CDF-Lautu nih Mara Pastor Dr. LB Siama an tlaih tiah Golden Five Stars Channel nih a tial!

CDF-Lautu nih Mara Pastor Dr. LB Siama an tlaih tiah Golden Five Stars Channel nih a tial!
========
Mara Evangelical GS rian a tuan lio mi Rev. Dr. LB Siama le U Za Saw (Treasurer, MEC General Headquarters) tel chih in Biaknak lei hruaitu upa minung (6) hna cu July (1) ah Rezua in Lai Len Pi lei an kal lio ah CDF-Lautu nih an tlaih hna.

Cu bantuk in an tlaih hna hnu ah Zua Mang khua ah ni (2) le zaan (3)chung ei awk rawl le zaanah ivawrh ding puan pek lo in an chiah hna. Atubantuk in tlaih an tawnnak ah hin CDF-Laitu, CNA le Mara-CDF an itel ve tiah min langhter duhlo mi pakhat nih Golden Five stars Channel sin ah a phuan.

Cu hlei ah India ram mi Tisi khua chungkhar herhbau ah Zua Mang khua ah a kalmi minung (2) hna cu MDF he pehtlainak nan ngeih tiah CDF-Laitu nih sual an puh hna i, Hi thil a caan mi thlithup in chiah duh ah CNA, CDF-Lautu le CDF-Mara hna nih Tisi khua mi hna an phone vial te zawng anchuh dih hna.

A cunglei an tlaihmi Mara mi hna cu July (3) ah kan thlah than hna nain Lautu-CDF nih Mara mipi hna a herhlo in tlaihkhihnak, Lam phihpiaknak, khual a tlawngmi a ruang umlo in tukvelh tlaihkhihnak hna hi voi tampi an tuah hna. A tu bantuk in Mara mipi cung ah an tuahsernak hi cu ralhrang hna tuahsernak bak a si ko tiah thawngpang a kan pektu sin in kan theih. Credit: The Chin Light -https://www.facebook.com/groups/marastudents/permalink/5194256293983397/

CAMP VICTORIA BIACAH; Kan Khrihfabu meeting ahcun ka chim cang. Facebook ah ka vun tar. SAC nih aa zuam bik mi pakhat cu Chin pastors hna lemsoi i an mah neihniam he tein biaruahnak ngeih peng khawh ding hi a si.

Pastors hna an thinlung kan lakkhawh hna ahcun mipi cu fawi deuh tein kan leiah an ra ko lai tiah an ruah. Zeicatiahcun pastors hna hi Chin miphun nih an Pathian changtu ah an ruahmi hna an si.

Ramleng um hruaitu hna nih Hakha le Lairam um pastors hna hi SAC he pehtlaihnak an ngeihnak hnga lo biatak tein van kan thloh piak hna u. Camp Victoria Biacah (meeting)

SAC Ralhrang nih Taal a Khua Ning piin an Khangh! Falam in Hakha lei ah a rak rami SAC ralhrang nih nihin July 9, zinglei sml. 11:00 hrawng in Taal khua cu a khua ning in mei in an khangh, tiah khua upa sin in thawngpang kan theih. Khuami an zaam dih cang hna i an khua a kanghmi cu a lang in an cuan hna.

Taal khua upa pakhat nih, “Atu hi a kaang cuahmah ko. Inn 3 hrawng lawng a taang cang. Kan khua ning piin an khangh ko. Khuami cu kan zaam dih cang i a lang in kan khua a kanghmi kan cuan,” tiah The Chin Journal ah a chim.

Taal khua hi inn 40 hrawng a ummi khua a si i, kan hnu October 2021 ah khan SAC ralhrang nih inn 11 an rak duah cang. Inn 30 hrawng a tang i nihin ah SAC ralhrang nih an duah tthan caah azapi ngawt in a kaang cang, tiah a cunglei Taal khuami nih a chim.

Falam – Hakha lampi cungah a ummi Țaal khua cu nihin chun suimilam 11:00am (Myanmar) hrawng ah an kaangh. Ralhrang motor thluan 27 cu 7 Chiapa ah Falam ralhrang riahbuk in an i thawh i, Falam khua lungpi veng ah zaan an riak, nizaan 8 Chiapa ah Thlanrawn khua pawng kahdohnak ah ralhrang 20 hrawng an thi.

Ralhrang nih Țaal khua cu a ruang um lo in a tu bantukin an khangh hi a si, inn zeizat a kaangh bal fianghlang in theih a si rih lo.

TapaitKyin CDM Siangcachim Pakhat SAC Nih Kum 15 Thong Thlak Ding In Bia An Khiah. Mandalay ramṭhen, TapaitKyin (သပိတ်ကျင်း) peng ZayatKwin(ဇရပ်ကွင်း) khua ummi CDM sayamah Daw Cho Ya Min Han cu SAC nih Uboe (အိုးဘို) thonginn biaceihzung ah phungrelnak caang poh-mah 50 (ည) in July 6 ah kum 15 thong thlak ding in bia an khiah piak tiah theih a si.

SAC nih CDM cawlcanghnak a tuahtu sayamah Daw Cho Ya Min Han cu 2021, December 15 ah a umnak ZayatKwin (ဇရပ်ကွင်း) khua ah an rak tlaih hnu ah Uboe (အိုးဘို) thong inn ah an rak kuat.

“PDF he pehtlaihnak na tuah tiah an puh caah phungrelnak caang poh-mah 50 (ည) he kum 15 thong thlak ding in Uboe (အိုးဘို) biaceihzung nih July 6 ah biakhiahnak an tuahpiak” tiah Daw Cho Ya Min Han he neihniam in ummi pakhat nih a chim.

Chin Miphun Palik 2 Hriamthil He Myine PDF Sin Ah CDM An Tuah. Magway ramṭhen, Myine peng KaiṬawMah(ကိုင်းတောမ) palik sakhan in palik 2 cu nizaan July 8, zinglei ah Myine PDF sinah CDM an tuah tiah theih a si. CDM cawlcanghnak a tuahtu hna cu Private number lah/261731 Pasang le lah/284488 Lu Taw an si. Meithal pakhat veve leng ah kuanfang 90 zong an i put tiah Myine PDF in Bu Latya nih a chim.

“Nizaan June 8, zinglei suimilam 9:45 hrawngah CDM an tuah hi a si. An pahnih in KaiṬawMah(ကိုင်းတောမ) palik sakhan in an si. An pahnih in BA 92 meithal pakhat veve an i put caah minung pakhat ah sing 50 laksawng pek an si” tiah a chim.

CDM cawlcanghnak a tuahtu ralkap cu Pakokko pengkomh KaiṬawMah(ကိုင်းတောမ) palik sakhan ah rian an ṭuannak ni 4 lawng a si rih, an pahnih in Chin miphun an si caah a tu ah cun Chin ramkulh lei ah kalter an si cang tiah theih a si.

CDM cawlcanghnak a tuahtu palik 2 telh in Myine PDF sinah CDM cawlcanghnak a tuahtu ralkap dihlak 9 an si cang. Cu chung in minung 3 nih an hriamthil he CDM cawlcanghnak an tuah tiah Bu Latya nih a chim. Credit: The Lairam Times, The Chin Post

Be the first to comment

Leave a Reply

Your email address will not be published.


*