Breaking News: Tun Myat Naing nih ralhrang phu ralrinnak a pek hna!

Raltuknak in tawlrel a si te lai tiah AA nih SAC ralrinnak a pek
========
Arakan Army (AA) uknak le biaceihnak nawl leng ah Isalam biaktu pawl le dai tein kan um khawhnak hnga kan rianṭuannak pawl cu hramhram in uknak a latu SAC nih hnahnawhnak a pek caah kahdohnak in tawlrel a si te lai tiah AA in biachimnak nawl a ngeitu Khiang Thukha nih April 5 Press Conference ah a chim.

Kyaukpho, Yanbye le Taungkot ah a ummi Rakhine biaceihnak zung pawnghrawng ah SAC ralkap nih thirii kawl in hnahnawhnak le raltuknak lei cawlcanghnak an tuah bantuk in AA biaceihzung ah phuan a simi sualnak pawl cu SAC biaceihzung ah phuan ding in hnek le tlerhnak hna an tuah tiah a chim.

A tu bantuk thiltuah hi a tu thil sining kha a daihter lo i AA le mipi karlak zumhnak zong a hrawh tiah AA in biachimnak nawl a ngeitu Khiang Tukha nih a chim. Culawng si loin, hramhram uknak a latu SAC nih Rakhine ram chungah ralkap thazang, hriam thazang le eidin hna a chap lengmang tiah a chim.

AA biaceihzung ah phuan a simi sualnak cu 2021 in 2022 March thla tiangah 5,680 leng a um i mah chungah sualnak 2,900 cu tawlrel khawh a si cang tiah Press Conference in theih a si.

Ramkhel lei biaruahnak hi SAC nih a al kho lai lo tiah kahdaih phu nih an chim. Myanmar ram ah hramhram in uknak lak a si ruangah a phichuak a simi ramkel lei buainak tawlrelding ramkhel lei biaruahnak cu SAC nih a al kho lo tiah ram pumpi kahdaihhnak (NCA) ah min a thumi tlangcung hriamtlai phu pawl nih April 4 an an chim.

NCA ah min a thumi tlangcung hriamtlai hruaitu pawl i tonnak cu March 29 in April 3 tiang an rak tuah. I tonnak a dihhnu online in Press Conference an tuahmi ah misual phu tiah a thanhmi NUG le PDF pawl he biaruahnak a ngei te lai tiah Peace Process Steering Team (PPST) in biachimnak nawl a ngeitu ralkap Myo Win nih a chim.

“Misual phu pawl he bia kan i ruah lai lo timi hi daihnak he aa pehtlaimi phu pawl nawl a si ko. Kan zumhmi cu mipi pawl ca ruat chih in zeibantuk phu hmanh nikhat khat cun cabuai cung phan in biaruah a si hrimhrim te lai”. Asinain, zeitik caan dah a si te lai timi cu chim khawh a si rih lo tiah ralkap Myo Win nih a chim. A tulio caan hi cu biaruah dingah a har ngai rih lai tiah a chim.

SAC Chairman Min Aung Hlaing nih misual phu he biaruah loin kan hrawh dih hna lai tiah March 27 ah a chim.
Kahdaihnak phu hruaitu pawl i tonnak cu a tulio ramkhel lei a buainak tawlrelding ah ramkhel lam in kalpiding in biakhiahnak an ngei. NCA ah min a thumi KNU le CNF cu i tonnak ah an kai lo tiah theih a si.

March thla chungah KNU le SAC ralkap karlak ah kahdohnak voi 500 leng a chuak. Karen National Union (KNU) nih a tlaihnak hmunhma ah SAC ralkap le KNU karlak ah kahdohnak voi 500 leng a chuak. Cu kahdohnak ahcun, SAC ralkap 419 an thi tiah KNU Headquarter nih April 5 ah thawng a thanh.

Karen National Liberation Army (KNLA), Karen National Defense Organization (KNDO) le SAC ralkap, Boarder Guard Force (BGF) karlak ah nifatin kahdohnak a chuak tiah theih a si. Kahdohnak ruangah KNLA le KNDO in ralkap 22 an thi i 35 nih hliamhma an tuar tiah KNU cathanhnak in theih a si. KNU hmunhma chung kahdohnak ruangah himnak ah a zaammi mipi sing khat deng an si tiah theih a si. Credit: The Chinland Post

Be the first to comment

Leave a Reply

Your email address will not be published.


*