CDF-Hakha min in siseh, Hakha peng chung ah kan ram le miphun luatnak caah tiin dothlennak kan tuah!

SAC Nih Uknak A Laak Kum 2 Chung Ah Hakha Ah Tualchung Mi 14 Nunnak Liam, 370 Leng Tlaih An Tong – CDF Hakha!
===========
2023 February 1 in Min Aung Hlaing nih hramhram in uknak a laaknak kum 2 a tling cang. Hi chung ah lamzawhnak in siseh, CDM tuahnak in siseh, CDF-Hakha min in siseh, Hakha peng chung ah kan ram le miphun luatnak caah tiin dothlennak kan tuah. Lam a zawhmi minung 50,000 tluk kan rak si. CDM a tuahmi zung rianṭuan minung 4,000 tluk kan rak si. Hriamtlaimi minung 3,000 tluk kan si.

Hakha ah Chin State zung, District zung le Township zung tiin a ummi hna rian an ṭuan kho lo. Mizapi nih ralhrang cozah nawl an ngai duh lo. CDF-Hakha nih ral voi 166 kan tu cang, ralhrang 510 kan fim hna i 222 kan hliamh hna. Hakha khuapi chung ah kahdohnak voi 65 kan tuah cang. Hakha peng ahcun ralhrang nih zeihmanh an tuah kho lo. Hakha khuapi zong caan rau lo te ah kan lak khawh cang lai.

Kum 2 chungah ralhrang hna kut in mipi nunnak a liammi minung 14 an si, hliam a tuarmi minung 6 an si. Ralhrang kut in inn a kangmi inn 30 le a rawkmi inn 4 a si. Tlaih a tongmi minung 374 an si. Mizapi hna mah inn le lo ah um ngam loin ral a hrialmi le harnak a tongmi tampi an um. Mipi ralkap chung in minung 19 nih ram le miphun caah nunnak an pek i minung 41 nih hliamhma an tuar. Hi vialte hi kan ram le miphun luatnak ding ca ah an si.

Ralhrang uknak a hram in a cah hlan tiang pehzulh in dohthlennak kan tuah lai. Ralhrang uknak kan cohlang lo. Ralhrang nih a tuahmi thimnak zong kan cohlang lo. A dikmi Federal Democracy a chuah hlan lo dohthlennak kan tuah lai. Mizapi hna zong nan si khawhnak cio in hi dohthlennak ah i tel cio ding in kan in sawm hna.

Tutan raltuknak cu kan miphun le ram ca ah a hnu bik raltuknak a si. Hnulei kir awk zong a ṭha ti lo. Kan sungh ahcun zeitikhmanh ah ralhrang ralkap uknak le miphun dang uknak tang in kan chuak kho ti lai lo. Kan ram le miphun luatnak cu kan dihlak ṭuanvo a si tiah Chinland Defense Force – Hakha Council nih 2023 February 1 ah cathanh an chuah.

January Thla Chung Ah Myanmar Ram Pumpi Huap In Inn 5000 Hrawng A Kang – NUG. Myanmar ram pumpi huap in a luancia 2023, January thla khat chung ah SAC ralkap nih inn khanghnak voi 138 tiang an tuah, cu chung ah inn 4,807 a kang. Mei khangh in thah a tongmi 23 an si tiah NUG Ministry of Home Affairs and Immigration, Fire Department nih February ni 1 ah cathanh an chuah.

SAC ralkap nih meikhanghnak a tuahmi chung ah Sagaing ramṭhen ah voi 109 tiang a tam bik inn khanghnak a tuah. Cu chung ah biaknak lei he aa pehtlaimi inn 10 le sianginn pakhat telh in tualchung mi hna umnak inn 4,271 an khangh leng ah tualchung mi 17 nunak a liam tiah an thanhmi ah an langhter.

