CNA/CDFs kan ralkap tampi a lungdong mi an um len e ti si!

CNA/CDFs kan ralkap tampi a lungdong mi an um len e ti si!
==========
2021 hnuah nunthap in dohthlennak a tuahmi hna CNA/CDFs kan ralkap tampi a lungdong mi an um len e ti si, sining vialte kaltak in ramtang ah hriamtlaih in thut um hi zaaran nih tuah khawhmi rian a si hrim lai lo. Cucu, CNF/A nih Kum 20 leng ramtang an um ah va bomh cu hun chim lo a ho mipi nih theih piak le theih pi hrim zong an rak tong lem hna lo.

A tuah an zei zong vialte kaltak in ramtang ah nunthap in a ummi hna CNA/CDFs mino hna cu hun chim lo, ramleng in CNA/CDFs caah voikhat voihnih te $100/$200 hun thawh hmanh ah a lungdong mi pei kan tlawm ve ti hna lo hi, an mawh hme maw?? tiin ka ruat ngai. Cucaah tulio ramchung ramleng ah a ummi vialte hna kan ram nih ram le miphun a daw taktak mi nusaltha pasaltha a herh bik lio can a si.

Chizawh cu, a nak, a rang, a sen kha a biapi lo, Zu a seh khomi chizawh tu kan herh timi bia kha tulio kanram ah a biapi cemmi a si bantukin! A dam ko nain, CNA/CDFs ah buandawn in aa tel I a lungdong colhmi le dohthlennak caah Phaisa voikhat/hnih pekah aa thuup colhmi nakin a dih dongh tiang nunthap in siseh chawva in siseh a lamkip in aa telmi pawl kha kan ram nih a kan herh lio can te a si. Credit: Salai Tial Thawng

2008 Phunghrampi Hrawk Cu Kum 30 Kan Uk Ko Uh Tinak Asilo! MAH chunmang nganbik mi cu 2023 thimhnak tuah khawh hi asi. 2023 thimhnak a tuah khawh ahcun Democracy ning in mipi cozah asi cang. Uknak nan kan chut mi cu a dik ko tinak asi cang lai. Cucaah MAH nih tuah ding mi 2023 thimhnak ah lut aa timh mi Palai le Party cu MAH nih uknak an kan chut mi hi a dik ko nan ti bia asi lai.

NLD MPs 120 leng nih SAC sinah Surrender an tuah. Hi hna hi MAH nih Uknak an kan chut mi hi a dik mi asi a ti tu an si. 2023 thimhnak ah lut an duh ve. Thong Inn ah Amay Su an va ton khah. Amay Suu thonginn in an chuak ahcun Raldohnak hi a dai ter lai, Amay Suu le MAH bia an I ruah lai I, savo an I phawt lai I hlan lio NLD chan kha kan phan ṭhan lai tiah a hngak mi NLD MPs rual an si.

Kawlram Milurel hi 54 million asi nain thimh nak ah Milurel cuzat nih vote an pek lawng ah thimhnak a nung timi cu Upadi ah aum lo. Democracy adik mi ram ahcun Milurel 51% – 75% nih vote an pek lawng ah thimhnak cu a nung. Kawlram ahcun Vote a pek mi zat in thimhnak hi a nung. Thimhnak hi Voithum in a tuah men lai. USDP an tam nak Kawl miphun umnak ah a tuah hmasa lai. Voi hnih nak ah Ramkulh khualipi le USPD umnak Pengkulh ah thimhnak an tuah lai. A Voithum nak Pengkulh vialte ah thimhnak an tuah te lai.

Voikhat thimhnak an tuah khawh in Amay Suu an thlah lai. PDF le EAOs cu Amay Suu nih a dai ter hna lai. Amay Suu cu Non-Violence asi caah Raldohnak a duh lo mi asi. Amay Suu nih a dai ter khawh hna lo ahcun; PEACE an tuah lai. PEACE an tuah ah EAOs le PDF CDF LDF cu MAH nih savo/ tinvo/ covo an pek hna lai. Cu hnu ah Thimhnak hmanung bik a tuah te lai.

