C. Ronaldo cu Saudi Club Al Nassr ah ai tthial!

C. Ronaldo cu Saudi Club Al Nassr ah ai tthial
——–
Vawlei pumpululh chuih thiam Crisitano Ronaldo cu a umnak Man U in Saudi club a simi Al Nassr ah ai tthial tiah theih a si. Al Nassr club nih hin Ronaldo cu kum khat ah hlawh Dollar 214million pek ding in biakamnak minsen an thut cang. Cucaah Ronaldo cu pumpululh chuih thiam vialte lakah hlawh sangbik a si. Amah tluk in hlawh sang a hmu mi an um rih lo ti a si. Ronaldo cu kum khat ah Euro million 200 hlawh ding in Saudi Arabia club ah ai zuar cang.

“Power”; Kan hnu thla ahkhan “Power” kong an tialmi cauk pakhat ka rel. Abik in cu cauk ahcun power cu strategy a thami le technology a sangmi nih an tuam tikah power ciocio ah a tthawngbik ah aa chuah, an ti. Example ah catialtu nih Mirang ralkap tlawmte nih India milu tampi an laknak te hna kha a lak.

Ukraine hi minung nih pekmi bawmhnak a hmuhmi dollar in sang 1,000 leng a si cang tiah VOA nih nai ah khan a chim. Cucu a ram nih a bawmhmi phaisa pawl kha aa tel rih lo, ti a si. Myanmar ram zong ahcun mipi dothlennak kan tuahmi ah NUG nih a hmuh cangmi cu dollar sang 56 a si, an ti.

Nain, NUG sin si lo in direct in an miphun hna sinah kuat a simi phaisa kha a tam ve ngai ca ah tuaknak in kan tuak chunh tikah Myanmar dothlennak ah sang 100 leng cu a chuak ko lai, tiah ti khawh a si. Cucu stretagy le technology nih a hun bawmh cun power a tthawngmi cu a si kho ve.

Ram thangcho ngakchia pawl khi na chunmang zeidah a si tiah kherhhlainak an tuah tik hna ah an chimbik cu youtuber, blogger, influencer ti bantuk an si. Mi influence tuah i (SNS ah follower tampi ngeih), phaisa hmuh kha strategy tha ngai a si.

Phundang in data ngei nih ram siloah vawlei an hruai te lai an timi phun kha a si ko rua. Atak vawlei ah kan zoh tikah vawleicung follower a ngeibik hi Ronaldo le Selena Gome an si, an rak ti tawn. Cu hna nih thil pakhatkhat an caw ngia tikah chikkhat te ah an manh colh ti a si. Example, Ronaldo cu Alnassr FC nih kan cawk an ti bak in suimilaam 24 hlan ah follwer sing 8 fai in sang 2 a lonh.

Cu a si tikah, power kan timi hi chan nih tampi a thlen lengmang ko. Cu power cu data nih a tuam chih tikah khuaruah har in a ngan ti khawh a si. Vawlei ngeih chan, Sehzung ngeih chan, Company ngeih chan in data ngeih tin chan aa thlen lioah nang zeitin naa thlen ve rak ruat ve ding kan sawm. Alnassr cu Ronaldo an cawk khawh ca ah an rum luaimai chin lai.
Hmanthlak: Ronaldo i a hmuhding phaisa. The Chan, Seoul, December.

Be the first to comment

Leave a Reply

Your email address will not be published.


*