Breaking News: Ralhrang ralkap nih nu kum 14, kum 16, kum 35 le nu 30 leng cu a bu in an tlaihhrem hna!

Ralhrang ralkap nih nu kum 14, kum 16, kum 35 le nu 30 leng cu a bu in an tlaihhrem hna
==========
Sagaing ramṭhen ah kum 14, kum 16, kum 35 nu 4 cu SAC ralkap nih an tlaihhrem hna i an thah beh hna tiah khuami hna le mipi hriamtlai phu pawl nih an chim. People Defense Force Tawng Dwin Region-Mingin nih thawng a thanh ning ahcun Sagaing ramṭhen, Mingin peng March 28 ah SAC ralkap nih Kyaw khuami nu 3 cu an tlaihhrem hna i an thah beh hna cu a dik ko tiah thawng an thanh.

“March 28 Kyaw khua ah hmunhma a khuarmi SAC ralkap pawl nih nu an tlaihhrem hna i pathum an thi tiah kan theih. A thimi nu 3 hi kum 14 pakhat, kum 16 pakhat, kum 35 pawnghrawng pakhat an si” tiah People Defense Force Tawng Dwin Region-Mingin nih thawng a thanh.

Yangon Khit Thit thawngzamh nih People Defense Force Tawng Dwin Region-Mingin cu a pehtlaih tikah “An tlaihhremmi nu pakhat lawng a min kan theih, kum 14 le kum 16 hna hi cu an min kan thei kho rih hna lo. Mahka khua in a zaammi pakhat chawnh khawh kan i zuam lio a si. A zaammi kan hal khawh tikah thawngtling kan rak thanh ṭhan te lai. Mahka khua kha phone chawnh khawh an si lo” tiah a leh hna.

Cubantuk in, Magway ramṭhen Gangaw peng, Yaw hmunhma April 4 ah SAC ralkap nih nu pakhat le a pa cu an velh hna i an thah beh hna leng ah nu cu an tlaihhrem i an thah beh, tette ṭha tein kan ngeih tiah Yaw hmunhma dothlennak hruaitu pakhat nih a fianhter.

April 4, Gangaw-Kalay lamcung Hteehlaw khua cu SAC ralkap nih an luh hnawh hna i pafa tlaih hna, a pa kha a hnulei ah kutsih in hri in an hren. An velh, an thah beh i a ruak cu mei in an khangh. Kum 16 hrawng a simi a fanu cu an tlaihhrem i mei in an khangh beh tiah Yaw People Defense Force (YPDF) nih a chim.

“SAC nih Gangaw thlanglei ah kahdohnak a tuah hi zarhhnih leng a si cang. A biapi in Myittha tiva a pawngkam hrawng khua hna ah an lut. Inn, thlam, lei ah hmanmi thilri le seh thilri pawl an khanghpiak dih hna. Cun caw le innzuat saṭil pawl zong an thah i an ei. Hteehlaw khua pafa hna cu ramlak an kalnak ah an tlaih hna i an thah beh hna. A pa hi kum 50 hrawng, a fanu hi kum 16 lawng a si rih.

A fanu cu an tlaihhrem beh. Inn pahnih zong an khanghpiak hna. A tu SAC ralkap pawl cu Gangaw lei ah an kal lio a si. A taang rihmi khua pawl zong zeitluk in dah an hrawhpiak rih hna hnga theih a si lo” tiah YPDF in rianngeitu pakhat nih a chim.

Cun Sagaing ramṭhen, Mingin peng, Bin khua le Oakhneboak khua cu SAC ralkap nih February thla lai hrawng ah an luhhnawh hna inn an khanghpiak hna. CDM sayamah cheukhat telh in nu 30 cu a bu in an tlaihhram hna, internet line an hrawh, tlaihhrem a tongmi nu hna i an himnak le an nunnak caah thil sining tak cu chim khawh a si rih lo tiah theih a si.

“Khuanu hna cu an ningzak, khuate a si caah an chim duh lo, an nunnak leng ah a tu cu zaam lio a si caah an chim ahcun an kawl hna lai i thah an tong sual lai ti an phang” tiah khuami pakhat nih Khit Thit thawngzamh ah a chim.

Mingin peng le Kani peng karlak Ṭinṭaw khua ah SAC ralkap nih chungkhar pakhat i pa bik cu an tlaih i a nupi le kumtling lo an fanu cu an tlaihhrem hna. Tlaihhrem a tongmi hna himnak le an nunnak caah thil sinning fiang tein chim khawh a si rih lo tiah theih a si. Credit: The Chinland Post

Be the first to comment

Leave a Reply

Your email address will not be published.


*