Breaking News; Russia Nih Belarus Cu Nuclear A Kap Khomi Missile System A Bawmh Lai!

Russia Nih Belarus Cu Nuclear A Kap Khomi Missile System A Bawmh Lai!
========
Russia Nih Belarus Cu Nuclear A Kap Khomi Missile System A Bawmh Lai! Russia nih Europe ah a hawikom ṭha ram pakhat a si mi Belarus cu nuclear a kap kho mi missile system kan pek lai, tiah President Putin nih a chim.

Russia ngeihmi Iskander-M missile system nihcun nuclear bomb a kalpi khomi cruise missile tibantuk cu puak lakin a kah khawh i, meng 310 tiang a kal kho. Cupinah Russia nih Belarus ca ah SU-25 vanlawng cu nuclear hriamnam phor in, a kah khawh nakhnga kan rempiak hna lai tiah President Putin nih a chimchap.

Russia nih Ukraine ah Kahdohnak a tuah ni 123 hnu in, Ukraine nichuahlei Luhansk Oblast, Severodonetsk khuapi ah a zarhzarh in kahdohnak a tuah ṭhan i, khuapi cu a ning in kan control khawh cang, tiah Russia lei nih an thanh. Russia nih Severodonetsk khuapi an laak cang caah Luhansk le a pawngkam Donetsk zong an control khawh deng cang tinak a si.

US Le Iran Karlak Ah Nuclear Kong An Ceih Ṭhan Lai! US Le Iran Karlak Ah Nuclear Kong An Ceih Ṭhan Lai!: Kum 2015 lio ah Iran nih nuclear hriamnam a ngeih khawh nakding he pehtlaiin hnatlaknak an rak ngeihmi kong ah US le Iran karlak ah a rauh hlan ah tonbiaruahnak an ngei ṭhan lai, tiah EU ramdang kong lutlai pakhat Joseph Borrell nih a chim. Joseph Borrell nih Iran foreign minister he cawn niruk ni ah tonnak a ngeih hnuin ram pahnih tonnak kong cu a chim.

US le Iran karlak ah nuclear kong he pehtlaiin tonbiaruahnak cu March thla hnu khan caan karlak chung an i din nain tonnak program a um ṭhan khawh nakhnga EU cu aa zuam. Nuclear hnatlaknak ning in Iran chawlehnak le ṭhanchonak hna cu a hlan bantuk in ningcang tein a kal ṭhan khawh nakhnga a biapi i, hnatlaknak hi a tlamtlin khawh nakding ah cun atutan tonnak ah US hi a biapi tuk hringhran, thilṭha a chuahpi ko lai tiah ruahchannak kan ngei ko, tiah Iran foreign minister nih a chim.

Europe i Vawleicung Hruaitu pawl Tonnak an Ngeih lio ah Russia nih Miakpi in Kyiv a Kah. Ukraine nichuahlei khua Sievierodonetsk Russia kut a phak hnu a thaizing ah Ukraine khualipi Kyiv zong Russia nih bomb in a kah colh, tiah theih a si. Ukraine caah sunghnak nganpi pakhat a si. Cu ti a kah lio cu Russia cungah phihkharnak tuah chap dingin Europe ah vawleicung hruaitu pawl tonnak an ngeih lio te a si, tiah theih a si.

WWII hnu in Europe vawlei ah a nganbikmi ralpi a thawhnak hi thla 5 chung a lut ruangmang ko cang. Western ram pawl nih heh tiah Kyiv cu an bomhmi thawngin Russia thazang tampi an derthawmter khawh i, an tha an batter ngaingai.
Vawleicung tirawl kuatnak a tluan khawh nakhnga, kaphnih ton biaruahtinak ngei dingin Indonesia nih Sunday ah khan a duhnak a langhter. “Ukraine nih teinak a hmuh khawh ko, asinain, remdaihnak belte thitha in tuah a duh sual lai lo, ti belte ai phang ngai ko,” tiin Saturday ah khan Britain nih a chim.

Sunday zingka ah khan Kyiv khualai vang Shevchenkivskiy sang cu Russia nih miakpi in an kah i, dot 9 a sangmi inn a hrawh dih, mei a thawhter fawn, tiin major Vitali Klitschko nih a chim. “Inn rawkmi tangah mipi an um ko rih. Tampi cu sizung an phan kho cang. Kum 7 ngakchianu te zong michanhtu nih himtein an chanh khawh. A tu hi hringtu a nu chanh an zalh lio pi a si,” tiin a chim. Ral a thawhka hrawng i Russia nih Kyiv ai nam sual i a kirtak hnu khan cun khuami pawl punghman tein khua an sa manh.

April, June thokin khan Kyiv ah kahdohnak ngan a um ti lo tluk a si. Mipi kan thlurh hrimhrim hna lo, tiin Russia nih ai pheh len. “Asinain, Russia nih Ukraine mipi a thahmi hna hi a thong a sang an phan cang. Minung million tampi nih ram an chuahtak, khua le ram tampi a hrawh. Cucaah, Russia nih “war crime” a buar, tiin Ukraine le Western ram nih an chim.

Ukraine ralkap pawl hnung an tolh le cangka Saturday ah khan Russia a tanhtu hriamtlai pawl nih Sievierodonetsk khua cu an lak cang. Thla thum le renglo chung som cikcek in kahdohnak hma a tuarmi khua a si caah, a chungah ven ding thil zeihmanh a um ti lo, tiin Ukraine lei nih an chim.

