CNF/A Camp Victoria Bomb Thlahnak Kong Ah Khonumtung Nih Bialhalnak Tuah Mi Salai Thet Ni Nih Lehnak A Tuah Mi Hna!!
==========
Bomb Thla Vanlawng Tih Ding A Si Lo, Rallei Zei Ti’n Lehrulh Si Lai Lam Tampi A Um, East Lairam, Thantlang peng, Mizoram-East Lairam ramri ah a ummi CNA/CNF hmunpi Victoria Camp cu ralhraang nih Tangkawng 10-11 ah vanlawng in bomb a thlak caah nu palek 2 telh in minung 5 an nunnak a liam. CNF/CNA hmunpi kah a sinak kong he pehtlai in CNF chimnak nawlngeitu Salai Thet Ni le Khonumtung biaruaunak kha aa tlak ning in Laica in kan rak tial.
Biahalnak, CNF hmunpi ralhraang nih vanlawng nih bomb thlakmi kong fianghlang in chim khawh a si hnga maw Bialehnak, Ralhraang nih kan umnak hmunpi voihnih bomb a kan thlak, a voikhatnak cu zaanlei suimilaam 5 ah, a voihnihnak cu zaanlei suimilaam 5 hrawng ah, a voikhatnak lio vanlawng 5 in voi 5 an thlak,
cu chung ah pakhat cu India ramchung ah a tla, hi ni ah kan nusaltha pasaltha 5 an nunnak a liam, inn cheukhat zong aa rawk, a voihnihnak cu vanlawng 3 in bomb 2 an thlak, hi ni ahhin zapi sii-inn cheukhat aa rawk, kanmah minung aa hliammi kan um lo, bomb thla vanlawng 8 nih bomb 9 an thlak.
Biahalnak, Ralhraang nih zeiruangbik ah CNF hmunpi hi a kah tiah na ruah. Bialehnak, Kanmah CNF/CNA hmunpi an kan kah ti cu aa fiang ko. Anmah an i tinhmi zong a si, an i tinhmi chungah tukum ah thimnak tuah ding an i tim, ramdaihnak ser hnuah thimnak tuah, cuchung ah hnahnawhnak pe kho tu ding tualchung hriamtlai cu a huat hna. A bikin tualchung hriamtlai bawmchantu kanmah umnak hmunpi cu bomb in a thlaknak a si, a ruang tampi lakah pakhat a si.
Biahalnak, CNF hmunpi tiang ralhraang nih kah a si tikah CNF nih zei ti lei hoih in dah lehrulh nan timh? Bialehnak, Kan nih cun tuan bantukin kan si khawhtawk kan ngeihchun hriamnam in lehrulh a si ko, bomb thla vanlawng rat zongah, zei a rat zingah kan ngeihmi hriamnam in kan si khawh zong si khawh lo zongah kan ti khawhtawk in kan lehrulh lai.
Bomb thla vanlawng a rat zongah fak tuk in tih ding a si lo, rallei zei ti’n kan lehrulh lai timi lam tampi a um. Kan duhherhmi ralhraang uknak phung hrawh, Federal ramkomh ser khawhnak caah a donghnak kan doh lai, a dang tlangcung hriamtlai hna, tualchung hriamtlai hna, NUG cozah telh in kan dihlak fonh in a dihdongh tiang kan doh lai.
Biahalnak, Ralhrang nih kahmi bomb India ram ah a tla i a va puak, hi kongah India nih zeihmanh chimrelmi a ngei lo, hi kongah ralhraang le India cozah an i pehtlaihnak zei bantuk dah a si.
Bialehnak, Si an kahmi bomb pakhat India ram ah a tla, hi a tla hnu ni ah India ralkap 7/8 an rak tum i an Confirm, India Centre cozah nih zei ti’n a tuah lai kan thei lo.
Asinain pakhat a ummi cu India cu Democracy cozah a si pek ah, ralhraang he an i pehtlaihnak a um, hi ram pahnih ramri ah a ummi tlangcung hriamtlai cu miphun hriamtlai khat le khat i pekchanhnak, tankhatnak, i funtomnak tiah hriam an tlai peng.
