Breaking News: Russian Missiles cu Poland ram chung ah a tla, Poland minung pahnih an thi!

NATO Article 4 Arhli Akhuang cang lai!
=========
Russian Missiles cu Poland ram chung ah a tla, Poland minung pahnih an thi. Poland cu NATO chungtel ram pakhat a si. Tu zanlei Poland ah rocket-bomb a tla i mi pahnih an thi. Rasia an puh i Zukarin nih NATO forhnak ah a hman colh. NATO nih ttha tein kan hlat cuahmah ko, a van ti, cun Rasia nih kanmah ta a si lo, ngiar nan kan duh bia a si a van ti ve.

Poland cu NATO chungtel a si i NATO chungtel ram pakhat an kah ahcun NATO ning in kan bawmh lai timi phung an neih caah Rasia nih a kah takmi a si ahcun thil ttha lo ngai a chuak kho. Sihmanhsehlaw, Rasia nih Zukarin a tuk i dollar le hriam in tamtuk te Zukarin an bawmh bu ah Rasia he ral thawh tak cu NATO le US nih hrial khawh chung hrial ko lai. Nai G20 ah Tuluk le US tha tukin bia an i ruah kho. Rasia caah thawng chia a si.

NATO Art 4 ah hi ti hin a ti: NATO chungtel a simi pohpoh himnak, ram uknak lei zalonnak, asiloah ramri lei diknak hrocer, tlerh a ton/ a si tik poh ah chungtel dangdang ruahnak kha ruahnak hal cheuhnak a tuah lai ti a si. (The Parties will consult together whenever, in the opinion of any of them, the territorial integrity, political independence or security of any of the Parties is threatened.)

Cucaah Poland nih NATO chungtel dangdang kha ruahnak halnak a tuah colh hna lai tiah ka ruah. Poland ramchung tiang hriamnak a luhnak kong ah “timh ciammam zong a si kho, tlak sual accident zong a si kho, etc.” Ni tlompal ah NATO nih Russia cungah zeitindah biahalnak, bialehnak, etc. a hun tuah zau lai dah! Article 4 NATO Arhli hi Taik ciat sisehlaw ka duh. Lai arhlei si lo in. Credit: Saya Thawng Za Pum, Si Bawimang Lian

Trump Dirkamh a Timtu Republicans pawl nih Thil Harsa Pakhat an Tong! Trump nih White House co than seh, tiin ruahchannak a ngeimi Trump tanhtu pawl cu an i ruahning in thil a kal ti lo. Trump dirpi dingin Arizona nilinh tuar in nazi pahnih chung mawtaw in khuallam a ra mi Chuck Smith zong a khuaruah a har ko.

“Trump hi thim than awk a tlak in ka ruat ti lo. Cuhlan siseh, cun a tutiang zong i dohdal a tonmi zoh tikah, amah thim than dingin biachahnak tuah hi ai ningcang in ka chia lo. Thim than ding kan ti ah cun kan Republican Party caah tihnung ngai a si te kho mi a si,” tiin Smith nih a chim. Asinain, a tangmi thla hnih thum chung i kan Republican Party a dirhmun a hliahtertu ding thil cu mah hihi an si, tiin ralrin a pek hna.

“Theithiam lo in maw ka um sual lai u ci. Ai thim than ko ah cun, ka dirpi ve thiam ko lai’ tiin a chim. Tuesday ah khin president i cuh ai timh than le than lo Trump nih a thanh te lai. Cuh ding hna a si ko ah cun, lungkam lo tein amah dirpitu i ngeih hi a caah a biapibikmi thil a si. A kalpimi Republican politics nih lungrawk a si mi thimnak pathum a chuahpi cang ko nain, president thim thannak ah hei sung ding va si ko hmanh sehalw, a voter pawl nih cun a kalnak hmun paoh ah zulhdawi an i tim ko rih.

Trump kaltak dingin Republican muru pawl hi khua an khanmi hi a poi ngaimi thil sining tak cu a si. Apakhatnak ah hrial awk a thalo mi biahalnak pahnih kongah lehnak an tuah hmasa a hau lai: Fektein Trump ai tlaihmi minung hi zeizat set dah an si, soilem khawh teh an si hnga maw?

“Team pakhat caah a biapituk lo mi thil kongkau ah a tu le tu na sungh a si ah cun, thatein khurkhua na tuaktan hmasa than ta a hau lai. Cheukhat kongkau ah cun kan pualthawh a tha, asinain tor le cheng in kan i ngeihmi kan voters pawl an lung kan rawhter hna. Cucaah thitha in kar kan hlan khawh lo hi a si” tiin Sunday i CNN i interview tuahnak ah Maryland Republican Gov. Larry Hogan nih a chim.

