Chinmi Cu Aho Uknak Tang Hmanh Ah A Um Bal Mi Kan Si Lo Caah

Chinmi cu aho uknak tang hmanh ah a um bal mi kan si lo caah miraang nih a kan nam lio 1826 in hriamnam he ukpen a kan tim mi paoh a nam hmasatu hna kan si. Kan miphun humhak, kan ram, kan nunphung le caholh kilven ding ah fung-zum le lung-zum i put in ralpi a do ngamtu kan si. Cu kan lungput cu Miraang nih India ram, Kawlram le Chinram tuk/lak ding ah tuanvo nganpi pek mi ralbawi pakhat General George White nih a hmuh tikah, “Chinmi hi ral ka tuk mi vialte lakah a thawng bik le tei har bik mi an si,” tiah a ti phah. Kan nepte loh! Kan miphun nih hriamtlaih in kum 34 chung kan dohnak fawite hlek in nawr khawh mi miphun kan si bal lo, nihin kan dirhmun zong zoh ulaw Chin State cu CDF/CNA nih an uk dih ti tluk a si cang. Culawng hlah Kawiram tuanbia ah min langsar bik ah ai tel peng mi kan si.

Kan pale Dr. Lian Hmung Sakhong, Dr. Sasa le Vice President Henry Van Thio, si hna seh, British le Japan rak dumdawi lio ah minthang kan pale tampi Kawlram tuanbia ah milangsar kan ngei hna. 1952 Burma Baptist Convention ah Erville E. Sowards nih, “Kawlram nunnak ah Laimi nih a biapi ngai mi dirhmun ah an phan chinchin te lai ti ka zumh bak,” tiah a rak chim mi a tling cuahmah ti khawh a si. Cucaah thangthar mino, sempi laitlai hna, Chin miphun hi kan nepte lo, kan nauta lo. Kan ram humhak ah lungthul loin tuan rih sih, hmainawr sih law Chinmi kan pa Lian Kung chiah khonnak Cox’s Bazaar, Rangamati tiang kan miphun i funtom in hoilen tlak Chinram kan ser te lai.

Salai C. Twintwin

Be the first to comment

Leave a Reply

Your email address will not be published.


*