Revolutionary Force – DGRF nih October 9 ah cathanh an chuah.
October 8, zaanlei suimilam 7:30 hrawng ah Maungmakan(မောင်းမကန်) khua mi pyusawhṭi phu chungtel pakhat simi rithaisi cawk/zuar in SAC ralkap thazaang petu le bawmtu Zaw Win Shing cu DGRF, LLPDF le T-PDF phufonh nih fimhlawm a si tiah an thanhmi ah cun an langhter.
Kah a tongmi Zaw Win Shing sin in 22 meithal pakhat, Air gun pakhat, nam pakhat, phaisa sing 14mmk, le rithaisi thlainak cuai telh in zeidang thilri kan lak tiah an langhter chih.
Gangaw Peng Kahdohnak Ah SAC Palik Bawi Pakhat A Thi, PDF Pahnih An Nunnak A Liam Ve. Sagaing ramṭhen, Gangaw peng Gan khua le Kyunkhonta(ကျွန်းခုန်သာ) khua kar ah October 9, zaanlei suimilam 3:00 hrawng ah tualchung PDF 2 le Gan khua palik sakhan um palik phu kar naih tein kahdohnak a chuak i PDF lei in minung 2 nunnak a liam, palik lei in palik bawi pakhat a thi i minung pahnih hliamhma an tuar tiah tualchung mi nih an chim.
“Tualchung hriamtlai minung pahnih cu lampi ah SAC palik he an i tong i, palik nih pakhat deuh cu a Hna ah meithal hmuahchih buin a khup a bilter, cu lio ah a hawipa nih a meithal i ai chuah i a kah ve hna hnu ah kahdohnak a chuah hi a si” tiah tualchung mi pakhat nih a chim.
Cu kahdohnak ah cun palik bawi an hliamh hnu ah a nunnak a liam, kah a tongmi palik bawi cu uniform aa hruk lo, kuan nih a hliamh caah sakhan an phak hnu ah a thi” tiah tualchung mi pakhat nih cun a chim.
Nattalin Peng Ah Rallam Sialmi SAC Ralkap Bomb Puahhnawh An Ton Caah Ralkap Pali An Thi. Bago ramṭhen Nattalin peng ah rallam sialmi SAC ralkap pawl bomb kan puahhnawh hna i ralkap pali an thi i hliamtuar zong an tam tiah Nattalin PDF nih cathanh an chuah.
October 9 ni ah Nattalin peng Kayinswai (ကရင်ဆွဲရွာ) khua lei panh in rallam sial ah a kal mi SAC ralkap thazaang 23 cu Tharyawaddy pengkomh battalion 3801, tatkhuai 4 le MRF Nattalin nih bomb an puahhnawh hna tiah theih a si. Cu bomb puahhnawhnak ah SAC ralkap 4 an thi, 8 leng nih hliam an tuar tiah an cathanh ah cun an langhter.
Pakokku Ah Faktuk In Ruah A Sur Caah Tiva Ti A Lian I Minung 4 Ti Nih A Fenh Hna. Magway ramṭhen, Pakokku ah October 8 zinglei suimilam 3:30 in faktuk ruah a sur caah tiva ti a lian i, minung 4 ti nih a fenh hna tiah Myanmar meithat zung nih cathanh an chuah tiah theih a si.
No.15 sang Sinpoahhla lam 8 nak, Sinpoahhla(ဆင်ပေါက်လှ) tiva ti a lianh caah chungkhar pakhat in pa 2 le nu 2 hna cu tiva ti nih a fenh hna.
Khuachung mi bawmchantu pakhat nih cun” Zaan ah ti a lianh caah a himnak hmun an hrial, cuti an hrialnak ah cun ti nih a fenhchih hna. Zinglei ah ngakchia 2 ruak lawng hmuh a si nain zaanlei ah a nu ruak an hmuh ṭhan. Ngakchia cu kum 14 nu le kum 7 pa ngakchia an si” tiah a chim.
A luancia 2011 kum October thla, Pakokku pengchung ah ruahpi faktuk in a rak sur caah minung 100 hrawng an nunnak a rak liam i, inn 200 hrawng a rak rawk bal cang tiah theih a si.
Kalay Myo Tatyin (6) A Phan Mi Iron Man Le မြန်မာပြည်သိန်းတန်! Sagaing ramthen, Kalay Myo pengkulh Tatyin (6) ah Iron Man le မြန်မာပြည်သိန်းတန် (Hlasakthgiam Thein Than) timi minung pa 2 an phan tiah kan theih. Ramleng vawleicungah a um mi Iron man le မြန်မာပြည်သိန်းတန် hna pa 2 cu Iron Man taktak cu an si lem lo. A sinain an an rian tuan cu a si khawh chung in mipi lei in dawtnak he bomhnak thilri hruk-eih in aa pee mi an si.
Mipi sinah bomhnak an peek mi hna hruk-eih chungah Iron Man angki le kawlram hlasakthiam Thein Than a fashion he aa khat mi angki cheukhat cu Kalay PDF tayin (6) hna cu i lomhter dingah an i hruk piak hna, tiah kan theih.
Iron Man angki he ralkap pawl nih Iron Man taktak cu si taktak hna sehlaw cu van lei ah zuan in Sahrang SAC ralhrang hruaitu pawl cu an kahthah nawn dih cang hna lai, ti hna in capo nihchuak in an chim.
Mipi an i lomhnak caah tiin a zuk (hamnthlak) hna an i thla hna i Kalay pengkomh taytin (6) cu hriamnam, riahcaw, sii-ai zong tampi an herh i mipi lei nih pehzulh in bomhnak peek ding zong in an nawl piak hna, tiah kan theih.
Monywa-Yargyi Toll Gate Pawngah SAC Ralkap Bomb Puahhnawh An Ton Ruangah 10 Hrawng An Thi, Sagaing ramṭhen Yinmarbin peng Monywa-Yargyi (ယာကြီး) lam meng 5 toll gate pawngah SAC ralkap motor cu PDF nih, nizaan October 7 zinglei sml 5 in 8 kar ah bomb lung 3 in an puahhnawh hna caah SAC ralkap 10 hrawng an thi kho i 15 hrawng hliamhma an pu lai, tiah theih a si.
“Motor lam cu ṭha tein kan cawh hnuah thir zum tampi le bomb lung 5 ṭem chihmi kan phum hna. SAC ralkap motor cu bomb kan phumnak an phanh ah kan puahhnawh hna i, ralkap 10 in cunglei an thi lai. Bawmtu ralkap an auh hna i, an rak phanh hlan lo hriamngan in an kan kah,” tiah Chu Mai Mai thawngpang fiangternak phu nih an langhter.
SAC ralkap skat motor le i khamnak motor pakhat cu Aung Zeyar tlangpar in Banbuai khua lei an kal lioah PDF nih bomb in an puahhnawh hna hi a si. SAC nih nawlngeihnak an lak hnu in SAC ralkap pawl cu Banbuai khua ah umhmun an khuarnak kum khat tluk a si cang. Banbuai khuami ralhrial 1,000 leng cu eidin tirawl an har ngaingai, tiah theih a si. Credit: The Chin Post
Leave a Reply