Chin Wrestlers hna, Nagaland ah an kalmi hi, tuanbia dawh ngai an ttial!

Chin Wrestlers hna, Nagaland ah an kalmi hi, tuanbia dawh ngai an ttial!
=========
Chin Wrestlers hna, Nagaland ah an kalmi hi, tuanbia dawh ngai an ttial tiah ka ruah i ka thangtthat ngai hna. Tutan hi a voi 2nk an kal a si cang i, teinak Salu belte an tlunpi kho rih lo. Naga wrestlers pawl ka zoh hna tikah ah puanrua a ttha. An tung a sang. Natural in Mipum rua ttha hrimhrim an si timi hmuh khawh an si. An pumrua a tthat tikah a tthawng zong an tthawng deuh ve hrim.

Naga pawl an ipaih ning zoh tikah, thazaang tthawn hi 90% a herh lai tiah ka ruah. Thiam nakin thazaang tthawn nih lai a rel deuh lai tinak a si. Chin Miphun tuanbia zoh tikah hlan chan, generation 5 lio hrawng ahcun mipum rua ttha, a thawng taktakmi an rak si ve ko timi hi inn-lo an rak sakmi an kutneh in hngalh khawh a si. Asinain chan thar belte ahcun an hme tuk cang.

Chan thar ah kan hme hi ruah-dawm in chim ahcun sifah, ei chiat ruang deuh ah si sehlaw ka dawhter bik. Cucu a dik ahcun, kan thangcho deuh tikah kan ngan deuh tthan ve te lai tinak a si hnga. Chin scholars tampi, Chin tuanbia a ttialmi hna nihcun, Chin Miphun hi, Kalay-Kabaw lei in a rak kaimi in an chim dih. Asinain dik dawh an si lo.

Ram dang kan chuah hnu ahhin Naga, Minipur tbk le Budhtan pawl an sining le an nunning zoh tikah kan ikahhnak/ ilawhnak a tam taktak. Cucaah, Chin Miphun hi Kalay Kabaw/ Kawl rawn lei in a rak kaimi si nakin, Map zoh tikah, Tibet in, Nagaland ram in, Minipur ram tbk lei in a rak ttummi, a karh vima Miphun si dawh deuh in a lang.

Cutin a si ahcun, Naga Miphun he hin a nai ngaimi unau si khawh ngai kan si i, Naga pawl hi an pumrua a tha ngai. Hlan lio Chin Miphun zong mi ngan pipi an rak si ko tikah, Chin Miphun hi a hme mi Miphun cu kan rak si lo timi zong ruahdawm khawh ngai a si. Cucaah, Chin Miphun chung in, Naga wrestler champion tei khotu Mipum rua ttha, mi tthawng tak an chuak ve te ko lai tinak a si. Credit: Zasang Cinzah

Rung Lian Ceu hi a hlan ah ka uar lo. Biak Hmun Sang lawng hi Rung Lian Ceu teitu si ka ti i Biak Hmun Sang ka rak lawmhpi ngai. Nain mu Rung Lian Ceu hi tlaichan lo awk a rak ttha lo. A tuanbia zoh ta hna usih. Hakha a tlung i, mi vialte nih a paih zoh an i ngaih hlei ah Hakha Chin Miphun ni ah minung a karh. Champion vialte a hui dih hoi. A rak lar lawlaw. BHS a tlung ve le zei huaha a rak si lo.

Nagalang ah a kal tthan i kha vialte minung ah khoika dah kan hmuh khawh ti hna lai. Billy Graham hlah maw Thawngttha a chim ti awk in mi an khat. Mipi nih Rung Lian Ceu an tanh i mipi an ai that le an au ttha kha ti awk a ttha lo. A mah nak lianlian a cawi hna i a tenh hna. A tengh ning hna zong a dawh. Semi final tiang a rak kai.

Van chiat ah a mah le a mah a teng sual. Champion a co lo nain paih dawh laksawng a co. A sung lawi tuk hringhrang.
2021 ah Biak Hmun Sang nih Rung Lian Ceu cu a tei sual i mi vialte tei ding ah a ruat. A tak mawh ve lo. Pa tthawn bak van tenh ve ko cu. Cu le cang ka in Nagaland kal a tim colh. Mipi nih BHS nih a tei viar hna lai tiah zumh a si.

