CDF Nungak pakhat; Nunnak pakhat telawng ka ngeih mi hmanh LaiRam pi caah a thap ngam mi nu ka si!

CDF Nungak pakhat
======
Mai Teresa, Hi dohthlen nak ah ka tel hi mino sin ah um ka duh zong a si lo. Nu le pa kut in chuah ka duh ruang zong a si loh. Nuamhnak duh in a lut mi zong ka si loh. Lenglang zoh dawh nak men a duh i a lut mi sin ah ka tel loh. Fial chom in a lut mi ka si loh.

Nu le pa nih duh lo buin le sianglo bu in le thlohnak za kip a pah chih in a lut mi ka si. Hawile bang chungkhar ser i dawtmi hna he um a duh ve mi nu ka si ko buin kan ram sining ruang ah nuamh nak zakip a kal tak mi nu ka si. Hi dohthlen nak ka luhruang ah cheukhat cu an ka hrial an ka tthen nain kha cu a poi ah ka chia lo ka thazaang tthawn khun nak tu an si.

Hi dohthlen nak hi kan hoi tei khoh lo zong ah kai lungsak ko lai.Ka chan lio i ka thazaang ka thawn lio i mah dohthlen nak ah ka rak tel ve ka Ram pinih a ka herh mi nu ka si mi hi a zei vialte nak in kai uang pimi cu a si.

Nu vial te nak in hi doh thlen nak ruang i mizoh nak ah ka min va chia ko hmanh seh law kai lungsak i ka inn khawh ko LaiRam pi caah cun. kei cu ka timh mi le ka ttanh mi hi ka theih ka fiang. Cu caah zei thil tlung aikun ka tuar lai ka hne khawh dih ka Lairam pi caah! Nunnak pakhat telawng ka ngeih mi hmanh LaiRam pi caah a thap ngam mi nu ka si. Tu bantuk tein na lung rak thawng peng seh mu, kan upat tuk mu.

CDF thawngpang theih cu lung a hmui kho tuk hringhran! Nihin Matupi kahdohnak ah SAC ralhrang 9 an thi, CDF tangrual bu an him. Nihin January 21 zaanlei ah Matupi peng, CDF-Matupi Battalion (2) humhakmi hmunram ah kahdohnak voi 5 a chuak i SAC ralhrang 9 an thi, tiah CDF-Matupi nih thawng an thanh.

Nihin zinglek sml. 8:30 hrawng ah Matupi-Mindat lamcung i SAC ralhrang pawl cu CDF-Matupi nih an vung kah hna. SAC ralhrang nih bawmtu an rak thlahmi hna cu sml. 10:30 hrawng ah lampi ah an kah chap than hna. Nihin January 21, ni khat chung lawng ah Matupi peng ah kahdohnak voi 5 a chuak. Matupi-Mindat lam ah kahdohnak voi 2 a chuak i, Hakha-Matupi lam ah kahdohnak voi 3 a chuak ve.

SAC ralhrang minung 9 an thi i, an meithal pakhat (MA-1) kan lakpiak hna, tiah CDF-Matupi nih thawng an thanh. CDF-Matupi nih ahmasa thawng an thanhmi ahcun nihin kahdohnak ah hin CDF-Matupi, CDF-Zotung le CDF-Mara kan i bawm, tiah an langhter.

Paletwa Ah SAC Nih Thimnak Tuah Timhmi Ah Tello Dinh In IKACC Nih Thanh. SAC nih thimnak(election) tuah an timhmi cu kan cohlan hrimhrim lo caah cu thimnak ah teltumnak a ngeimi cu dantat nan si lai, tiah Interim Khumi Affairs Coordination Council(IKACC) nih January 19 ah cathanh an chuah.

Cu thimnak hlawh a tlin khawh nak ca ah Paletwa peng chungah SAC nih cawlcanghnak le timhtuahnak an ngei cang, tiah an langhter. Thimnak an tuah mi a phi chuak nih hi tluk ramkomh kawlram a buaimi le a rawkmi hi a remh kho hlei lai lo, tiah IKACC nih cun an langhter. Hi thimnak an tuah timhmi ah zalonnak, tluk ruannak le nuhrin covo a um lo pinah an buar caah kan cohlan khawh lomi a si, tiah an cathanh ah cun an langhter.