Cun pakhat ngaihchia ngai a si mi cu ralhraang hriamnam a bawmh peng rih, India cozah i an Policy hi hnuaphnap Policy a si lo, tlangcung hriamtlai le pau dohthlennak ah fiang te’n a lungfim, asinain ralhraang he hawikomhnak a ngeih pengmi cu ngaihchia ngai a si.
Biahalnak, A dang zeidah chim na duhmi? Bialehnak, Ralhrang nih zapi zong hual lo in bomb thla vanlawng in tu bantuk hruhru hranghrang a tuahmi hi ral phunglam a buar, zapi hnorsuang dingin a tuahmi nih zapi lungthin a thangh. Zapi nih duhmi zong ralhraang thlak a si, zei a tuah ah zapi an dai lai lo, zapi he hmunkhat ah kutsih in kan doh lai. Crd-The Lairam Times
Myanmar Buainak Bantuk In Ramchung Buainak Cu Tangrualti Lo Ahcun Zeitik Hmanh Ah Teinak Hmuh A Si Lai Lo- ASEAN Secretary General thar Dr. Kao Kim Hourn, Myanmar buainak bantuk in ramchung ning cang lonak pawl cu tangrualti lo ahcun zeibantuk teinak hmanh hmuh a si lai lo, tiah ASEAN Secretary General thar Dr. Kao Kim Hourn nih ralring a peek.
A luancia chungah ASEAN Secretary General cohlan sunhlawihnak ah ASEAN Secretary General thar Cambodian Prime Minister’s Special Representative term hnih a tuan mi, Dr. Kao Kim Hourn nih a chimh mi kong he pehtlai in NHK thawngzamh nih a langhter.
Myanmar kongkau telin ramchung buainak pawl cu tlaih khawh nakhnga ding caah tangrualti cio ding zongin ASEAN Secretary General thar Dr. Kao Kim Hourn nih ASEAN ram phu chung tel hna cu ralring a peek hna, tiah theih a si.
ASEAN ii a biapi bik mi tuanbia cahmai thar nih zuamcawk nak vialte le Opportunities pawl telin aiawhtu a simi buainak vialte a langhtertu a si te lai, ti zongin a chim.
ASEAN Secretary General thar rian khinhnak cu January ni 9, Indonesia ram, Jakarta khualipi chungah a um mi ASEAN Head Office ah an tuah, tiah kan theih.
Yesagyo Lah Wah Kah Zung Cu PDF Nih An Khangh, Zung Rianṭuantu 4 Nih CDM Kan Tuah Lai An Ti Caah An Thlah Ṭhan Hna, Magway ramṭhen, Yesagyo peng Lah Wah Kah zung ah kan lut i zung rianṭuantu 4 cu kan tlaih hna i CDM kan tuah lai an kan ti caah kan thlah ṭhan hna. Zung cu mei in kan khangh dih, tiah PDF ralkap pakhat nih a chim.
Nihin January 12 zinglei ah Yesagyo Pah Kah Phah le PDF Guerrilla phu hna cu Yesagyo peng Lah Wah Kah zung chungah an lut. NRC register aa tuahmi hna cu ngunkhuai tampi an khawlh hna pinah SAC nih thimnak an tuah dingmi ah vote cazin zong an khawmh caah zung cu an khangh, tiah theih a si.
Mizapi zong nih lih le hrokhrol in thimnak tuah aa tim mi SAC he rianṭuan lo ding le vote pek lo dingin Yesagyo Pah Kah Phah nih forhfialnak an tuah hna, tiah theih a si. Crd-The Chin Post
January 11 ah Camp Victoria kah kong ah ngaihchiatnak a langhtermi, dawr a ong lomi pawl cu SAC ralhrang nih an dawr hmaika ah dawrkharnak ca an tarpiak hna.