Vaurawng ah bia an hal i “Zeitluk in dah na zumh? tiah an hal. A lehmi hna cu, an ei le kan ei zong a lo lo. An thiamnak le kan thiamnak zong a lo lo. Naga paih zong kan cawn i kan thiam tuk cang. Zei ti hmanh in a kan teinak ding a lam um lo tiah a chim. Vaurawng host Pu Mawi theu kan ti cu, hi ti hin bia na chim.

Ruat lo pi ah in tei sual hna sehlaw zeitin dah bia na chim tthan lai tiah a hal than i, an ning a zat lo maw ziah an ka tei lai i, ka caan a si. A ka teitu ding an um lo tiah a rak leh.” Naga pawl hi ningzat an rak thei taktak lo i si lai. Fawi te in an tei ko ai. Biak Hmun Sang nih a ho hmanh remrelh te in a teimi hna an um lo. Biak Hmun Sang nak in Uk Lian Thang hmanh a thiam deuh tuk. A tthawn deuh tuk.

Naga a phan hnu ah bia an hal tthan i “Naga cu an paw puar lawng a si ko” a ti rih. Rung Lian Ceu teitu a pai lai lo an ti zeitin na ruah? “Angamh lo i si lai a ti.” Biak Hmun Sang hi vawlei cung a mah lawng rak um sehlaw a tthawn cem si lai.

Laimi paih zeitik hmanh ah a thancho lai lo. Zir paih in an i pai. Cun Paih tlangtlatu zong nih PPV (tangka rumro kawlnak nan hman) na ti, ba ngia nan ti i mipi thazaang peknak a um lo. Mipi nih zoh mi le lar mi si hi phaisa nak in an duh deuh lai.

Bible hmanh nih “min that maw na thim lai chawva dah ti na si ah cun min that va thim deuh” a timi kha a si cu.
Laimi kan zia le kan lungput hi kan thlen a hau. Kan bia chim zong kan i sum a hau. Rung Lian Ceu teitu taktak hi laimi ah um lo. A tluk tu zong an um lo. Nagaland pathawn a tei kho tu ding cu Rung Lian Ceu lawng a si. Credit: Global Vil

Tuhnu kum 5 ah zei dirhmun kan phak hnga? Hmai kum khi MAH nih thimnak a tuah lai, tlam a tlin ahcun USDP nih kum 5 chung an kan uk te lai. Tlam a tlin lo sual ahcun ralkap nih 2008 constitution hrawh in uknak an lak beh te lai. Nain, thimnak ruang ah Laitlang cu tampi ai thleng lai lo. Khuate 90% cu miphun ralkap uknak tang ah a tlawm bik kum 5 cu a um rih lai.

CDF an um chung poah cu ralkap nih khuate an uk khawh nak ding lam a har tuk. Khuate kip ah ralkap sakhan chiah khawh asi lai lo. Cun, tuhmawng pakhat ah cakei pahnih umti awk a tha lo an ti bang, hriamtlai phu anmah le anmah kar buainak a um pah te lai. Hriamtlai phu tam nak Nagaland le Manipur state, Shan state bantuk kan lawhnak a tam pah te lai. CNA lila khi a singkhaw ngammi an um te lai.

Khuate ah sianginn a kaimi hna cu catang sang deuh university le college kai chap an duh caan ah ralkap cozah sianginn pawl nih an cohlang duh hna lai lo. Cozah sianginn ah a kai lomi hna cu catang ngeilo bantuk an lo te lai. Khuate ah college le university ser awk a tha hoi lai lo i khuate mino zaangfak ngai an si te lai.

Khuate lei cu cozah zung nih lam an remh kho ti lai lo caah umkal a har chin lai. Suimilam 3 kal tawnnak khua kha ni 2, ni 3 hna kal a si cang lai. Lampi ah check tuktak, phaisa hal, tlerh le thil chuh a tam te lai. Tikah, khuate ah khuasak lungdong in fale cozah sianginn an kai khawh nak hnga tiah ramdang ah cawmtu a ngeimi hna cu khuapi ah an i thial cio te lai. Sifak deuh khuate ah an tang lai. Yangon, Mandalay, Naypyidaw le Maymyo ah Laimi kan i chap ngai te lai tinak a si.