Sievierodonetsk kan lak khawhmi hi Kyiv caah cun zatlak ngaingai a si, tiin Donbas pengkulh a ningpiin lak a timmi Kremlin nih a chim. Donbas chungum Luhansk le Donetsk hna hi 2014 lio tein a dang tein a ummi ram an si cang, tiin Moscow nih a chim. Hi khua 2 hna hi kanmah an kan tanhtu hriamtlai hna kut ah Ukraine nih daitein a chiah ah a tha lai, tiin Moscow nih a chim.

G7 Meeting; Tutan ral nih hin vawleicung chawlehnak le European himnak a hnursuan ngaingai. Gas, zinan, facang man a kaiter, Russia zinan i bochan ti lo dingin EU kar a hlanter, Findland le Sweden zong NATO chungtel a sokter phah hna. Kaphnih karah daihnak a um khawh nakhnga, Ukraine le Russia ka thazang ka pek hna lai. Cop le cilh in kahdohnak ngawlter dingin Putin ka nawl lai, tiin Indonesia President Joko Widodo nih a chim. “Ral hi kan kham hrimhrim a hau.

Vawleicung tirawl kuatnak lam hi peh than a hau,” tiin Sunday i Germany ah an tuah dingmi G7 kai ai thawh lai te ah Jokowi nih a chim.Vawleicung ah rawl a kuabik mi ram pakhat a si mi Ukraine cung i kahdohnak faktuk in a tlun ruangah hin vawlei pumpi ah tamhalnak fakpi a tlung kho mi a si, tiin UN nih ralrinpeknak an tuah. US President Biden le G7 hruaitu hna nih Russia cung i phihkharnak thar tuah chap an i timhmi hi Russia sinin a rami sui paoh kham i tim hna sehlaw a dawh, tiin source pakhat nih Reuters ah a chim.

Tu kum a dih lei sangah khin Bristian nih World Bank ah ai chiahmi a loan chungin $525 million Ukraine bomh dingin a chim. Britain nih kan bomhmi a dihlak ah cun $1.5 billion a phan lai, tiah G7 meeting hlan ah Prime Minister Boris Johnson nih a chim. “Ukraine nih a tei khawh, a tei zong a tei ko lai. Asinain cu ti an tei khawhnak dingah cun kan dirkamhnak a herh. A tu caan hi Ukraine cungah kan lung a dongh caan a si awk a si lo,” tiin Saturday ah khan Johnson nih a chim. Madrid ah June 29-30 meeting NATO hruaitu nih an tuah lai, tiah theih a si.

“Tuksapur ngai a si” Mipi 100,000 lenglo khua an saknak Sievierodonetsk khua Russia kut a phan ruangmang cang. A tu ah cun hmangsom in ai som cang i, Russia nih bomb in nolh cip in zarh tamtuk chung an kah hnu ah a tu bantukin an kut a phak hi a si, tiah theih a si. “Va ral ah a ummi Lysychansk zong Russia le kanmah (pro-Russia) nih kan luhhnawh cang,” tiin Russia a tanhtu hriamtlai pawl nih an chimmi cu Russia Interfax News nih a thanh chin. Hi khuapi pahnih hi Ukraine nih a nehnubik an i humzual seklen mi khua an si.

“Sievierodonetsk telh in Russia sin kan sunghmi khua le ram vialte hi kan chuh dih than hrimhrim hna lai,” tiin Zelenskiy nih minchal in bia a kamh hna. “Hi ral hi zei can tiang a rauh lai, voizeizat dah sunghnak kan ton lai, timi hi kan buaipi mi a si lo. A tak in teinak kan hmuh hlan lo zeitluk in dah thazang kan chuah khawh lai, timi tu hi kan buaipi mi a si deuh,” tiin a chim.

Sievierodonetsk khua chungah Ukraine ralkap a tangmi an um ko rih. Russia pawl heh tiah miakpi in an kah peng ko rih hna, tiin Zelenskiy i a adviser a si mi Oleksiy nih a chim. Sievierodonetsk ah a ummi chemical plant cu Saturday ah khan Russia nih bomb in an kah. Cu ka inn i a tangmi kan mipi hi za lengkai an si. Pavlograd le Synetsky khuate pawl zong bomb in heh tiah a kah hna, tiin Gaidai nih a chim.

Azot an kahmi kongah Ukraine le Russia sual an i phaw veve. Ukraine nih pehtlai in bomb in an kan kah caah a chung ummi mipi kan chuah khawh hna lo nak hi a si, tiin Russia tanhtu hriamtlai pawl nih a ti ve. “Khuapi cu vanlawng in heh tiah an kah. Bila Gora zong an kah chih. Ai rawkmi a tamtuk – Lysychansk le bang cu a muisam a tlau thlu deng cang,” tiin Gaidai nih a chim.

Ukraine kut ah a ummi rih mi Pokrovsk ah tarnu Elena cu wheelchair in a dang minung 100 hrwng he a hung phan.
“Kan hnung zarh chung kha cu Lysychansk i khuasak hi tuksapur a si. Nizan khan cun kan ing kho bak ti lo khi a si. Ka thih sual ah cun, kan inn hnunglei te ah ka vui te aw, tiin ka vapa ka cah,” tiin tarnu Elena nih a chim. Credit: Chelsea Bawi

Be the first to comment

Leave a Reply

Your email address will not be published.


*