Chin ramkulh, Paletwa peng chung mizapi nih SAC nih phung ning loin thimnak an tuahmi ah i teltumnak, thimnak ah i zuam venak le vote peknak nan tuah hrimhrim lai lo, cuti nan tuah ahcun dantatnak kan in pek hna lai, tiah IKACC nih cun an langhter.

Chin Ram Ah Tanghra (10) Caminpuai Phit Ding In Min A Pemi An Karh! Chin ramkulh chung ah 2022-2023 kum, tukum tanghra (10) caminpuai phiding in mincazin a pemi minung 3456 an si i ni kumnak in tu kum hi minung an tam deuh tiah theih a si. Khuapi dihlak in mei khangh a tongmi Thantlang khuapi dah tilo cu a dang khuapi hna Paletwa, Kanpetlet, Mindat, Matupi, Hakha, Falam, Tedim le Tonzang khuapi hna ah caminpuai tuah an i tim tiah theih a si.

Tukum tanghra caminpuai phit cu May 8.2023 ah timhlamh a si i zinglei suimilam 9:00 in chun suimilam 12:00 tiang phit a si lai tiah theih a si. Chin ramkulh chung ah nikum, 2021-2022 cacawn kum i tanghra caminpuai phimi hna mincazin cu 2259 an si i 605 an awng tiah theih a si.

Chin ramkulh tang-10 caminpuai phit ding in min a pemi siangngakchia 3,500 dengmang an um. 2022-2023 cacawn kum ah Chin ramkulh chung ah Tang-10 caminpuai phit ding in mincazin a pemi siangngakchia 3,456 an um, tiah theih a si.

Thantlang khua dahtilo a dang khuapi pawl ah Tang-10 phit ding in mincazin a pemi siangngakchia hi an um hna. Hakha, Falam, Kanpetlet, Mindat, Matupi, Tedim, Tonzaang le Paletwa ah cun Tang-10 caminpuai phit ding in timhtuah a si. Atu kum March 8 in 18 tiang hi Tang-10 caminpuai tuah a si lai. SAC ralhrang nih uknak an lak hnu ah Tang-10 caminpuai cu voi khat an rak tuah cang.

2021-2022 cacawn kum ah an tuahmi Tang-10 caminpuai ah Chin ramkulh in siangngakchia a phimi 2,259 an um i, cu chung ah cun 605 an aung. SAC ralhrang nih uknak an lak hlan ah cun Chin ramkulh ah hin kumtin Tang-10 caminpuai a phimi 9,000 in 15,000 karlak an rak um tawn.

US President Joe Biden Nih Harsatnak Tongmi Hna (Refugee) Lakding In Lungtlinnak A Ngei! American ram mi le American ram ah zungzal (Permanent) in umnak nawl a ngei cangmi hna nih ṭuanvo lakpiak ding in Myanmar ram telh in Vuleicung hmunkip ah harsatnak tongmi hna (Refugee) kawh/auh ding cu American President Joe Biden nih January 19 ah lungtlinnak a ngeih tiah theih a si.

American Minister of Foreign Affairs nihcun “Welcome Corps timi caan kan thok cang caah Vuleicung hmunkip ah harsatnak tongmi (Refugee) bawmh haumi hna cu dawtnak le zawn ruahnak lungthin he American mipi hna nih bawmhchanh in kan in tuaktanpiak hna lai” tiah a chim.

Bawmchanhnak ah aa tel duhmi hna nih minung 5 ah phukhat si lo ah minung 5 naktam in phukhat ah an i ṭhen lai i kan zohkhenh ko hna lai tiah an sok hmasa lai. A kum khatnak ahcun a latu hna ding hi minung thawnghra (10,000) tiang kan cohlan hna lai.

A la tu hna nih an lakmi hna umnak ding caah inn man siseh coka thilri siseh thilpuan hrukeih vialte tiang in ṭuanvo a lak dih lai. Mahruang ah minung pakhat caah a tlawmbik US phaisa $ 2275 tal cu ka bawmhchanh khawh lai tiah a chim lai i cu tangka cu cozah lei nih kan pe ṭhan ti lai lo tiah a chim. Kumkhat ah minung thingkhat leng (125,000) in kan i tinh ning a si tiah American President Joe Biden nih a chim. Credit: The Chin Journal, The Chin Post

Be the first to comment

Leave a Reply

Your email address will not be published.


*