CDF Lengnu le vaalpa hna caah cun laptop le ipad tlaih in sianghleirun kai kho loin nunnak pek lio caan a langhter!

Canada ram Kitchener dawtu vialte, Nan ka dawtnak cungah ka lawm tuk. Bawipa nih thlua in chuah ko hna seh. A tanglei capar hin nan kut kan tlaih hna.
========
“Ka Duh Hlah Law Dawtmi” (Dec 19, 2022), Canada ram Kitchener khua ka um lio ah Aizawl ah 2022 ChinTube People Choice Award peknak an tuah. William Thang hla “CDF Vaalpa” nih “Song of the Year” lawmman a co. Award pek lio ah a hla ka hun ngaih cu “Co tlak hrimhrim a si” ka ti ve. Kan ram le miphun dawtnak fiang tein a langhter.

CDF Lengnu le vaalpa hna caah cun laptop le ipad tlaih in sianghleirun kai kho loin nunnak pek lio caan a langhter. A hla bia le a aw ngaihnak hmanh hin ṭah len tlak sullam ngei hla ṭha a si.
Ralhrang ruang ah Dawtmi kaltak in Dawtu CDF Vaalpa cu sianghnuai meithal put in ral a do. A hawi le pakhat hnu pakhat an i hliam, an nunnak an pek. CDF Vaalpa zong ka thi ve te lai ti a hngalh.

Ralhrang tei lo ahcun techin fapar tiang nih an tuar lai ding vision khi a hei hmuh khawh. Cuticun tupi le hmawng tang in hla a phuah, “A thi ding ka si ca’h Ka Duh Hlah Law Dawtmi” ti’n tlang a kawm. Hla bia a ṭial lio ah mitthli kurkur in a luang. A kut aa tum, haacang aa rial. (CDF Vaalpa hi Love Story muvi in chuak kho te sehlaw a ṭha tuk hnga).

Eden dum ah Dawtmi le Dawtu nuam te an len lio ah ralhrang Lucifer nih an i dawtnak hri a chah. Vaalpa Jesuh nih a Dawtmi khamh dingah sianghnuai vailamtah i put dingah caw-inn ah a hung chuak. Vaalpa Jesuh nih Cross ah ka thi lai ti a hngalh. Thihnak lo cun Dawtmi he i co khawh a si fam lo cu ta. December 25 hi a ni kan lawm loh. Vawlei ah a rami CDF Vaalpa Jesuh le a kan dawtnak kan lawmh a si deuh. Dawtnak dong thiam lo Bawipa dawtnak, sualnak vialte ngaithiamtu dawtnak.

Solomon Hla 8:6-7 “Dawtnak cu ee thihnak tluk ṭhawng ve. Dawtnak nih cun mei bang in hlio kaw meizik nak in ṭhawng deuh ai. Dawtnak mei ci tidai rial nih hmit kho ri lo. Run tilian zong nih phum kho lai lo. Dawtnak can ah rothil hmanh hei kam hna sehlaw a khi hna cu zei ah hen ka hei rel hna hnga”.

Vaalpa Jesuh zong nih “Ka duh hlah law Dawtmi” a kan ti ve. Zeicahtiah bawmtu le thluachuah pe ding lawng ah an ka duh sual lai ti a phang. Tlangval nih nungak a duhmi cu dii riamnak ah aa hman. A dawtmi tu cu nupi ah a ṭhit. Pangpar a duhmi nih an ṭawh le a thi. Pangpar a dawmi nih ti an toih le an kilven. Ralhrang Satan nih a min men Khrihfa si in Vaalpa Jesuh hi duh a kan fial.

Khrismas caan ah zu le sa, nuamhnak he ralhrang satan nih a kan lawmhter ve. Vaalpa Jesuh nih cun “Rak ka zum law Dawtmi, a zungzal in vancung pennak ah kan leng ṭi lai” tiin a kan sawm. Vaalpa Jesuh Dawtmi na si. Jesuh vawlei a rat hi Dawtmi (—na min—) caah a si. Tukum Khrihmas cu Vaalpa Jesuh kha zumhnak in amah he kan i ton dawtnak bia le hla he kan lawmhnak kum si hram ko seh. Sailo Pa, Kitchener, Canada

Be the first to comment

Leave a Reply

Your email address will not be published.


*