Dawr a kharmi dawrngeitu tampi zong palik sakhaan ah an kalpi hna i, atu tiang an thlah hna le thlah hna lo kan thei kho rih lo.
Dawr hmai ah an tarpiakmi hna ca belte hi Dawr khar kong he pehtlaihnak a ngei lomi a si. “Sualnak a tuahmi ralhrang pakhat dornak nawl an pek ruang ah…” tiah aa tial. Cucu aa pehtlai lomi a si.
Camp Victoria kah ton kong ah Chin hriamtlai bu hna nih cathanh an chuah cio hna, January 10 le 11 ah SAC ralhrang nih CNF Headquarters Camp Victoria cu vanlawng in an kah caah miphun ralkap 5 nunnak a liam bang in Camp chung si-inn le innlo tampi an rawkral.
Cu kong he pehtlai cun Chin ramkulh chung ah a ummi hriamtlai bu cheukhat nih ngaihchiat pinak le tuarpinak cathanh an chuah hna i Chin hriamtlai bu pawl tangrual in fak chinchin in SAC ralhrang kan doh lai, tiah an lungput an langter hna.
A tanglei cathanh pawl hi CDF-Mindat, CDF-Zophei, CDF-Lautu, Zomi Federal Union le CDF-Zotung nih an chuahmi an si hna. A dang hriamtlai bu cathanh kan hrelhmi a um cun Chatbox ah kan kua te u tiah kan i nawl hna. Crd-chinjournal
Falam Peng Le Upper Chindwin Hmun Chungah Thimnak Tuah Lo Dingin CNDF Nih Cathanh Chuah, Chin National Defense Force (CNDF) a voihnihnak tonpumhnak meeting cu Camp Rihli, Chinram ah an tuah i minung 90 hrawng an kai hna, tiah theih a si.
January 6-9 tiang tuahmi CNDF tonpumhnak meeting cu CNDF Headquaters(War Office) ah an tuah i, CNO Defense Council, War Office le Brigade 4 in aiawhtu 60 le ngiathlaitu 30 hrawng an kai hna, tiah theih a si. Cu tonpumhnak ah CNDF ah a ummi department, Battalion le Brigade kip cio nih kum khat chung an cawlcang ning, thil an ṭuanchuah mi le tangka an hmannak kong zong chimh fiannak an ngei hna, tiah theih a si.
Zulh phung le ralkap nih zulh dingmi he pehtlai in Brigade biaceih zung, War Office biaceih zung le Defense Council biaceih zung tiin an ṭhen hna, tiah theih a si.
Chinmi hna a that i inn le lo an khangh pinah Vanlawng in bomb a thlatu ralhrang SAC nih tuahtimh mi thimnak ah Chin ramkulh, Falam peng le Upper Chindwin hmunram tiang tuah lo dingin CNO/CNDF nih kan kham. Thimnak a zalon khawhnak dingah bawmchantu zong dan kan in tat hna lai tiah an langhter.
CNO/CNDF nih ralhrang a hram in bongh ding le Federal Democracy hmuh khawh nakding ah hriamtlai phu hna he hmunkhat tein a dongh tiang ral kan tu lai, tiah cathanh an chuah.
Nunnak A Liammi Chin Ralkap CNA Hna Ca ah Yaw Hmunram Ah Thlacamnak An Ngei, Chinram le India ram ramri ah a ummi CNF/CNA Headquaters, Camp Victoria cu SAC Jet Fighter nih bomb in an thlak ruangah CNA ralkap 5 an nunnak a liam.Nunnak a liammi CNA ralkap hna ca ah Yaw hmunram ah thlacamnak an tuah, tiah The Youth Force- Saw& Kyaukhtu sinin theih a si.
January 11 zan sml 10:00 hrawngah Yaw hmunram ah Chin, Kawl le Yawmi hna i fonh in nunnak a liam mi CNA ralkap 5 hna ca ah thlacamnak an ngei. Kabar Magye(ကမ္ဘာ မကြေ ) hla zong hmunkhat ah an sa i hramhram uknak duhlonak zong an au, tiah theih a si.
