Breaking News: Russian ralbawi pawl Kawlram a thli tein an tlawng lai timi thawngpang theih a si!

Breaking News: Russian ralbawi pawl Kawlram a thli tein an tlawng lai timi thawngpang theih a si!
=============
Russian ralbawi pawl cu Kawlram tlawng dingin timhtuahnak an ngeihmi kongah biathli thawngpang a chuak caah ralhrang ralbawi cheukhat pawl an tlaih hna pinah checkhlaitnak an tuah hna, tiah thawngpang theih a si. Russia ralbawi pawl Kawlram a thli tein tlawng ding in an itimhmi thawngpang a chuak ruangah ralhrang ralbawi pawl checkhliatnak le tlaih tiang an tong cang.

Nvember 28, 2022 ni December 2, 2022 ni tiang Russian ralbawi pakhat a simi Colonel General Kim Alexey Rostislavovich le a hnu zultu pawl cu an phan lainak kong cu November 27 ni ah an passport pawl le hmanthlak pawl cu social media ah tarlang a si.

November 29, 2022 ni ah ralhrang lubik Min Aung HLaing nih Russian ralbawi Colonel General Kim Alexey Rostislavovich le a hnu zultu pawl cu Russia le Kawlram ralkap le cawlcanghnak kong an ceihkhan lai, tiah thawngpang theih a si. Russia ralbawi pawl don dingin timhtuahnak a ngeihmi hna ralhrang ralbawi pawl cu biahalnak an tuah hna, tiah theih a si.

Ralhrang ralbawi cheukhat cu tlaih an tong ve. Aruang cu Russian ralbawi pawl passport le minung cazin pawl cu fiang taktak in social media ah langhter a si. Zeiruangah Russia ralbawi pawl khualtlawnnak kong thawngpang theih khawh a si timi ah ralhrang ralbawi lila nih hi biathli hi an phuan, tiah zumhlonak a tam ngai ngai.

Russia ralbawi pawl cu ral kong he pehtlai in ralbawi 30 hrawng Kawlram tlawng ding le zarhkhat dengmang an cam lai, tiah theih a si. Russia ralbawi pawl cu December 2, 2022 ni ah Nay Pyi Taw khualipi in Russia ram lei ah an kir than te lai, tiah thawngpang theih a si. Min Aung Hliang nih Russia ralbawi pawl cu special vanlawng bak in a tlunkalnak vialte le an kir leinak le Nay Pyi Taw an thutumnak tiang in tuanvo an lak hna lai, tiah thawngpang theih a si.

November 28, 2022 ni in December 2, 2022 ni tiang Kawlram chung a tlawng dingmi Russia ralbawi pawl hna minung 16 hna cu Hilton Nay Pyi Taw Hotel ah an tlung lai, tiah thawngpang theih a si. Russia rabawi minung 16 hna cu: 1. Mr.Alexey KIM(ရုရှားစစ်ဗိုလ်ချုပ်), 2. Mr.Sergey VOROZHINTSEV, 3. Mr.Kirill MOROZ, 4. Mr.Evgenii VEBER, 6. Mr.Dmitrii POPOV, 7. Mr-Vitalii SHILKOV, 8. MrSergey GARBUZOV, 9. Mr.Mikhail YERMOLAEV, 10. Ms.Anastasia SOKOLOVA, 11. Mr.Roman NAZAROV, 12. Mr.Aleksandr VLASENKO, 13. Mr.Aleksandr BASOV, 14. Mr.Alexander DEGTEV, 15. Mr.Sergey SARATOV, 16. Mr.Aleksei RIABOV hna an si, tiah thawngpang theih a si.

Russia ralbawi Colonel General Mr. Alexey Kim le Min Aung Hlaing hna cu November 29, 2022 ni ah Kawlram ralhrang le Russia ralkap pawl hmunkhat teah riantuanti ding le ngandamnak lei, Fimthiamnak lei le ralkap le fimthiamnak vialte cu kan tuanti lai. Cun, Kawl ralhrang pawl cu Russia ram ah ralkap lei fimthiamnak cawn dingah kuat a si lainak kong hnatlaknak an ngeih, theih a si.

