CDF-Hakha Kumkhat Tlinnak an tuah, a ropui tuk hringhran!

CDF-Hakha Kumkhat Tlinnak an tuah, a ropui tuk hringhran!
========
CDF-Hakha Council Kumkhat Tlinnak le Pathian sin Thlacamnak cu Hakha peng hmun pakhat ah Minung 400 fai tel in kan tuah. Dirhkamhtu nan zapi cungah kan ilawm! Kan tei hlanlo kan doh lai!

Bawipa nih lam in hruai chin lengmang ko hna seh, a rau hlan ah tei nak in pe hram hna seh mu. Kan in zoh cim hna lo ee, kan upat tuk hna.

Zoh nan dawh bak mah bak ding si dothlen nak a tuah mi Chin CDF kum tling a tuah mi lak ah kan uar cem hna dotlen nak ah kan nu/kan pa a si mi CNF zawng hmai nan suang tar nan u pat hna ti a lang ngai ngai Bawipa nih in huhphen hna seh law tei nak zawng naa kan hmuh pi hrim hrim lai tiah zumh nak ngan pi kan ngei.

Pasal cio maw kan si lo. Thil tha tuah ruang ah si lo in thil tha tuah ding ah khamh kan si. Zisu Khrih kutchuak (product) Khrihfa hna hi hlaan lio Khrihfa hmasa hna Ecclesia (Greek Citizens) mibu, khua le ram ca i a rak i pe tuk mi hna cawlcangh ning he an i lawh tuk ruang ah min an rak bunh mi hna min in laak mi asi.

Khua le ram nih a herh tik ah Khrihfa asi taktak mi hi hawi hlei in kan ngamh asaan ding, kan i peek ding, hmai ah kan kal ding asi. Thil ttha tuah ding ti ah hin vulei uknak ttha a chuah khawhnak hnga ding i dothlennak tuah hlei thil dang a um lo. Dothlennak a tuah kho cang mi ca tu ah cun thil ttha thim ding tam pi an ngei. Dothlennak a tuah kho rih lo mi hna caah cun thil ttha dang a um lo. Dothlennak i ipaih ve cawl ve i peek ve lawnglawng hi asi ko.

Dothlennak a liim cang mi ram ttha ah cun thil vialte hi an tthat khawh chung in an tha dih. A hmun lo mi vulei a hmunh chung cu thil ttha hi hmun kho ding in an upadi phung le hram nih a dir kamh hna. Inn an rawk an kangh ah Insurance ai ready, Motor a rawk ah insurance ai ready, mi an thih ah insurance ai ready, thil ttha hi an tthat nak man a ttum kho ti lo.

Dothlennak a tuah kho ve lo mi ram ah cun a rawk mi rawk bak, a thi mi thih bak, sungh za tlaak mi sungh bak asi i bawmtu ah Pathian dah lo a dang a um ti lo. Mi cheu nih dothlennak a tuah cang mi ram ah kan um ti hmanh i hngal lo in dothlennak tuah hi Khrihfa rian asi lo ti bantuk i khua araut mi le bia a chim mi kan um. A mah le a mah zong ai hngal lo mi, a zumhnak hrampi zong ai hngal lo mi, a hmai lei kong zong a hngal lo mi a hmaika lawng a hmu mi hna khua hmuh ning asi.

Miphunpi nih tuar awk ttha lo, in awk ttha lo thil aton ruang ah ral a tho mi lak i lung tho te i ai tel lo mi cu dawtnak a pel te zong akawp lo mi, alnak a ngei lo mi cite tum, thlarau a ngei lo mi, minung cazin ah rel chih ding ah ai tlaak lo mi kan si ko.

Dothlennak caah micheu nih an nunnak an peek cang, a kut ke an pum cheubang an peek cang, an inn lo an khua an peek cang, an chawva tam pi an peek cang, nang na peek mi chim tlaak asi ve lo sual ah cun vulei hmai hi khah ding asi lo ti hi theih hrim hrim aherh. Vulei in sermi kan taksapum cu vulei ah kir tthan ding asi ti in pastor te nih ruak an kan vui ah an chim tawn i vulei an laak i ruak kuang cung ah an vorh tawn khi kan hmuh cio.

Kan nun chung ah atu bantuk vulei nih akan herh tuk lio caan i a nun ai siang lo mi hi vulei nih vulei si ter tthan ding ah akan duh ti lo, a kan hnolh, vulei ah kan i cang kho ti lai lo ti hi philh hna hlah usih. Cu ti bu i thlaan i kan luh ah cun kan thlaan hi a thlaan hawi hmai ah ningzak in a um peng lai ti tiang khi ruah chung cia a herh.

Kan pasal ttha hna nih siaherh ngai i an kal taak mi kan dothlennak hliam hi a rilh tiang hliam dawi ding hi Pathian muisam a keng mi minung pohpoh kan rian asi. Athi mi an thih taktak bantuk in a nung mi nung taktak ve hna usih. Pasal cio pei kan si cu. Credit: Salai Bawi Uk Thang

Be the first to comment

Leave a Reply

Your email address will not be published.


*