Cangvatfa maw na si Krifa dah na si

Parasite lungput (Cangvat fa maw Khrihfa)

Vulei cung a nung mi saram phun lak ah mi thi dawp le mi bochan lawng i a nung kho mi Saram phun an um i cucu Parasite an ti hna. Cucu Hrik, Tthah, Khukrul, Liit, cangvut, Safe… tibantuk pawl khi an si. Midang thi dawp awk a um lo ah cun an thi ko.

Minung lak ah hin Parasite lungput a ngei mi um khawh asi ve. Mah te in kutke ngeih i tim lo i mi dang bochan i nun ai tim peng mi pawl khi an si. An khuaruahmi a sang cem cu aho thi dah ka dawp khawh cem lai, aho nih dah benefit tambik a ka peek khawh lai i kai miak cem lai, ka zang a awl lai i ka tha a dam lai ti lawnglawng kha an ruat ko. Midang bochan ding ttha an i hmuh si le an nun a nuam an si a ttha i midang bochan ding reprai an ngeih lo si le an sining nih a theih thluahmah colh ve. Cu bantuk cu parasite lungput cu asi.

Kan Bible chung ah cun Paul hmanh nih midang nih an kan holh chuah nak hnga lo kan kut te in rian kan ttuan i cu ti cun Thawngttha karh ter nak hi kan ttuan e ati kha. Atu kan um nak ram cio ah hin an Benefit Card hmai hngal ngai i a hmang mi karlak ah hin pitar putar te te benefit card voikhat hmanh a hmang bal lo mi nih coupon te te an khon i cu cu cashier counter ah sivang le awlokchong in kan hngah tawn hna khi a tong mi kan tampi ko lai. An nih cu a lak i peek mi benefit ngah hi a phung ah an rel lo. Kan dam ko kan cawl cangh khawh ko ah cun “A chia” ti phun khin an duh lo hrim hrim. Goverment lockdown an tuah caan ah senators pawl cozah rian ttuan pawl tangka an peek mi hna khi a tam u nih cun an la duh lo. An laak hmanh ah an hluut dih. Kan mah te i ttuan chuah lomi ei hi kan nunphung asi lo an ti.

Ruah a hau mi cu atu kan khua kan ram nih thil a ton mi le ramleng khuasa kan khuasak umtuning pawl hi asi. Zei thei lo kan i lawh ter i kan mah miakmai nak ah cun kan fimzir in kan ral a ttha taktak. Cozah nih ngamh loding an ti mi kan zei apoi lo. Benefit hmuh tam le hmuh thiam kha tthawn le thil ti khawh ah kan rel i a poinak cu hi bantuk lungput hi kan miphun lungput le hibantuk nun hi kan nunphung ah an kan ruah piak phah cang mi hi asi. Dam ko bu i thih tiang benefit ei ai ti mi kan tam tuk. Hi hi kan nunphung zong asi chih phah cang. Zeicaah ti ah saupi nunpi mi poh cu duh zong duh lo zong ah nunphung ah rel piak kan si ko cang.

Kan Bible chung ah cun nan lungput cu Khrih nih arak ngeih mi lungput kha si seh ati ti asi i cucu kan uar ngai cio, kan byheart cio hna. Asinain a taktak ah cun Parasite lungput hi kan practice mi asi.

Hi tluk faak in, zohsawh khawh lo ding tiang in kan khua kan ram kan miphun nih a tuar cuahmah lio ah TAX return hna kan van thoh cio lai i mah ca pi lawng i kan khon dupmap kan saving account hna i a luh rih ko asi ah cun kan biaknak hi kan nun in kan rak hlawt ziar khi a rak si ko. Kan nunphung ah parasite lungput hi a taktak in kan i laak diam cang ti nak asi ko.

Cangvat nih fanu pahnih a ngeih hna; pakhat nih, “Ka pe,” a ti i a dang pakhat nih, “Ka pe,” tiah a ti ve. thil pathum cim hngal lo an um; thil pali “A za cang” a ti bal lomi an um:Cu hna cu Sheol le a cingmi chul le a ti a hal zungzalmi vawlei le “A za cang,” a ti bal lomi mei an si. (Phungtluk bia 30:15)

Hi ti kan si ko ah cun Khrihfa ai timi Laimi hi Parasit cangvut fa kan si ziar ko tinak asi hnga i…

Salai. B. Cinzah

 

Be the first to comment

Leave a Reply

Your email address will not be published.


*