Ralhrang kuttang ah riantuantu vialte pawl ralkap le zung riantuantu hna nawl peknak tel loin ramri na lonh sual i, PDF hriamtlai phu nih an i tlaih hna ahcun tuanvo kan i la hna lai lo pinah dantatnak kan in pek hna lai, tiah Naypyidaw Ralhrang thawngzam zung nih thawngthanhnak an tuah.

Avoi khatnak October 13 ni ah zung riantuantu vialte khualtlawng lo ding le khual nan tlawng ahcun nawl zulh dingmi pawl chuak a rak si. Pakhatnak ah Ralhrang kuttang riantuantu vialte, rian kong he pehtlai in khualtlawng na hau ahcun uniform tein le phungning tein khualtlawng ding le ralkap, Palik check gate hna ah nawlhalnak tuah hnu lawngah kal khawh a si lai.

Pahnihnak ah miharsat pawl bawmhchan dingah khualtlawng na hau ahcun uniform tha tein na hruk lai i, zung riantuannak ID Card pawl nan i ken pinah zung riantuannak documents pawl nan ken lai. Cun, na phone chungah zung riantuantu na sinak tehte hmanthlak le catlap pawl chiah lo dingin theihter nan si.

Atu ralhrang nih theihternak a tuahmi na zulh khawh lo ahcun ralkap na si zongah, zung riantuantu na si zongah PDF hriamtlai phu pawl nih an i tlaih hna ah siseh, an i thah hna ah siseh ralhrang bawmhchantu bawmh nan hal hna, tiah thawngpang kan theih. PDF hriamtlai phu nih an i thah zong ah siseh, tlaih zong ah siseh tuanvo kan in la hna lai lo i, dantat chap na si lai.

Min Aung Hlaing nih a kuttang zung riantuantu vialte le ralkap le palik tiang hi bantuk in thawngthanhnak an tuahmi hi khuaruahhar ngaingai a si ko. Aruang cu mipi he khualtlawng tikah i theihthiam dingah ralrinnak an pek hna maw a si hnga.

SAC Nih An Cawkmi JF-17 Thunder A Chambaunak A Tam! SAC nih China le Pakistan ah an cawkmi raldohnak vanlawng JF-17 Thunder cu chambaunak tampi a ngei tiah SAC vanralkap lei hlatthlaitu hna nih an chim. A chung i electronic thilri vialte a tlaitu (control) Computer nih an kahnak ding hmun tuaktan aa palh lengmang ti a si. Zeidang a chambaunak zong a um len.

JF-17 Thunder he pehtlai in SAC vanralkap lei thiamsang hna nih an tuahremh khawh lomi buainak cu vanlawng seh (engine), vanlawng a pum (fuselage) le vanlawng caah a herhmi thilri dangdang hna cawknak kong a si.

JF-17 hi Pakistan ram i Aeronautical Complex le China ram i Chengdu Aerospace Corporation hna nih i bawm in an sermi a si. JF-17 sernak ah China sermi vanlawng thilri hna pin ah ramdang thilri zong an hman. A seh cu Russia ser Kalimov RD-93 a si i suimilam 700 chung lawng a deihmi a si.

A seh a ṭhat lo caah meng 10 rawng a zuan ah a khu cu an nak dih, cun ṭha tein Aerobatic Maneuver (tanglei ah rang taktak in zuan, mupi nih ar a cawi i a zuanhnawh bantuk khi) a tuah kho lo ti a si. Sangpiin a zuan tikah China nih an sermi a pum (fuselage/a thla le a mei tel lo) cu kehkuai/rawh an i tim. A chambau biknak cu a thla (wingtips) le hriamnam an bunhnak (hardpoints) a si tiah theih a si.