Midterm elections kong ah Republican party a cawlcangh ning hi lung a hmui lo, ti cu Mr. Hogan biachimmi nih tehte a langhter ko. Republican party chawva in a bawmtu hna zong nih hruaitu thar an duhnak kong fiangtein an langhter cang i, a dang thimmi officials lakah Trump ca i chawva bomhnak an pekmi hi a tlawm chinchin cang.

Mike Lawler hi NY Republican a si i, Democratic Congressional Campaign Committee chair Sean Patrick Maloney a teitu a si. Kan GOP hi 2024 caah cun Trump sinin i pheu i phundang in karhlannak tuah kho u sihlaw ka duh, tiin Mike nih a chim. Kan party hmailei a fon hi hmuh ka duh. Hmailei kong nai hmaithlak fatin te, a liamcia caan hi na kirhnawh tuk awk a tha lo, tiin Thursday ah khan CNN ah a chim.

Trump nih a ra laimi a campaign kalpi ai timh bangin, a team pawl hi cun Mr Mike sinin dirpinak hmuh an i ruahchan. The House ah No. 3 Republican a si mi NY mi Rep. Elise Stefanik telh in cheukhat Republican hruaitu hna sinin Trump nih dirpinak a hmu kho ti lo. Cu tikah Mar-a-Lago ah buan a comi Trump nih a dirpimi pawl cu i lak hna dingin khuakhannak an ngei, tiah theih a si.

Republican National Committee member 168 zong Trump nih a sawm hna. Asinain, RNC rules kongah lungretheihnak a um rih caah, zeizat meeting an kai lai, theih a si rih lo. Trump dirkamhtu a hrihhram hi fek cu a fek ngai ko. Florida, Nevada, Ohio le Pennsylvania i nai i Trump a tonmi a mipi pawl nih cun Biden thilh khawh lai an i zum ngai ko hna. 2028 i Trump a chawngtu dingah cun Florida governor Ron DeSantis hi si kho te sehlaw a tha lai, tiin tam u nih an duhnak an langhter. Virginia Gov. Glenn Youngkin zong a hna a tla ve.

Trump hi lunghmuih ngaiin an dirpi ko rih. Trump hi kan caah a dir. Cu caah cun a tu bantukin a pumpak riantuannak le 2020 election kongah heh tiin dohdalpiak kan ton hi a si. Trump nih mah vialte a temin hnu ko ah hin kan upat, kan dirpi chinchin, tiin Reno, Nev. mi kum 62 minung sibawi rian ai dinmi Joanne Chao nih a chim. Ka kong an hlatmi hi ramkhel hoih in doh an ka duh caah le nanmah zong nan ka phih an in duh hna caah a si, tiin Trump nih a mipi sinah a chim zungzal. ‘Ka neh le ka nang an dawi. Asinain nan caah ral ka tu peng ko’ tiin Trump nih Ohio i mipi a tonnak ah a chim.

Trump cungah zumh a tlakmi Republican miluzat hi fiangin theih a si lo. Vote a petu vialte chungin cheuthum ah cheukhat (40%) hrawng cu si dawh in Poll an tuahmi nih a langhter. Republicans lak in 30% nih hin an party nakin Trump an dirpi deuh. A liamcia kum 2 lio i a dirpitu kha cu 50% tiang an rak phan bal, tiin NBC News poll nih a langhter.

AP VoteCast nih minung 94,000 interview an tuah hna i, Republican chungin 66% nih MAGA an dirpinak kong an chim, cheuthum ah cheukhat nih cun an dirpi ve lonak kong an chim, tiah theih a si. September i NYT/Siena College nih poll an tuah mi zoh tikah, Republican chungin Trump a uarmi hi 54% an si i, Democrats lei in Biden a uartu hi 45% hrawng an si ve, ti a si.

Party nominee a si than khawhnak dingah Trump nih zeitluk tuak hrawng dah dirkamhtu a herh, ti hi ai fiang rih lo. 2016 lio ah khan cu a biapimi states tam u i Trump nih vote a hmuhmi hi 40% lawng a rak si. Tutan cu vote petu ding tamdeuh dawhdang an si. Trump nih buan a co kho lo sual lai, ti i ka thinphannak nih a dang kan candidates pawl lam a sialpiak hna bantuk a si, tiin Mesa, Ariz ah Trump mipi tonnak ah zaanghlei a cawitu kum 67 minung Mark Roberts nih a chim.