Cu thlacamnak hmun ah Gangaw Pengkomh Battalion 13, The Youth Force- Saw& Kyaukhtu ralkap hna nih thla a cammi hna cu humhimnak an lakpiak hna, tiah theih a si. KNLA le PDF fonh nih ralhrang 7 an thah hna, Bago ramtthen ah KNLA ttangtti phu nih SAC ralhrang minung 7 an thah hna tiah theih a si.
January 8 zing slm 5:30am hrawng in KNLA le PDF fonh nih SAC ralhrang pawl an kah hna. Sml 8:30am tiang bak fak ngai in an i kap. Cu kahdohnak ah cun ralhrang minung 7 an thi i an ruak cu nizaan ceo ah khan an vui khawh hna.
Ralhrang le an chungkhar pawl cu ttihnak in an khat cang i atu hi lengzongah an chuak ngam lo. Bomb khur an i cawh mi ah a rawl ai chumh i a riak colh mi zong an um hna tiah theih a si. Athi mi ralhrang hna hi thilri le riahcaw chantu an si hna tiah an langhter chap.
Miphun dawtu 5 bak an nunnak a liam cu ka lung afak hringhran ko, celh ding khi asi lo. An nulepa an ngaihchiat tuk lai ning, fanu fapa dawt an kut hmanh tlaih ta manh loin pum tlek dih tiang an nunnak a liam a fah cu dah. Zeitik tiang hen kan miphun nih hibantuk ngaihchiat aihramnak hi kan tuar rih te hnga?
Hiti an nunnak a liam nak hnga lo keimah pate nih zeidah ka tuah khawh ve, zeidah ka tuah ve ah dah a that bik lai? tiah lam ka kal pah zong in thla ka cam tawn. Phaisa ka ngeihmi vialte le Laimi ngeihmi phaisa dihlak hmanh khi hlut dih siseh law ‘khu a dawi khomi jet vanlawng kahnak’ cu kan cawk kho ding a si maw timi fak piin ka tuak.
Nain, ramdang cozah nih full in a kan bawmh i ral a kan tukpi lawng ah a si kho lai timi fiang tein ka theih fawn. Van ral ven khawh loin rampi ralkap doh cu a dohtu nunnak caah tih a nung tuk, thazaang pek awk a si bak lo, ka thlauh hna awk a si tihi kei ka nuhrin thluak nih a tuak khawhmi a si. Zeitik caan poah ah a cung in khawika hmun poah bomb a kan thlak khawh ko cu ta.
Ka ngakchiat lio ka upa ai velh caan ah ka nulepa nih cun ‘i velh hlah, an in nek zong ah hrial ko hna, na tei zong na sungh zong ah na taksa lehlam a fak, zei a thahnem lo, kanmah zong kan lung aa nuam kho lo’ tiah an rak thlauh tawn.
A dawtu a hawile cheukhat nih cun thazaang an pek i an bawmh ve, nain cheukhat nih cun i velh zoh duh men ah thazaang an rak pek ve. A thlauhtu nulepa cu velh zoh a duhmi pawl nih an huat ngai hna, an fa an dawt lo tiah an ruat caah asi hnga maw dik?
Kei zong nih cun ka miphun unau kan dawt tuk ve hna i MAH bomb le a hriamnam in nan nunnak a liam ding ka duh lo caah raltuk kan thlauh lengmang ve hna. Kan dawt hna nak hi nan i fiang kho lai lo, nan ral ah nan ka ruah lai i thah zong nan ka timh lai ka theih cia buin i sum kho loin ‘pakhat nunnak tal ka khamh kho hnga maw’ tiin ka tial lengmang nak a si — keimah pumpak caah cun zei thahnemnak pelte zong a um lo, huat le thah ding tlerh kai huahmi lawng hi a si ko. Rest In Peace, miphun dawtu hna. Crd-Salai Lungthli Tum
Leave a Reply