Tlangcungmi cu Upadi kan remh piak hna lai: Pohma 261 ning in mah tein Ramkulh PM nan I thimh cang lai: PR mumal kan hmang lai caah Party pakhat nih cozah an si khawh ti lai lo: Tlangcungmi Palai tampi Hlutdaw ah nan um ve cang lai: Cuticun Tlangcungmi duhning in Upadi remh khawh asi lai tiah MAH nih a lemsoi hna. Cucaah NUG hawikom EAOs nakin MAH Hawikom EAOs an tam deuh. A chan cu NUG ah Tlangcungmi Federal pek a duh lomi Palai an um caah asi. NUG ah Federal a duh mi le a duh lo mi phu hnih an um tihi Chinmi nih kan hngalh ve maw?

Upadi cu Hlutdaw lawng ah remh khawh le siam khawh asi tiah MAH nih Tlangcungmi le Ramkhel Party rual cu a lem hna. UWSA nih Ramkulh (Pine) an hal mi cu Upadi remh awk ah kan bawmh hna lai tiah bia a kam hna (Pohma 52). 2008 phunghrampi cu 76% lawng in remh khawh asi. Civil Palai cu 75% lawng asi. Mipi thimh lomi Rallokap Palai 1% (Palai 5-6) telloin Upadi remh khawh asi lo. Upadi remh awk ah Rallokap Bawizik nih nawl pek a herh tinak asi. MAH telloin Upadi remh khawh asilo tinak asi.

MAH le a hawikom EAOs/ Party hna an I ceih mi cu: Hlutdaw loin Upadi a suai mi cu NUG CRPH NUCC ICNCC CDF PDF LDF lawng ansi an ti. CRPH cu Hlutdaw ai awh tu lawng an si. Hlutdaw tlin mi si awk ah Rallokap Palai 25% an um ti lo tiah an ti. NUG zong cu 2008 Upadi ning in Tamada le Vuanci hna an I thimh mi hi an palh ve mi asi. Federal Upadi le Phunghrampi zong hi Ralrhang kan tei hnu ah thah ding le a thar suai ding tu asi deuh. Aazat mi palai kan thlah hnu tu ah suai ding mi Upadi asi. Cucu Democracy asi fam cu. Hlutdaw telloin kan suai mi Upadi vialte cu Democracy phung nih a cohlan lo.

Chin Hlutdaw le Chin Cozah kan ngeih rih lo caah Chin Upadi le Chin Phunghrampi kan suai khawh rih lo. Cucaah Uknak le biaceihnak ah Chin Acts hi kan hmang awk asi. Chin Acts cu Mirang cozah, Kawl cozah kip le Hlutdaw kip nih an fek ter mi asi. Cucaah Dohthlen can Mipi uknak le biaceihnak caah CDF PDF CJDC ICNCC nih Chin Acts tu hi kan hmang awk asi. Kan mah tein kan suai mi Upadi cu kanmah bu chung caa lawng ah hman ding, Mipi uknak le biaceihnak ah hman cikcek lai u cih. Ralhrang le Fascist Policy asi.

NUG nih 2023 thimhnak tuah khawh lo ding in ka tuah lai tiah vawleipi hngalh in an thanh cang. MAH nih 2023 thimhnak tuah khawh ding in a lamkip in aa zuam ve. Cucaah EAOs PDF LDF CDF cu Vanlawng bak in an kan tuk cang. 2023 August hlan ah EOAs PDF LDF CDF tei awk ah aa zuam mi MAH asi. An kan tei lo I, 2023 thimhnak tuah khawh lo ding asi ahcun MAH nih 2008 phunghrampi kha a thah lai. A thar in kan suai lai a ti lai. Cuticun Kum 15 an kan uk chung ah Phunghrampi thar an suai lai. A dih in thimhnak an tuah lai I, MAH nih Kum 10 chung Tamada a ṭuan lai.

A hnu ah MAH tefa le a minung nih Tamada an ṭuan te lai. NUG acting Tamada Pu Duwa Lashila nih 2008 phunghrampi a thih cang, kan thah cang ati mi cu MAH caah Vanṭhat nak ah aa chuah siam ve te lai. 2008 Phunghrampi thah cu MAH nih Kum 30 kan uk seh tinak bantuk asi cang ko lo maw? Hlutdaw telloin Upadi that le nun ter phung asi lo. Hlutdaw loin Upadi suai le siam rai zong asi lo. Credit: Joseph R. Thang