CDF Senthang Kong Ka tial ah a ka pamh len mi nan um. Thil hi kan hlat ve i, a dik mi lawng kan tial!

Pumkhat Si le Lungrualnak Lawng In Ralhrang Thluk Khawh Asi Caah Kan Au Lengmang Nak Hi Asi!
==========
CDF Senthang Kong Ka tial ah a ka pamh len mi nan um. Thil hi kan hlat ve i, a dik mi lawng kan tial. Ruahnak le purdah in catial ka hmang ballo. Hmai lei zong ah dik mi lawng ka tial lai.

Chin Ralkapbu CNF/CNA ah kan i fonh khawh lo tal ah i Funtom hna usih, cu lawng ah ral kan tei lai tiah tlang ka au lengmang mi hi asi. CJDC chungtel cu CNA asi cia cang tiah pomh piak khawh asi. Hihi cu buai awk aum lem ti lo.
CJDC ah aum lo mi MDF, ZRA, CNDF, CDF Senthang, CDF Zotung Supreme Council le CJDC um buin CNA a remh lo mi, Mindat CDF bantuk kong hna hi kan aupi mi cu asi.

Senthang hi LAI bak asi. Senthang ti cu miphun min asilo. Minung min asi (Surkhua bawi bia). Khuapi khi Hakha khuatlak ansi. Salai Bawi Vung Thang hi Hakha bak asi. Loklung cu Hakha loriak ansi. Mirum Pu Thawng Kian khi Senthang Mirum ti ding asilo. Hakha mirum ti ding asi (Khuapi cu HK asi caah).

Hakha khualipi cu CHINMI vialte caah, Khualipi asi. Hakha le Hakha peng khuasak ah Pengtlang le a dang um rai le um phung asi lo. Hakha tak nakin CHINMI khuasa mi kan tam deuh cang. Pengtlang ti zong ah Zokhua Area, Mi E Area le Senthang area lawng asi.

Kaa dang in rat in Hakha ah khuasa mi, CHINMI hmanh nih Hakha caah thisen le nunnak pek in an dir lio ah Hakha tak asi mi Senthang nih Phu hnih in kan um hi cu asi khawh lo. Bu khat ah i fonh cang ko usih tiah kan nawl hna. Hakha peng minung le Hakha khuasa mi nih Hakha Khualipi kan dirhkamh lo, kan sersiam lo ahcun, mi hnu ah kan um zungzal lai.

Tedim le Falam nih Khualipi chut an kan duh tuk ti hi nan hngalh cia dih mi asi. Tedim pa nih Thang Thang Pa a thlen tikah Khaikam ah khualipi thial a ti colh kha. Tedim lei nih Ralhrang ZRO/ZRA, PDF Zoland/ZFU, Falam nih CNO/CNDF an ngeih hi khua nan tuak ballo maw? Mindat he Mahameih an si cang fawh. Hakha khualipi aa thial ah Surkhua le Bungzung partizu vialte aa thawnh chih ti hi Senthang mi nih cing zungzal a herh.

Aho asual i a ho a dinfel tinak asilo. Hmunkhat um uhlaw, CNF/CNA tang ah um i, Hakha Khualipi veng usih, Hakha kan sungh ahcun CHINRAM vialte sungh asi ti hi asi. Pengtlang dang nak in senthang hi CHINRAM le Hakha khualipi caah a biapi bik mi kan si ti hi philh hna hlah usih.

Mirang doh an hruaitu Hakha Pu Vai Mang Cu thong an thlak caah, a thaisung nu Pi Tial Nawn hruainak in Mirang pi cu doh a rak si. Culio Senthang khuapi Sakta ah meeting tuah asi. Senthang, Lautu, Mara, Zophei, Zotung ti in meeting kai dih asi. Culio ah hruaitu cu Senthang kan si. Pi Tial Nawn thong an thlak caah, Senthang hruainak in Mirang cu doh asi. Hakha nih Mirang an remh ah Senthang hruai mi CHIN ralkap nih an duh lo.

Mirang nih Hakha ah Senthang ralkap cu an au hna i an nawl hna. Raldaih nak caah hnatlaknak an ngei. PEACE an tuah nak hmuh cu azaa cang tiah min an pek. Sakta holh in Azaarei an ti. Cucu a hnu ah zarebual kan ti mi khi asi ko hen cu. Senthang nih Mirang he remhnak kan tuah hnu ah Lautu, Mara, Zophei le Zotung nih remhnak an tuah ve. Cucaah AZAAREI an tinak cu asi.

Federal Pennak Le Rule Of Law Cu Then Khawh Asilo. Rule Of Law timi cu Upadi cung ah mi zeihmanh um lo ti asi. Mikip cu Upadi hmai ah kan i ruang dih, misual le mi dinfel tiah thleidannak aum lo ti hi Rule Of Law cu asi.
Rule Of Law a um lo ahcun Democracy in kan tlau. Federal ram he Van le vawlei tlukin kan i hlat.

Federal ram ah lutpi ding ah an kan hruaitu Mino hna nih Rule Of Law hi zeirelloin kan um awk asi lo. Mi tampi nih CDF an kan tih mi hi asi awk asi lo. Kan i remh awk asi cang. Rule Of Law a um lo, Upadi loin khuasa mi kan si ahcun, Federal ram ah nan kan lutpi khawh lai lo.

Dalaan hi mipi asi ve. Tukvelh loin, a bia tu kan ceih piak deuh awk asi. Upadi ah aa ruang mi kan si caah, Sihnih le bawmhtu upa aa sawm khawh. Tehte tling he biaceihnak ah aa phisin khawh. Nain kannih cu a hmun a rilko in cumh/ kan vuak/ kan chuih/ kan lamh/ kan thongh/ kan thah. Kan cumh nak ah an thi. Thi deng in kan vuak hna. Nuhrin covo kan buar dih. Geneva Convention kan buar dih.

Dotlami Upadi (Chin Acts / Tise Upadi) loin Dalaan biaceihnak hi NUG a hlawhtlin ter lo tu asi. Ramdang nih an kan bawmh lo nak le DDay an cohlan lo nak a ruang zong asi. An kan bawmh zong ah tin sih chih in asi ve. Dalaan cu kutpar in tongh loin, A biaceih ding tu asi. A sualnak he aa rup in ral dih hlan lo thongthlak, a ngeihmi thilri, hlawnthil le innlo, dum hau, satil tiangin chut dih awk tu asi.

Asilo ahcun A innlo hrawk piak dih/ khuaram in tthawlh tbk tuin a bia kan ceih awk asi. Kan lak ah Dalaan kan ti mi hna hi kawl lei bantuk an si lem lo (An thah cia mi hna zoh tikah). Dalaan cu thongthlak in a ziaza aa remh awk ah le kaltak awk ah cawnpiak khawh ahcun kanmah minung asi lai. Mi thluak tha hi Dalaan an tam tawn. A fim mi le afit mi an si caah, kanmah minung ah kan siam khawh hna ahcun bawmhchan tu tha bik an si kho.

Upadi hmai ah mipi vialte kan i ruang lo ahcun Nuhrin covo buar asi. Nuhrin covo buarnak ah Rule of Law aum khawh lo. Rule Of Law aum lo nak Federal pennak aum khawh ve lo. Ralhrang pennak le ANASIN pennak lawng a um ve. Cucu maw Federal ram ah lutpi tu ding Kan ralkap cu an si kun? Credit: Joseph R. Thang

Be the first to comment

Leave a Reply

Your email address will not be published.


*