CNA le CDF Mindat pumkhat siter khawh lonak aruang bik kong hi theih phu taktak a si!

CNA Le CDF Mindat Pumkhat Siter Khawhlo Tu Hna Hi Ramchung Ramleng Politicians Hna Ansi!
==========
CNA nih hriamnam an bawmh khawh lo mi cu anmah an i za lo caah asi tiah Boci Thawng Za Lian nih a ti. Raldoh pi peng ko hna nain an mah nih kir uh an ti hna. (CDF Lautu Chairman Interview)

Salai Isacc Khen, Mindat MPs Aung Thant le Ni Ling Aung (Kawlpa), MP Pa Thang hna nih CNA an rem hna lo. CDF kha PDF tiah thlen an duh caah Dr. LHSK nih a sik hna. Federal an fiang lo an ti hna. Tedim MP Mang Hen Dal PDF Zoland tiah a thlen khawh. ZFU timi Zomi Federal Union Party an dir ve.

Lakhruak Chin Cozah siamnak le Dohthlen can hruaitu ah CNA aa tel ve kha cung lei upa 5 nih an duh lo. CDM bawmnak le CDF bawmhnak vialte anmah nih tlai an duh. CJDC le CDF kip ah anmah nih Ralbawi le uktu luzik si an duh. CJDC le CDF nih an cohlan hna lo. CNA an i bochan caah asi tiah Upa 5 nih an ruah caah CNA an huat i an hnahchuah cang.
CJDC nih Lakhruak Chin Cozah siam awk ah CDF le PDF vialte nih cohlan mi le hnatlak mi asi. Senthuh in fek ter mi asi nain, PDF Zoland cu Mang Hen Dal nih, CDF Mindat cu Isacc Khen nih, CDF Paletwa cu Isacc Khen nih kal hlah uh an ti hna.

CDF Mindat, CDF Paletwa, PDF Zoland le CNO CNDF bawmhnak in MPs le Party upa hna lawng in Chin Cozah siam an duh. Cunglei upa 5 nih ara lai mi Chin Cozah ah PM le Vuanci, Luban vialte si an duh, CJDC nih EC nih a thimh lai, vote a tei mi nih PM le Vuanci siseh ti asi ve. CNF Pu Khua Uk Lian an sawm khawh i, Salai Isacc Khen minung asicang. Charter an chuahpi mi ah cung lei 5 le MP lawng nih uktu le Ralbawi ah si awk asi caah CNF le ZZMLS nih kan i tel ve lai lo an ti. Dai nih a ti ve.

CNO/CNDF, PDF Zonland/ ZFU, le Kanpelet cu Alliance an tuah ter khawh hna caah CNO cu CJDC in aa phuah ve. MDF le CDF Senthang cu Mindat mahamei cia an si. PRA Magway he Mahamei si in fek ter an duh. Cunglei upa 5 hna nih CNF / CNA cu Hakha Thantlang ta asi tiah Gospel an vak pi. Ramchung ramleng aum mi vialte nih CDF mindat lawngte in dirh awk an hnatlakpi hna. Phaisa tampi an thawh ve.

Pu Aung Thant le CUnglei upa 3 nih phaisa an vaivuan caah an zumh ti hna lo. CBCUSA bawmhnak cu anhmuh ve, CBCUSA meithal an pek ve hna tikah, Tamdeuh cu CNA ah an lunthin aum. Nain Mi cheukhat kalsual mi hna CNA huat in an i lak rih. Ling Thar (လီးထာ) timi pa Paletwa in CNA thawlh awk ah AA he hnatlak nak kan ngeih a ti. CNA le Chin ah pum khat si aduh mi Mindat pa nih Comments in a sik len.

VP1 Dr LHSK cu VP2 ah an tum ter i Mindat pa Thang Ning Kee cu VP1 ah an kai ter nain, Mindat mi a sizung khawh ti hna lo. CNF CNA he pumkhat si khawh lo ding in Tedim, Falam, Mindat, Mara tbk hna a tukforh tu hna hi: Ramchung Ramleng Politicians rual le ram dawtu aa ti mi lawng te an si hna.

Photo: (လီးထာ) nih a tial mi le a sik tu pa comment, CNO, ZFU le CDF Mindat Alliance an tuahnak thanh ca. Sual a ka phawt i a ka pamh mi nan um ahcun tlingkhitkhet tein ka tial lai, Nika pho in kan pho te hna lai.