“Trump hi a chuakthanmi Khrih a si’ ti phun ai lami bantuk ka si ve lo. A caan ah cun ruahlo piin bia chim a hmang. Hihi cu chim hlah sehlaw cu a tha hnga mu, tiin ka ruah caan hi a tam ngai. Cucaah kei ka caah cun Trump hi a tlingmi minung a si ruam lo,’ tiin a chim. Biden soisel duh ah ‘Let’s Go Brandon” timi T-shirt cu ai hruk ko nain, mipeem kongkau i US ramkhel a daithlannak kongah a ngaihchiathnak Roberts nih a chim.

Party hruaitu tam u cu a kakip lo in buainak an ton lio caan a si ko nain, Trump nih president cuh ai timhnak kong official tein thanh dingin biachahnak a ngei. Trump nih Republican Senate hruaitu Mitch McConnell a doh. Cun, Republican nih the House an conak dingah lam bite lawng an i ngeih in cun, Kevin McCarthy zong top House Republican a si khawh lai le si khawh lai lo ai fiang ti lo tluk a si cang.

Party chair tlaitu nu Ronna McDaniel a rian chawn le chawn lo kong Republican National Committee chungtel cheukhat nih an chim. Hlengtu dingin an hisapmi cu Lee Zeldin a si i, NY governor candidate a si i, House seats conak dingah tamdeuh in rian a tuan khotu a si, tiah theih a si. Party chair tlaitu tuanvo lak ka duh ko rih, tiin Monday ah khan Ms. McDaniel ni a chungtel pawl phone in a chimh hna. Kan party dirhmun hi a fian rih lo caah, president cuh nai timhnak kong official in thanh nai timhmi hi a ni thawn law kan duh ko, tiin a team pawl nih an nawl. Trump nih a duh hlei lo.

Trump hi lenglei minung a si ti lo. Tu kum midterm election i amah nih a dirkamhmi candidates hi 300 lengkai an si. Office a chuahtak hnu i party ca i fund a kawlmi hi $130 million a phan. Tu kum canceu hrawng zongah khan online in $25 million a kawl – Republican a bawmtu online WinRed nih party an bomhmi phaisa vialte chungin 15% hrawng Trump nih online in a chuahpi khawh, tinak a si.

Trump nih mah hi a thazaang te hi ai hman riangmang i 2020 election kong i lih a chimmi vialte von nolh than dingin a Republican hawi pawl cu deiret a chanh hna. Election fir a tonmi hi kan ram caah thil buaibik a si, tiin a ti tualmal ko rih. Pennsylvania i Senate cuhnak ah Republican an sung i, hihnu kum 2 chung cu Democrats kut ah um rih ding a si. Cu ka ah cun Trump nih David McCormick a ton hnu ah Mehmet Oz a dirpi. David nih cun election fir a tong, timi hi a cohlang lo. “Na bia na let lo ah cun, na sung lai,’ tiin Trump nih McCormick cu a thihphaih, tiah min langh a duh lo mi minung pahnih nih an chim.

Trump nih 2020 election phichuak remhsiam ai timhmi hi a karhlan a ping a kaltertu thil a si te lai. Tuesday i poll an tuahmi zoh tikah, tutan election campaign i Trump dirpi dingin a rami mipi tam u nih an i tlaihmi biatlang (top issue) pawl ah 2020 election fir a tong, timi kong ai tel lo. A tam u nih cun ram chung sual a karhnak, mipeem kong le chawlehnak kong hi an chim.

“Democrats nih pehzulh in buan an co a si ko rih ah cun, kan ram hi ram sifakbik (third-world country) ah kan i chuah te lai. Cucu ka zumh bak mi a si. Phungninglo in a hung peemmi nih tilian bang an kan chilh lai i, tax petu pawl an tha a batuk te ding khi a si” tiin Dayton, Ohio in a rami retail riantlai Andrea Crosby, 52, nih a chim.
Trump vote pek hi thin cu a phang pah ko nain, amah thiam vote ka pek ko rih lai, tiin Ms. Crosby nih a chim.
“Trump nih a tuah cia mi le a duh lai dingmi hi ka theih. Pumpak in an rem lo ruangah amah ralchanh in vote a petu mi chepchop an tamtuk rih” tiin a chim. Credit: Chelsea Bawi

Be the first to comment

Leave a Reply

Your email address will not be published.


*