JF-17 cu a ti (oil) a dih a fawi i vanlei kahdohnak a tuah lioah a ti rawnpiak a hau phun khi a si. SAC vanralkap nih zuan pah in ti rawnpiaktu Tanker vanlawng an ngeih lo caah JF-17 hi a zuan pah in a ti rawn hau seh law an rawn kho lai lo tiah SAC vanralkap lei hlathlaitu hna nih cun an chim.

JF-17 ahhin Medium-range Ballistic Missile, Air-to-air Missile, 80 Millimeter Rocket, 240 Millimeter Rocket le Pond 500 a ritmi bomb bunh/hman khawh a si. Asinain cu bantuk hriamnam cu China sin in an cawk khawh lo caah Pakistan sinah a thli tein SAC nih an cawk tiah theih a si.

Cun nitlaklei ram hna sin in an cawk i JF-17 sernak an hmanmi electronic thilri hna cu SAC nih nawlngeihnak an lak hnuah cun an caw kho ti lo. EU nih SAC cu phihkharnak a tuah caah JF-17 he aa pehtlaimi electronic thilri hna an cawk khawh ti lonak a si. Cucaah tangka tampi dih in an cawkmi JF-17 cu SAC nih an duhning in an hmang kho lo tiah theih a si.

JF-17 a chambaunak zohfel dingin Pakistan in vanlawng lei thiamsang hna cu Myanmar ah a thli tein voihnih an kal cang tiah Indian Journalist minthang De Parjan Roy Chandree nih Economist Times ah a ṭial. Myanmar ralkap nih JF-17 cawk dingin 2016 ah China he hnatlaknak an rak ngei cang i vawleicung ah JF-17 a caw hmasabik ram a si. JF-17 pakhat ah US Dollar nuai 25 a si. Cawk an timh zat cu 16 a si i 2018 ah 6 a phan. A tangmi 10 kong hi fiangin theih a si rih lo. Credit: Salai CP Lian

SAC Nih Tuluk Ser FTC 2000 G Fighter An Cawk I Namsan Khua A Phanhnak Kong Thawngpang A Len Caah Ṭuanvo Ngeitu Checkhlatnak An Tuah Hna. SAC nih Tuluk ser FTC 2000 G Fighter 6 an cawk i Namsan vanlawng headquarters a phanhnak kong cu, Khit Thit Media nih a luancia November 22 ah an rak langhter. Cuti thawngpang a len ruangah vanlawng lei ṭuanvo ngeitu hna cu SAC nih checkhlatnak an tuah hna, tiah theih a si.

“Namsan vanlawng tual ah Fighter 6 a phanhnak kong thawngpang a len ruangah Min Aung Hlaing a umnak zung nih Namsan vanlawng headquarters uktu pa cu an sik, cu caah headquarters uktu pa nih vanlawng lei ṭuanvo ngeitu hna cu checkhlatnak a tuah chin ve hna pinah an phone zong a checkpiak dih hna,” tiah SAC ralkap vanlawng lei rianṭuantu hna sinin theih a si.

SAC nih Tuluk ser FTC 2000 G Fighter 6 an cawkmi cu atu le atu training an tuah i a ra laimi December 15 SAC vanlei ralkap hna nih an tuahmi puai ah hmuksaknak an tuah te lai, tiah theih a si. Mi ram dang he Kai tu la ti ruam in Jet fighter le Miakpi lawng hi a caw le Jet Fighter le Miakpi nih teinak chuahpi lo e chuahpi sehlaw Vietnam ral ah US a mualpho hnga loh US pi hmanh a mual rak pho khah.

Myaungmya Hluttaw Palai U Wai Lin Aung Cu Kum 26 Thongthlak Ding In Biakhiahnak An Tuahpiak. A luancia kum 2021, December thla lio Kayin ramkulh Laykaekaw Myotit ah tlaihkhih a rak tongmi Myaungmya pyituh hluttaw palai U Wai Lin Aung cu Myawaddy pengkomh biaceihzung nih kum 26 thongthlak ding in nihin November 28 ah biakhiahnak an tuahpiak tiah theih a si.

