Chin Pasaltha Salai Ngun San Aung Capar

SAC Ralhrang nih Hakha peng Chung A hmasabik Minung 5 Warrant an Chuah Kumkhat tlin Ni.Nihin cu ka hun ithangh bak ah ka phone cakuat luh thawng “tting” tiah a hung ring. Ka phone cu ka hei banh i ka vun zoh cu Aussie um ka kawi Ramtin Thei sin in a si. Anih cakuat cu nungak kong si hoi ko lai ka ti i huam set lo khin ka vun kau cu ka philh dengmang mi a luancia kumkhat lio i a cangmi ka nunchung ah ni biapi taktak kong a si. Hmanthlak pahnih a ka kuat i a tang teah “Nikum Warrant an in chuah hna ni a si” timi ca tlangkhat te a ka kuat chih. BD wish zong a silo i catang sang awn ni le degree lak ni tibantuk ni sunglawi kong theihter than nak asilo i mitthli he thinphan thlalaunak in ningtih ni kong a siko nain ka Kawi cungah kaa lawm i ka upat fawn. Khua ka ruat colh. Kumkhat a si cang nain nizan i a cangmi thil bang ka mitthlam ah pakhat hnu pakhat muicawl zoh bantuk in nikum March 13 le 14 zing i a cangmi thil vialte kha an hung cuang than.

Cucaah ngaihchiatnak lei siloin relnuam bantuk in tial than i hawile pawl hrawmh cio kan duh hna. Lam kan zawh thawk tein a kan zohkhenhtu tampi lak ah Warrant i aa tel vemi Salai Van Tin Lian le a lo thlam ah tlamtling taktak in eidin le thilpuan siseh lamzawhnak ah thlah le zanlei himbawm tein don i a thlam ah chiah than tiang tuanvo a kan la pengtu kan upa pakhat an um. Cun a caan ah kan thil a rak kan suk piak tawntu kan farnu Zing Khun zong philh awk a tha lo. (Atu cu CR ah a um ve cang). March 13 zan hi Salai Elishama hmundang ah a riak. Kei le ka naule pathum Salai Phun Sang le Salai Tial Chawn (Tleicia hna) le Salai Za Hre Lian nih an ka riah pi. Zan a vun tlai deuh ah khin cakuat he phone chawnh he a ra thluahmah ko. Minung panga hmanthlak cu Hakha khuapi chung hmunkip ah an tar i sualpuhnak pohmah a phunphun benh in tlaihnak ding Warrant chuah kan si. Cucaah khuachung i a ummi Salai Van Tin Lian cu kanmah sin Lo ah riah dingin kan va lak zokzok.

A phak bak in khu le phak in zanlei i palek nih tlaih an timhnak a inn an fuh i amah ve hrat a si caah hlan lio Hairawn Lian Dang bang an inn hnulei in a zuan nak kong a kan chimh. Kan hmuh ve lo caah zeitin a zuan cu a chimning paoh kha um ee kan rak tlaih ko. Phanah lo tein Salai Mang Hre Lian te inn (The Chinland Post office) ah a rak chuak i kan Naupa Salai Za Hre Lian nih a va lak hi a si.Dr. Cungpi he kan upa Ni Ceu kong hi mah lio an dirhmun fiangin ka hngalh lo caah ka telh ti lem lai lo. U Van le Elishama he kannih pathum cu Tio lei ah i kal ko seh tiah bia kan khiah. Hakha Campaign for Justice i kan riantuan ti hawi pawl he online in thlahnak le i hnemhnak bia zaza kan i cah hna. Kei le Elishama hi cu tlaih dingin a thawk tein ngiarmi kan rak si ko caah kan zei a poilo kan ti ko nain hmanthlak bak vun tar i tlaihnak ding catlap chuah timi dirhmun vun phak ahcun hnak a fak i hnarno ruh a tam ruangmang ko.

Hi zan ah hrelh awk tha lo buainak nganpi kan rak tong. “Salai Van Tin Lian nih, nang le Elishama vial nan i dawhnak hmanthlak an benh i kei vial a hlan lio ka hmanthlak tthing kaa dawh lo nak bik an ka benh piak. Hmanthlak dang ka kuat hna lai i rak thleng hna seh” ti a s.Dr. Cungpi si ve hoi kaw thil sining a hngal ve lomi nih Happy Birthday an rak ti rua. Kan ttah lak ah kan rak nihkhenh lennak tete an si. Zanriah zong cu kan naule nih mehthaw ngai an chuan ko nain eichung te a pil ruam lo. Zan cu kan tlangval pawl nih sentary kan cawng lai maw ti a si. Lo thlam tiangtiang cu an kan fuk hraw lai lo dah tiah cuticun ihnak kan hrui hna. Zantim ah kan riahnak lo lam lei sang i a ummi an uico pakhat kha a bo lengmang ko. U Van cu mah khan a rak ihngilh ti ai lo. Kawi Aung tho tuah palek le ralkap an ra i si ko lai uico bo ning a hman lo ti a si. I thial ko usi a ka ti. March thla i Hakha zan cu a kik ngai rih cu mu. Voi tamtuk a ka tthangh cang i thial lo zongah hngilh khawh dawh ka si tilo caah kan puantom le pher zunkhat he kan unau thlamdang ah kan va i thial.

Kan naule tu kha nannih hika hin ral rak veng ko kun uh kan ti tak hna. U Van kha rak thial pi hlah ning law a tom te men hnga ti ka ruah ah ka thialpi kha a rak hartuk nain ka lung a dam ngai ve.A thaizing cu ka naupa Phun Sang le hawi pakhat nih an kan thlah i Tio lei kal cu kan ithawh. Lampi ah kan Uu Nu pakhat nih dinti le changreu ti bantuk lampi ei ding tam ialte a kan rawnh.Camp kan phak hnu ah Hakha lei ah buainak pakhat a rak chuak hoi. Cucu hitihin a si. Kan hawi kan U a simi pakhat nih “Van Tin Lian te hna hmanh Warrant an chuah i ziah kei an ka chuah ve lo” tiah khuachia lakphak dinnak ah a buai ti si.Cuticun Hmanthlak dawh le dawh lo deuh kong he Warrant i cuh he ttah lak ah kan rak nih caan a tampi.Khuakhat laihawi semnak khuazung le chumtual in chungkhar ngaih caan a tam ko nain Pathian lamhruai le huhphenhnak thawngin kumkhat a tlin tiang nung le dam tein kan phak lawng siloin miphun le ram caah kan si khawh tawk cio tuan khawhnak caantha zong kan hmuh caah Bawipa cungah lawmh loin ka um kho lo.

Credit:Salai Aung

 

Be the first to comment

Leave a Reply

Your email address will not be published.


*