Magway ramṭhen ah mei khanghnak voi 13 tiang an tuah, cu chung ah biaknak lei he aa pehtlaimi inn pakhat le tualchung mi umnak inn 357 a kaang tiah an langhter chih. Karen ramkulh chung ah mei khanghnak voi li an tuah i chung ah inn 59 a kaang. Mandalay ramthen ah voi hnih inn khanghnak an tuahmi chung ah inn 52 a ciam. Taningtharyi ramṭhen ah voi 5 tiang inn khanghnak an tuah i inn 34 a kang, Mon ramkulh ah inn 6, Rakhine ramkulh ah inn khat, Chin ramkulh ah voi hnih an khangh i inn 9 a ciam, tualchung mi 6 nunnak a liam tiah NUG nih an thanh.

Sagaing ramṭhen ah a bik in cawlcanghnak a tuahtu SAC ralkap hi khahmahyiah 361, 368 le 369 an si. Nuhrin covo buar in mipi cung ah hremnak a phunphun an tuah tiah Sagaing ramṭhen ah ummi nih an chim. ISP-Myanmar nih January 24 ah a thanh ning ah cun Sagaing ramṭhen chung SAC nih uknak a laak kum 2 tluk ah tualchung mi hna umnak inn 43,216 an khanghpiak hna tiah an langhter.

Tigyaing Ah SAC Gate KIA Le PDF Nih An Doh, SAC Ralkap 20 An Thi, 3 Hriamthil He Tlaih An Tong. Sagaing ramṭhen, Tigyaing Myataung lam tonnak ah a ummi SAC checkgate cu KIA le PDF phufonh nih nihin February ni 2 ah an kahdoh hna caah SAC ralkap 20 an thi, minung 3 an hriamthil he tlaih an tong tiah theih a si.

February 2, zinglei suimilam 5:00AM ah Tigyaing peng Myataung lam tonnak checkgate ah ummi SAC ralkap cu KIA, tualchung hriamtlai pahkahphah le PDF phufonh nih kalhnawh in an kahdoh hna caah SAC ralkap 20 hrawng an thi. SAC ralkap 2 le khuabawi pakhat tiin minung 3 cu meithal saumi, kuanfang le cazin catlap pawl he tlaih an tong tiah theih a si.

Tigyaing peng Myataung gate ah a ummi SAC ralkap kahdoh an ton caah bawmtu ding ah thlahmi SAC ralkap motor 2 cu PDF nih bomb puahhnawh in an kham hna tiah Takaung tualchung hriamtlai phu in chim phuannak nawlngeitu nih a chim.

SAC Chungtel An Ka Telhnak Kong Ah A Hlankan In Thanhcia Ka Si Lo Tiah “Pu Gin Kam Lian” Nih A Chim. State Planning and Administration Council chungtel ah an ka telh hi a hlankan in ka theihcia lo caah ka cohlan ding le cohlan lo ding kaa fiang rih lo tiah Pu Gin Kam Lian nih a chim.

Zomi Congress for Democracy (ZCD) party general secretary Pu Kil Kam Lian cu SAC nih uknak a laak kum 2 a tlin ni February 1 ah SAC chairman Min Aung Hliang nih State Planning and Administration Council chungtel ah a khumh tiah theih a si.

“A hlankan in chimhcianak a um lo caah, ka ca ah a har ngai. Kei cu thithlum le zunthlum zawtnak ngeimi ka si. Party chung zong ah ka ṭuanvo a ngan caah tutan thil hi ka cohlan le cohlan lo kaa fiang rih lo. Pathian sin ah thla ka cam, Pathian nawl si ko” tiah Pu Gin Kam Lian nih cun a chim.

Pu Gin Kam Lian cu 2015 thimnak lioah ZCD party in Tedim peng ah Amyota Hluttaw palai ca ah thimmi a rak si. 2020 thimnak ah Tedim peng ZCD party in zuamnak a lut ṭhan nain a rak tling lo.
ZCD party cu 1990 thimnak lioah teinak a rak hmutu party a si i NLD party he ralkap ukchan lio zong ah hmunkhat ah a kalṭimi Chin party pakhat a si.