Chin Ramkulh USDP Zung A Kaang nak kong update!

Chin Ramkulh USDP Zung A Kaang!
========
Chin Ramkulh Ralhraang Council Zung pawng ah a um mi Ramkulh USDP zung cu tuzing October 3 suimilaam 1:00 tluk ah a kaang tiah thawng kan theih.

Hi kong he pehtlai in 2020 rampi thimnak ah USDP in Hakha Peng, Pyithu Hluttaw mee hmun ah aa cuh mi Pu Sang Cung nih, “Thawng fiang in kan thei kho rih lo. Kan hlat cuahmah lio a si. Suimilaam 1:13AM hrawng ah zung pawng a um mi pakhat nih nan zung a kaang tiah phone a ka chawnh. Zing khua a dei hnu ah a kanghnak ahcun ka va kal. A kanghnak a ruang hi kan thei kho rih lo,” tiah THP ah a chim.

Inn kangh ruang ah inn a cungcih, thlalang awng le thing a si mi pohpoh cu an kaang dih. Cun, a chung i zung thilri vialte zong a kaang dih tiah kan theih. Cun, zung a kangh lio ah zung hngak ah an chiah mi pakhat zong a um i amah tu cu him tein a chuak kho tiah kan theih.

Zung kanghnak kong he pehtlai in Ramkulh USDP chairman Dr. Hmuh Thang le Secretary Pu Cung Bik zong kan chawnh hna nain thawng fiang kan thei kho ve rih lo tiah an kan leh. Zung a kangh lio ahhin ruah zong fak ngai in a sur i puahkeh thawng tete zong a thang pah tiah khuami sin in kan theih.

Zahan October 3 zinglei suimilam 2 hrawngah Hakha ummi USDP party zung a kaang, tiah theih a si. Tualchung mi pakhat nih, “Zahan zaan ah USDP party zung cu a kaang. Ruah a sur, nikhua a chia i chum a zaam tuk tikah a pawngkam hmanh in a kanghmi hi ai thei huaha lo. Zeitin dah a kangh ning a si timi zong kan hngal lo,” tiah The Chin Post ah a chim.

Kum 2023 kan naih cuahmah cang i rampi thimnak zong kan naih ciahmah ve. USDP party nih hin Chin ramkulh huap in thimnak kongah cawlcanghnak ngei hna sehlaw a lo. Cu ruangah an zungpi a kangh hi a si kho men, tiah tualchung mi hna nih cun an zumh kong a chim.

A luancia August 31, deilei suimilam 2:30 ah Chin ramkulh, Hakha khuapi Pyidawtha sang Vom Thu Maung pumpululh certual chak sakremhnak (construction) zung zong a rak kangh pinah sakremhnak zung i rianṭuantu AE(lam rianṭuan bawi) telhin minung 11 an rak tlau.

Chin Ramkulh Chungah Motor Khaltu Le Pension La Cangmi Hna Cu, SAC Thawng Pe/latu Ah An Hman Hna! Prime minister minthutnak he Nayphidaw ah an kuatmi report peknak ca chung ah Chin ramkulh chungah motor khaltu hna le cozah rian in pension a la cangmi hna cu, SAC nih thawng pe/latu ah a hman hna tiah aa tial tiah theih a si.

Cu report peknak ca i, cahmai 65 nak ah pengkomh tualchung mipi hna chungin pension a la cangmi le motor khaltu hna cu, thawng petu ah a hman hna i, motor khaltu hna nih, lam um tu ning, lam ai pehtonh ning an chim mi kong ai tel tiah theih a si.

Cun khoi ka dah CDF nih sakhaan an chiah? CDF minung pa zeizat dah an si? CDF hi zeitindah an cawlcangh? timi le SAC nih security an lak ning vialte zong cu report peknak ca chung ah cun ai tial tiah theih a si.

Lamchiat Tuk Ruang Ah Thantlang Peng Thilman Kai Khun! Chin ramkulh Thantlang peng chung mawtaw lam a chiattuk caah a hlannak in ei-din le thil dangdang man a kai khun tiah, kan theih.

Mawtaw ngeitu pakhat nih cun,”Thantlang le Timit lam kal khawh a ngah ti lo caah Laikua lam hi hmanmi a si i furpi a si caah mawtaw lam a chiatuk, Laikua in Hmumthar khua kar ah hin nithum hna kan rau. Mawtaw ai tap peng i JCB kan hlan in kan i dawhter peng caah voikhat khualtlawn ah JCB dawhman hi sing 10 hna kan dih i thil hi deng tein phurh awk a tha bak lo,” tiah The Chin Post ah a chim.

“Furpi a si caah thil phurh man a kai tuk, Arti pumthum ah thongkhat a si, Mamee pakhat ah 500 a phan, Datsi langkhat ah 4000 a si cang, thilman dangdang zong a hlannak in a let in a man an kai dih caah kan nih ralzaam in khuate lei a rak i dormi kan caah cun khuasaknak hi a hartuk, nikhat kan nihlawh nih chiti langhnih hmanh a caw kho ti lo i kan lung lawng a dong ko,” tiah ralzam mi pakhat nih a chim.

Uknak lak hnu in dollars thlen a kai tuk caah thilman a kai tuk i ram mipi hna nih ei-din kong ah harnak fakpi ton a si, a bik in Thantlang peng khuate hna ah cun lamchiat tuk caah thilman a let tampi in a kai i mipi hna nih pawcawmnak caah an lungre a thei ngai hna.

Mindat pengchung ah mipi thilri a firtu mifir pakhat CDF-Mindat nih an tlaih. Chin ramkulh, Mindat pengchung ah mipi thilri a firtu mifir pakhat cu CDF-Mindat(Thein Hngiat battalion) nih an tlaih tiah theih a si. Mipi lei nih phuannak a um caah cu mifir cu October 1, ah tlaih in kan hren tiah Thein Hngiat battalion phu nih an chim.

Tlaih a tongmi mifir cu a voi hnihnak kan tlaih a si cang tiah CDF-Mindat battalion Thein Hngiat ṭat-yin-hmu nih The Mindat Post ah a chim. “Khuachung ah cycle a fir i aa zampi caah kan auh i checkhlatnak kan tuah, atu hi kan hren chung, cu hlan zongah khuachung ah zurit buin buainak a chuahpi caah tlaih a rak tong bal cang, ralrinnak pek cangmi a si” tiah a chim chap.

Atu cu thilri a fir caah kan hren chung, a mah zohkhenhtu minsen thutnak he sualphawtnak phaisa liamter hnu ah thlah an timh tiah theih a si. Credit: The Chin Post

Be the first to comment

Leave a Reply

Your email address will not be published.


*