Chin ramkulh chungah Pyituhsit training an tuah ve cang timi thawngpang kong hih!

ZRA Nih Tedim Peng Chungah Khuami Pyituhsit Training An Pek Hna!
===
Chin ramkul, Tedim Peng Ciingpikot khua le Keiizang khua ah khuami hna cu ZRO/ ZRA nih pyituhsit traning January 16 in 18 tiang nithum chung raltuk ning an cawnpiak hna, tiah theih a si.
ZRA nih Ciingpikot khua le Keiizang khua i training an pekmi khuami hna hi an dihlak minung 200 renglo an si.

Tedim Peng Ah ZRA-EC Nih Mipi 100 Renglo Pyituhsit Training An Pek Hna! Chin ramkulh Tedim peng Cingpikawt khua ah Zomi Revolutionary Army- Eastern Command (ZRA-EC) nih tualchung mipi zakhat (100) renglo hna cu (Pyituhsit training) raltuk an cawn ter hna tiah theih a si.

Tangkhawng [January] 16 in 18 tiang raltuk cawnnak (training) an tuahpi hna i minung 120 a cawngmi an si tiah theih a si. Zomi National Volunteer ti in min aa pemi an si i a tuhi a voi 8 nak Pyituhsit training an tuahpi cang hna tiah theih a si.

Chin ramkulh chungah SAC ralhrang a dohtu Mipi kan ralkap dihlak a dohtu an si i CNA telh in Chin mi kan ralkap hna he zong aa kapmi an si caah zeibantuk timhlamhnak ruang ah dah a tubantuk in mipi hna training a pek hna ti cu theih a si lo tiah Khonumthung Buremese News nih a langhter.

SAC Nih Thimnak Tuah Timhmi Ah Mizapi I Tel Lo Dingin Chinland Defense Force-Hualngoram Nih An Thanh. Hramhram uknak latu SAC nih thimnak tuah an timhmi ah i teltum lo ding le bawmhchanh lo dingin mizapi sinah Chinland Defense Force-Hualngoram nih theihternak cathanh an chuah.

An cathanh chungah hramhram in uknak le nawlngeihnak latu SAC nih, a dikmi cozah si khawh nakding ca ah tukum 2023 ah thimnak tuah an i tim. Cu kong he pehtlai in SAC nih a lang pavuan in thimnak tuah an timhmi hi CDF-Hualngoram nih kan cohlang hrimhrim lo.

Cu thimnak ah mizapi zong i teltum lo ding le bawmhchanh lo dingin CDF-Hualngoram nih an langhter. SAC nih thimnak tuahtimhmi hlawh a tlin khawh nakding ca ah bawmchantu phu, department le pumpak nan si ah a herh ningin dantatnak kan in pek hna lai, tiah cathanh an chuah.

Thimnak Ding Caah Mincazin Latu Pa Le Khuabawi Pa 2 Kahthah An Tong! Bago ramṭhen HṭanṬa Bin (ထန်းတပင်) peng ah khuabawi rak ṭuantu pa a hlun nih a tharṭuan aa timmi pa cu theihter a tuah dih hnu ah inn lei an ṭin pah ah an kahthah hna tiah theih a si.

Tangkhawng[January] 17 zing ah kawl pathian puai tuahnak hmun ah khuabawi hlun Khin Maung Win nih khuabawi thar ṭuan aa timmi Soe Nine cu kawl pathian puaituahnak hmun ah theihternak a tuah hnu in innlei an ṭin pah ah an kah hna i moṭor chung ah an ruak in laak an si. Midang hngakchia pakhat zong hliamhma a tuar tiah tualchungmi nih Khit Thit ah an chim.

Cubantuk ṭhiam in Bago ramṭhen Kyaukkyi (ကျောက်ကြီး) khuapi ah inn 100 uktu sang khuabawi Thein Lwin cu SAC ralhrang thimnak ding caah mincazin an lak lengmang i tualchung hriamtlai nih an kah thah tiah theih a si. U Thein Lwin cu ralhrang thimnak ding caah mincazin a lakpiak lengmang hna ruang ah kan kahthah tiah tualchung hriamtlai Bago Region PDF nih cathanh an chuah.

Datsi Phurtu Tilawng A Puak, A Thimi Le Hliamtuarmi Le A Tlaumi An Tam I Myanmar Rammi Zong An I Tel! Thailand ram, Samut Songkhram ramchung, Mae Klong tivapi ah datsi (Oil) phurtu tilawng pi cu Tangkhawng [January] 17 zinglei suimilam 9:00 tluk ah a puak i minung 1 a thi. Myanmar rammi minung 3 le Thailand rammi minung pakhat nih hliamhma an tuar i Myanmar rammi minung 6 le Thailand rammi minung pakhat an tlau tiah theih a si.

Mae Klong tivapi ah ummi tilawng remhnak hmun ah remding in an dinhter chungmi tilawng cung i an remh lio ah a puak tiah theih a si. A thimi pa hi tilawng in meter 500 tluk hlatnak hmun ah a ke khat lei hmuh char a si i mizei a si ti cu thawngfiang an thanh rih lo tiah theih a si. Tilawng cung ah rian a ṭuantu hi Myanmar rammi telh in minung 10 hrawng an si i tilawng remhnak hmun ah rianṭuan tu hi minung 30 hrawng an si tiah Bangkok Post nih a langhter.

Nizan Zingka Ah Yangon Khuapi Kandawgyi Ti-Dil Chung Ah, Kan Mah Lai Mi RUAK Char A Si! Chin tlangval kum 26, Van Lal Malsawma tiah theih mi cu, nizan zingka ah khan Yangon khuapi Kandawgyi ti-dil chung ah RUAK in hmuh si. A nih hi Yangon Chin Baptist church (CBC) member chung tal a si tiah theitu hna nih an chim. A thihnak konglam he pehtlaiin„ bia fiang theih khawh si rih lo, A sinain, Yangon khuapi nawlngeitu hna nih a thih ning konglam hi an dotthlat lio pi si.

SAC ralhrang nih Myanmar’ Sagaing ram Shwebo khuapi ah Thin Thin Wai cu an tlaih. SAC ralhrang nih cun hi an tlaih mi Thin Thin Wai nih hin Mipi ralkap PDF hna cu a bawmh tawn hna tiah an puh.
Hikong he pehtlaiin, ralhrang nih an puh mi cu Thin Thin Wai nih hin NUG le PDF thatnak kong hi social media ah a comment mi a phone ah an hmuh caah an tlaih mi si thonginn ah zeitik tiang dah an hren lai tihi chim awk tha rih loh.

Myanmar’ Bago Ram Nattalin Peng Ah Minung Pakhat Cu Motor Mawngh lio Ah Thi Lak In An Kah Thah! Nattalin peng hlahpah khua mi, Mr Win Zaw Tun kum 25 mi cu SAC ralhrang security gate vengtu nih thih lak in an kah tiah theih si. meithal kuan nih hin a lu zah ceu cu a choiter fawn. A RUAK hi Nattalin khua mi upa cheukhat hna nih an lak i an khua ah an vui tiah theih si. Credit: The Chin Post, Lungmili Post

Be the first to comment

Leave a Reply

Your email address will not be published.


*