Chinmi minung 2 ralhrang pawl nih an kan thah piak than mi kongah!

SAC Ralkap Nih Ngalai Khuami Pahnih An Thah Hna
======
Chin ramkulh, Matupi peng Ngalai khuami pahnih Pu Van Bik le Pu Lap Lian cu SAC ralkap nih an kah thah hna, tiah thah a tongmi chungkhar pakhat nih a chim. A luancia January 15 ah SAC ralkap pawl cu Ngaleang khua ah an lut i khuami pahnih cu an tlaih hna. Pakhat cu inn he an khangh chih i a dang pakhat cu Ngalai khua thlanhmun ah a ruak in an hlonh, tiah Matupi peng mizapi ukhruainak phu nih January 22 ah theihternak an tuah.

Ngalai khua pawngah SAC ralkap le Matupi CDF kar kahdohnak a rak chuak i kaphnih in a thimi le aa hliammi an rak um. Ngaleang khua pawng zong ah ruak 4 an hmuh i SAC ralkap maw an si khuami maw an si ti cu hngalh a si lo.

SAC ralkap nih Ngalai khuami inn le biakinn zong an khangh pinah khuami thilri zong an firpiak dih hna. SAC ralkap nih khuami an thahmi hna cungah ṭuanvo ngeitu dihlak nih ṭuanvo nan lak awk a si, tiah Matupi Pah Ah Phah nih cathanh an chuah.

Matupi peng chungah SAC ralkap nih thah nawnnak le thilri mansung firnak an tuah khomi a si caah mizapi ralring tein um dingin Matupi Pah Ah Phah nih an thanh.
SAC ralkap pawl cu Ngalai khua ah an lut i khuami an thah hna caah CDF Matupi nih Hakha-Matupi, Matupi-Mindat karah SAC ralkap pawl cu hmun 5 ah an kah hna i SAC ralkap 17 an thi, hliamhma pumi an tam, tiah theih a si.

Cawbuk Check Gate Hngak SAC Ralkap Nih Khualtlawng Mi Hna Cu Duh Paoh In Khual Nan Tlawng Kho Ti Lai Lo An Ti Hna! Chin ramkulh, Khualipi Hakha Cawbuk sang um check gate hngaktu SAC ralkap le palik nih, khualtlawng mi hna cu hi hnu cun duh paoh in khual nan tlawng kho ti lai lo an ti hna, tiah theih a si.

Khualtlawng mi pakhat nih, “Hi hnu khual na tlawn ahcun khua bawi le sang bawi nih khual na tlawn nakding theihpinak misen an thutmi catlap naa ken lawnglawng ah khual na tlawng kho lai. Cuti theihpinak misen an thutmi naa ken lo ahcun kan in kirter lai, an ka ti,” tiah The Chin Post ah a chim.

Hakha in khuate a kalmi an si ahcun sang bawi theihpinak catlap i ken a hau. Kir lei zong ah khualtlawnnak khua bawi theihpinak catlap i ken ṭhan a hau. SAC ralkap le palik nih January 20,21 le 22 ah khualtlawng mi hna cu an chimh dih hna, tiah theih a si. Khuate ummi pakhat nih khualtlawn tikah khua bawi theihpinak misen thutmi catlap i ken a hauh cang tikah khuate tampi ah khua bawi zong an um ti lo. Khua bawi an um ti lo cun khual tlawn khawh dawh lo phun khi a si cang, tiah a chim.

Khual nan tlawn duh a si cun khua bawi le sang bawi nih theihpinak misen an thutmi catlap i ken lawng a za lo. NRC number, cycle(motor) number le phone number tiang zong by heart nan zah dih a hau lai, tiah SAC ralkap le palik nih cun khualtlawng mi hna cu an chimh hna, tiah theih a si. Credit: The Chin Post

Be the first to comment

Leave a Reply

Your email address will not be published.


*