CDF-Hakha In Salai Van Tha Simeon (Kum 21) Nih Ram Le Miphun Caah A Nunnak a Pek Cun Min Aung Hlaing Zarhkhat Leng A

CDF-Hakha in Salai Van Tha Simeon (kum 21) nih ram le miphun caah a nunnak a pek.

Relchap:Min Aung Hlaing zarhkhat leng a tlau

Min Aung Hlaing zarhkhat leng a tlau,

Kawlram Nawlngeihnak latu Min Aung Hlaing cu 2022 February 27 , Nay Pyi Taw ah tuahmi biaknak lei puai a kai hnu in March 7 tiang mizapi hmai in a tlau.

MAH hi COVID-19 rai nih a tlunh pin ah a dang zawtnak a ngei,” tiah Social Media cahmai ah a lang pah nain fehter khawh mi thawng a si rih lo.

MAH a langhlokar ah hi amah changtu a si mi Soe Win nih meeting zong a hruai hna.

Min Aung Hlaing cu atu bantuk hin nawlngeihnak a lak 2022 February 18 in 27 tiang ni 10 chung mizapi sin in a rak tlau bal.

Relchap:Zarh khat chung ah CNA+CDF le Kawl ralkap voi 18 an i do

Zarh khat chung ah CNA le CDF fon le Kawl ralkap voi 18 an i kap, Kawl ralkap in 80 leng an thi , CNA le CDF minung 4 nih nunnak an pek ve tiang thawngthanh an chuah.

RAMRI NGEILO UNAU/MIPHUN SINAK, RAMKAU DEUHMI RAMKHEL CAWLCANGHNAK IN RAMTHAR SERNAK LAMPI

Salai Dokhar

Biahmaithi

Chin miphun tiah kan ti tik ahhin “Chin” timi min hi “Kan Unau” dihlak a kan huap khomi miphun min asi lo tiah “Chin” timi min cohlang lo tu an um. “Laimi” miphun kan ti asi zong ah “Zomi” hi “Kan Unau” dihlak a kan huap kho dingmi miphun min asi lo ti asi fawn. “Zomi”, “Mizo”, “Kuki” tbk min hna zong hi “Kan Unau” hna dihlak huap dingmi caah miphun min in chim ahcun a cohlang lotu an um thiam. Culakah, Chin miphun tiah miphun dang nih theihmi cu Myanmar ram, India ram, le Bangladesh ram hna ah International Boundary ruang ah then cio kan tong. Culawng siloin, Miphun tuanbia tialtu hna nih kan Miphun min cu tuanbia cauk ah “Min” tampi in an langhter caah kan zapi tein kan i hrawm khawhmi miphun “Min” kong ah nihin ni tiang kan buaibai rih. Sihmansehlaw, International Boundary ruangah Myanmar ram ah telhmi Chinram ummi, India ram ah telhmi Chinram ummi le Bangladesh ram ah telhmi Chinram ummi kan dihlak nih “Unau” kan si ti hi cohlan dih asi. Cucaah kan nih cu ramri ngeilo unau/ miphun pakhat sinak ah cun pumkhat kan si. Cucaah Chin miphun tiah miphun dang nih theih deuhmi kan si caah “Laimi, Zomi, Mizo tbk” hna aiawh ah “Chin” timi hi ka capar chung ah ka hman lai ti kha nawl hmasa kan duh hna.