Atu cu 2008 siikan ning tein kan control an ti, uknak lei minung hna khi mi sawh2 deuh rian an pek hna. Uknak an lak beh ahcun Laitlang uktu lubik khi Rungtlang ralbawi lubik khi a si te lai, chief minister a um ti lai lo. Ralkap nih cozah uknak vialte an control te lai. Crd-Salai Lungthlitum. Cakilh tu lio kan Chin ramkulh ralbawi hi Ruangtlang um Headquarters of the Northwest Region in Deputy Commander Brigadier General Myo Thut Hlaing a si.

Seikphyu Peng Ah Bomb Puahhnawh Nak In SAC Ralkap 7 An Thi, Phalanma Khua An Khangh I A Ciam Dih, Magway ramṭhen, Seikphyu peng Phalanma(ဖလံမ) khua pawng ah SAC ralkap cu, bomb nih a puahhnawh hna caah a tlawm bik ralkap 7 an thi, Phalanma khua zong an khangh i a ciam dih, tiah tualchung mi hna nih an chim tiah theih a si.

October 19 ah SAC ralkap nih Kyunchaung le Ywatharkone khua karah zanlei sml 5:30 in 6:00 tiang hriamngan le hriamhme he an kah i Aigyi khua sianginn um sayamah a inn le khuami pakhat inn ah hriamngam a tla i an rawk dih. SAC ralkap pawl cu zan sml 7:00 hrawngah Aigyi khua in Phalanma khua lei an kal lio ah bomb puahhnawh an tong i SAC ralkap 7 an thi i tam ngai hliamhma an pu, tiah Seikphyu PDF nih an langhter.

Inn 50 hrawng a ummi Phalanma khua cu SAC ralkap nih October 20 ah an khangh caah an khua ning in a ciam dih, tiah theih a si. “Inn pakhat sak timi hi a fawimi thil a si lo. Kum tampi timhlamhnak ngeih hnuah sakmi a si. Khuami inn le lo khanghpiak a hmangmi SAC ralkap teinak dingah PDF ralkap hi a lamkip in kan bawmh hna a hau,” tiah We Love Seik Phyu phu in ralkap pakhat nih a chim.

Cuba Ram Vanlawng Khaltu Pa Cu Soviet Russia Sermi Vanlawng He American Ram Ah A Zam, Cuba ram vanlawng khaltu pakhat cu Soviet Russia sermi vanlawng pakhat he American ram ah a zam, tiah theih a si. Cuba rammi kum 29 tluk vanlawng khaltu pakhat cu Soviet Russia ser thla pahnih ai thuatmi vanlawng hme pakhat he a zuang i, Florida thlanglei vanlawng tual pakhat ah a tum tiah theih a si.

American cozah nawlngeitu hna nih a hlankan in pehtlaihnak tuah loin ruah lo piin Florida ah a rak ṭum, zei ruang ahdah a si ti cu kan hlathlai cuahmah, tiah an langhter. Vanlawng khaltu nih vanlawng diesel a dih deng cang caah vanlawng lei tawlreltu hna cu ṭumnak nawl a hal hna hnu ah a ṭum hi a si, tiah theih a si.

Cuba media pakhat nih cun, Cuba rammi vanlawng khaltu pa cu American ram ah vanlawng he a zam tiin an langhter hnuah vanlawng khaltupa a nu le a farnu cu Cuba ram nawlngeitu nih an tlaih hna, tiah theih a si.

Wetlet Peng Ah SAC Ralkap Nih Tualchung Mi 2 An Thah Hna, 5 Hliamhma An Pu, Sagaing ramṭhen, Wetlet peng nichuah lei ah SAC ralkap nih hriamngan le hriamhme he nihnih chung an kah caah tualchung mi 2 an nunnak a liam i a zammi an tam, tiah tualchung mi hna nih an chim tiah theih a si.