U Wai Lin Aung cu SAC ralkap nih a luancia 2021, December 14 ah Laykaekaw Myotit ah an rak tlaih i, poh-mah 52(a), 50(a), 50(j) le poh-mah 122 tiin tazacuai a tongmi a si. Pyituh Hluttaw palai si mi U Wai Lin Aung cu tlaihkhih a ton kum khat a rauh hnu ah a tu bantuk in kum 26 thong thlak ding in biakhiahnak an tuahpiak hi a si.

U Wai Lin Aung cu hluttaw palai a si hlan ah Myaungmya Ga-yu-na-shin(ကရုဏာရှင်) mi bawmhchanhnak phu dirhtu a si i, 2020 thimnak lio ah NLD palai in pyituh hluttaw palai a tlingmi a si.

Taze Peng Ah SAC Ralkap Nih Tualchung Mi Inn An Khangh Caah Inn 150 Hrawng A Ciam. Sagaing ramṭhen, Taze peng chaklei ah a ummi Htanpin Seih(ထန်းပင်ဆိပ်) khua ah SAC ralkap hna cu nizan November 27 chun ah rallam an sial i voithum tiang inn an khangh, tiah theih a si.

Htanpin Seih khua cu SAC ralkap nih atu le atu an pal tawnnak khua a si i a hlan zong ah voihnih tiang an rak khangh bal cang. Atu a voithumnak an khangh caah a khua ning in a ciam ti tluk a si ko, tiah tualchung mi hna nih an chim.

“A voithumnak an khanghmi ah hin inn tam tuk a ciam. Va phalh kan duh ko nain SAC ralkap le pyusawhti an um caah kan kal ngam lo. Pyusawhti hi tualchung mi lawngte an si i anmah nih SAC ralkap pawl cu lam an hmuhsak hna,” tiah tualchung mi pakhat nih a chim.

SAC ralkap nih Htanpin Seih khua cu a voithumnak an khangh caah inn 150 hrawng a ciam kho, tiah tualchung mi hna sinin theih a si. Ralhrial bawmchantu pakhat nih,” Htanpin Seih khuami hna cu ralhrial in a himnak hmun ah an i dor. An khua ah an kir ngam rih hna lo. Umnak hmun serisiam piak an hau lai,” tiah a chim.

ZinKyaik Khua Ah Uihrut Nih Ngakchia 10 Telh In Minung 11 A Seh Hna. Mon ramkulh, Zinkyaik(ဇင်းကျိုက်) khua Falat sang ah uihrut nih ngakchia 10 telh in minung 11 a seh hna caah hliamhma an pu, tiah theih a si. November 27 zing sml 9:00 hrawngah Falat sang um Kong Htauk(ကုန်ထုတ်) hlei pawng ummi uihrut pakhat nih lam ah ai chawkmi le ngakchia 10 telh in minung 11 a seh hna, tiah tualchung mi hna sinin theih a si.

“Uihrut nih ngakchia nu a hmai ah a seh dih hnuah a zam i inn chungah a ummi zong a va seh hna. Bazar zong ah a va lut i mi a seh hna pinah Khalauk Ing(ခလောက်အင်း) sang a ummi pakhat zong a seh,” tiah tualchung mi pakhat nih a chim.

Uihrut nih ngakchia 10 le upa pakhat a seh hna i an hmai, an ke le an baan ah a seh hna, tiah theih a si. A luancia September 11 lio zong ah Paung peng Pankone khua in Zinkyaik khua lei ah a zammi uihrut pakhat nih, ai chawkmi le inn chungah a ummi minung 20 leng a rak seh bal cang hna, tiah theih a si. Credit: The Chin Post