ZEIRUANG AHDAH UNAU KAN SI NAIN MIPHUN MIN PAKHAT KAN I HRAWM KHAWH LO

Chin miphun kan tuanbia zoh tikah “Village Country” in khua a rak sami kan si i khuakip nih “Ramuk bawi” ti kan rak ngei. Langhter duhmi cu miphun huap in “ramuk bawi” kan ngei lo, “Siangpahrang” le “Democracy Cozah” zong kan ngei lo. Ram pakhat i hruainak cozah pakhat ah abiapibik tungpi pathum asi mi Phunlamsernak nawl (Legislature), Uknak nawl (executive), le Biaceihnak nawl ( Judiciary) timi vialte hi khuate kip ah rak ngei asi. Cucaah nihin nitiang ah khuamin kha miphun min bantukin a hmangmi kan um. Cun kan tuanbia zohtik ah nu khat pa khat fa pawl hmanh “Phun or Chung” min a thenmi kan si. Tahchunnak ah keihi unau pathum ngeimi sininglaw kanau “A”, ka u “B” le keimah “C” sining law. Ka te fa chan ahcun “A” chung or phun, “B” chung or phun, le “C” chung or phun tiah min kan rak i sak. Cu ti kan rak si caah Nu khat Pa khat fa hmanh nih caan a rauh deuh hnu cun “cung or phun min” a dangmi miphun kan si. Cun tlangcung ah khua sa kan si tikah khuakhat le khuakhat tlawnkai a hartuk caah “Holh” a dang cio. Hi bantuk a ruang tampi ruang ahhin Chin miphun cu nihin ni tiang ah “Unau” kan si ti kan theih buin kan Holh, Kan Min, le Kan Ram kan rak i hruai ning tuanbia hna ah papek tukin kan cawlcangh cio tik ah “Min” pakhat kan i hrawm kho lo lawng si loin kan lung aa rual kho lo. Mirang uknak in a thawk i holh a lo deuhmi le thawhkehnak a nai deuhmi paoh “tribes” cazin ah a kan chiah tik ah nihin atu cu “Tribes” thazaang a thawng thluahmah cang i “Unau” kan dihlak nih “Miphun” khat kan sinak ah “Lungrualnak” ser khawh a har peng rih. Nihin kan dirhmun zoh ahcun India ram ah telhmi Chinram um Chin miphun, Bangladesh ram ah telhmi Chin ram um Chin Miphun, le Myanmar ram ah telhmi Chin ram um Chin miphun hna hmunkhat tein ramthar ser le Miphun min pakhat i hrawm khawnak ding ah hin a lam kawl a har ngai rih ti khawh a si.

UNAU KAN SI CAAH THEN KHAWH KAN SI LO ZIA

A hlan ahcun India ram ah telhmi Chinram ah Chin miphun hna, Myanmar ram ah telhmi Chinram Chin miphun hna le Bangaladesh Ram ah telhmi Chin ram ah Chin miphun hna kar ah theihsualnak, thleidannak, i nehsawhnak le i rem lo nak tampi a rak um. Sihmansehlaw, khoika ram ummi kan si zong ah Chin miphun le kan umnak ram ah buaibainak a chuah paoh ahcun kan zapi tein thazaang kan chuah i kutsamh in kan i dirpi cio. A fiang bikmi cu atulio Myanmar ram ah ralhrang hna nih uknak hramhram in an lak tikah India, Bangladesh, U.S.A tbk ram hna ah a ummi Chinmi dihlak nih dirkamh in dohthlennak ser a si. Hi nih a langhtermi cu ramri ngeilo unau/ miphun khat kan sinak kha asi.

ZEIRUANG DAH ” NATION BUILDING ” NAK IN ” TRIBES ” THAZAANG CAK PAPEK DEUH IN KAN CHIAH?

Chin miphun hi “Unau” kan si timi paoh nih hin “Miphun Min” pakhat le zalennak tling hmumi “Ram-Country” pakhat vawlei cung hmanh ah dirh hau ve ding dirhmun kan si. Kan sining zong nih a phanh tukmi a si. Nain, nihin ni tiang ah “Unau” kan si ti tiang lawng kan cohlan khawh i India ram ah ummi ee, Myanmar ram ummi ee, Bangladesh ummi ee tiin kan lung rual kho loin chiatni thatni lawng ah “Unau” kan si timi he dawtnak kan langhter. Ramkhat ah a ummi hmanh nih kan “Tribes” sinak papek tukin kan chiah i “Miphun/Nation” kan sinak kan tlau. Hihi a ruang tampi lak ah a ruang nganbik cu Ram kan serti mi hna sin in ziaza that lo kan i lak sual a si. Tahchunnak ah Myanmar ram a ummi Chinmi cu “Burma miphun” hna nih mitam deuh an si caah an duhpaoh nehsawhnak a kan tuah. Cu lawng si lo in ram pumpi nih kan i hrawm mi ngunkhuai tangka vialte anmah nih an tawlrel tikah Chin ram ah thanchonak pakhat an ser phah “Tribes” pakhat le pakhat, “Pengtlang” pakhat le pakhat, “ Township” pakhat le pakhat kar ah a cuh in a kan cuh ter. Kan i cuh tikah milu tam deuh “Tribes”, “Pengtlang”, le “Township” nih thanchonak tam deuh tinco a si. Cu tik ah kanmah le kanmah kar ah “Milu” tam deuh asimi asilo ah Center Cozah he kom kho deuhmi lawng nih thanchonak kan hmuh. Cun “Tribes”, “Pengtlang”, le “Township” kar ah thanchonak a tluk rual ti lo tikah mah le mah kar zong ah thleidannak tampi a chuak. Cu nih a chuahpi mi cu Chin miphun ah “Tribes” ngan deuhmi nih “Tribes” hme deuhmi cung ah nehsawhnak le khat le khat i hmuthiam lonak hna a si. Cucaah nihin nitiang ah “National building” nakin “Tribes” thazaang caknak i khua le ram thanchoter kha “Tribes” pawl nih kan zapi tein papek deuh in kan chiah dih. Cu bantukin India ram ah telhmi Chinram um Chin miphun hna zong India Cozah nih a tuahto hna. Bangladesh ram ah telhmi Chinram le Chin miphun hna zong Bangladesh Cozah nih lungrual kho lo ding in a tuah thiam hna.