Nihin October 22 ah SAC ralkap nih Wetlet peng nichuah lei ah rallam an sial caah Chaungmitu(ချောင်းမီတို) khuami hna cu an zam dih i Tamankyin(သမန်းကျင်း) khua lei ah a zammi nuva hna cu SAC ralkap he hmaitonh in an i ton caah SAC ralkap nih an kah hna i, a vapa Aung Ngwe cu a hmun ah a nunnak a liam, a nupi Daw Chu ca zong thinphang ngaingai a si ko, GZ Special Task Force Wetlet nih an langhter.

“Nizan October 21 zanlei sang ah Wetlet peng a hnulei Hlataw sakhan in SAC ralkap nih hriamngan an kah caah Metone(မဲကုန်း), Gyikan, Pinzin le Dunteykone(ဒွန်တဲကုန်း) khua ah hriamngan kuan a tla i, Duntey khuami 3 hliamhma an pu i 1 a nunnak a liam, tiah theih a si.

Monywa No. 2 Palik Sakhan Hmai Ah Sentari Congtu Palik Pahnih Kah An Ton Caah Pakhat A Thi, Sagaing ramṭhen, Monywa industry zone sang No. 2 palik sakhan hmai ah sentari congtu palik 2 cu, nizan October 21 zan sml 9:00 hrawngah kan kah hna i palik 1 a thi, tiah Golden Eagle Force- Monywa in Lin Yung nih a chim tiah theih a si.

“Sentari a cawngtu hi palik 2 an si. Zan sml 9:00 hrawngah kan kah hna i cu chungah palik 1 a thi. A hawipa cu a ban ah meithal kuan nih a khen. An ruah padamh in an kan kah ko nain, a thimi le aa hliammi kan um lo,” tiah a chim chap. A luancia October 16 lio zong ah Monywa khua um, tarnu tarpa an chiah hnanak inn in thlanglei ah Golden Eagle Force- Monywa le SAC ralkap kar kahdohnak a chuak i, SAC ralkap 1 a rak thi.

Hinthata Khua Ah Bomb Puahnak In Traffic Palik Soe Min Than A Thi, Ayeyarwaddy ramṭhen, Hinthata(ဟင်္သာတ)khua chungah October 13 zanlei sml 4:00 ah bomb puahnak a chuak i, Traffic palik Soe Min Than cu fak tuk in a rak i hliam caah nizan October 21 ah a hliam hma he a thi, tiah theih a si.

Bomb a puahnak a hliamhma cu a fah tuk caah Hinthata sii-inn in Yangon sii-inn ah an kalpi nain a dam khawh hlei lo caah, nizan October 21 zinglei ah a thih hi a si. Cu bomb puahnak ah palik 4 hliamhma an pu i, 2 hliamhma fak an tuar, cu lakah traffic palik Soe Min Than pakhat lawng hi a thi mi a si, tiah theih a si.

Myaung Peng Ah SAC Ralkap Nih A Nu Le Pa Chanhchuah Dingah Ai Tim Mi Pum tlamtling Lo Pakhat An Thah, Sagaing ramṭhen, Myaung peng Shwe Bung Thar khua ah SAC ralkap an lut i, hringtu a nule a pa bawmhchanh le chanhchuah dingah ai tim mi pum tlamtling lo pakhat an thah, tiah CDSOM sinin theih a si.

October 19 zing sml 5:00 hrawngah Kyaukyit sakhan in Shwe Bone Thar khua chungah SAC ralkap pawl cu an lut i, pum tling lo Myint Oo(kum 45) cu SAC ralkap nih an thah hi a si, tiah theih a si. “SAC ralkap cu Shwe Bone Thar khua ah ruah lo piin an phan i, khuami cu anmah le himnak cio ah an zam dih.

Pum tlamtling lo Myint Oo cu a nule a pa kaltak awk an ṭhat lo caah an inn lei a ṭin i, innchung a luh lai ah SAC ralkap nih an kah,” tiah CDSOM in ṭuanvo ngeitu pakhat nih a chim. SAC ralkap nih khuami an inn le an lo an hrawhpiak hna pinah tangka kyats sing 1,850,000 le phone lung 2 an fir tiah theih a si. Crd-The Chin Post