RAMTHAR SERNAK LAM

“Miphun/Nation” pakhat kan sinak a cak khawh ding ah ramri nih a kan tthen kho lo. A biapi bik cu kan lungput a si. Cu tikah a bik in chiatnak thatnak kan ton caan ah pakhat le pakhat i zawnruahnak le bawmchanh duhnak lungthin kan ngeih bantukin zei tik caan paoh ah “Unau” kan si timi lungput hi pakhatnak ah chiah peng a herh. Cun “Miphun min” timi nak i thisakhat “Unau” kan si timi hi papek deuh ah chiah a herh. A ruangcu “Miphun min” i hrawm khawh ding kan cawlcanghnak ah “Tribes” kar ah i theihthiam lo nak tamtuk a chuah cang tik ah hihi papek ah kan chiah ahcun kan “Unau” sinak le kan i dawtnak tiang a rawk chin kho mi asi. “Miphun min” i hrawm khawh ding caah caan lak a herh. Cucaah Ramthar kanser khawhnak ding caah ah ramri nih a kandang kho lo ding cu “Dawtnak” le “Unau” kan sinak hi thazaang thawnter a herh. Cun India, Myanmar, le Bangladesh ram ah thencheu a tongmi kan Chin miphun kan dihlak nih kan tefa chan ah Ram pakhat Miphun pakhat in kan dir kho i ramthar kan ser khawhnak ding caah cun fimthiamnak kan cawnnak cauk (curriculum) kip ah kan tuanbia a khat tein kan chiah khawh a herh bik. Cun “Tribes” hruaitu kip le Chin miphun mizapi kip nih a cung ah langhtermi kan ram le miphun boruak kha kan i fian cio khawh a herh.

KAN LUNGPUT KAN THLEN A HERH

Biafunnak

Chin miphun cu kan ram “Village Country” in ram kan ser lio ah mi ramdang kut ah kan tla. Kan tuanbia kip miphun dang nih ttialmi asi tik ah “Min” le “thawhkehnak” kong ah a phunphun in tial le phai a tongmi kan si. Aluancia kum 100 hrawng in kan pupa hna hmurka in chim mi tuanbia hrim ah Nu khat Pa khat fa hmanh nih “Chung or Phun dang” tiah a kalmi kan si. Village Level hmanh miphun tiah a cohlangtu kan tam rih. Kan ram a thangcho deuh cang nain Miphun sinak nakin “Tribes” level ah kan buaibai peng rih ding ah ram kan ser timi India, Myanmar, le Bangladesh pawl nih buaibainak kan kar ah an ser. Cu lio ah “Tribes” hruaitu le ram ah hruaitu dirhmun a tingco tu nih kan miphun kan lungrual khawh lo nak hrampi kawl loin thachonak deuh lawng papek ah rak chiah peng asi. Cucaah nihin tiang ah Miphun kan sinak a tlau i “Tribes” kan sinak tu a thawng cang. Cucaah ramri ngeilo miphun/unau sinak in ramthar sernak lam kawl tti i chiatni thatni ah kan i dawt kan i dirpi cio bantukin a lamkip le a zeizong kip ah dawtnak le unau sinak pakhatnak chiah in dirti cio usih.

Crd – The Lairam Times

Be the first to comment

Leave a Reply

Your email address will not be published.


*