CDF-Thantlang Council Hruainak In Khuate Khuabawi Thimnak An Tuah! Thantlang peng Khuate 51 ah CDF-Thantlang Council hruainak in Khuabawi thimnak an tuah tiah, theih a si. “CDF-Thantlang Council nih biakhiahnak an tuah bantuk in November ni 27 hlan ah Thantlang peng khuate 51, khuabawi vialte cu mah le khua cio in thimnak ngeih cio ding ah biachah a rak si i a tu bantuk in thimnak kan tuahnak hi a si tiah, Vanzang tlang Public Administration chungtel pakhat nih The Chin Post ah a chim.

Tutan khuabawi thimnak i teinak a hmutu hna cu kum khat chung rian tuan a si lai i cu hnu ah thimnak tuah than a si lai tiah, a chim chap. Thantlang peng khuabawi thimnak ah hin khuatam deuh cu tlamtling tein thimnak an tuah kho cang hna i Council zong nih theihpinak a tuah cang hna.

Zarhhnih Tluk Mei A Rawh Hnu In Hakha Khua Chungah Sabuti Man A Kai! Chin ramkulh khualipi Hakha ah a luancia October 21 in mei rawh hram ai thok i, November 1 tiang ah mei an remh khawh rih lo caah sabuti man a kai, tiah theih a si.

Hakha ah sabuti a zuartu pakhat nih, “Mei a rat lonak a sau tuk cang. Mei a ṭhat ahcun elctric mei in kan rak chuan tawn i a tlamtling ngai. Atu cu meihol in chuan a si tikah meihol tam tuk a dih. Meihol man zong cu tunkhat ah 15,000 in 18,000 kar lawngte a si tikah a har ngaingai,” tiah The Chin Post ah a chim.

Kadang ah cun sabuti kheng khat ah kyats 1,500 lawngte in an rak zuar cang nain kan nih cu kan rak kai duh lo. Asinain mei a rawh caan a sau tuk cang pinah meihol man a kai tuk ruangah sabuti man zong kai lo awk a ṭha ve ti lo i, nizan October 31 in sabuti kheng khat ah kyats 1,500 le sapherh pakhat ah kyats 500 in kan zuar cang, tiah a chim chap.

Hakha khua chungah mei a rawhnak zarhhnih tluk a si cang i, cheukhat cu meihol an ngeih ti lo caah inn pawngkam thinghreu an khawmh in rawl a chuanmi zong an um. Cheukhat cu meihol le thing an ngei lo i, rawldawr le sabuti dawr ah a eimi zong an um, tiah theih a si. Laimi tam deuh nih sabuti cu an tlaihchan ngaimi Lai rawl phun khat a si i, cheukhat sabuti dawr ah cun khengchap(လိုက်ပွဲ) a um ti lo, tiah theih a si.

Matupi Peng Ah Mizapi Ukhruainak Phu Thar An Dirh Ṭhan. Chin ramkulh, Matupi peng ah mizapi ukhruainak phu a thar in kan dirh khawh ṭhan cang, tiah mizapi ukhruainak phu nih nizan October 31 ah cathanh an chuah tiah theih a si. SAC nih hranhram in nawlngeihnak an lak hnu in mizapi nih duhlonak langhter a si.

Cun a luancia 2021 Febuary 27 ah matupi peng mizapi ukhruainak phu dirh a rak si ko nain NUG lamhruainak he a luancia October 6 ah Matupi peng mizapi ukhruainak phu rak dirh ṭhan a si. Matupi peng mizapi ukhruainak phu cu ramkomh hluttaw palai 2, ramkulh hluttaw palai 1, zatlangbu aiawh in 4, zungkip ṭuanvo ngeitu 2, Matupi CDF ṭuanvo ngeitu 2, an dihlak minung 10 in an dirh, tiah theih a si.

October Thla Chung Ah SAC Kuttang Bawi Ngan 13 An Thi! Bo-hmu-kyi 2, duh-bo-hmu-kyi 1, bo-hmu 3, bo-gyi 1, palik bawi 4, pengkulh uktu 1, pengkulh biaceih bawi 1 tiin SAC lei ṭangtu bawi ngan 13 cu October thla chung ah an thi, i bu-hmu 2 tlaih an tong tiah theih a si.

SAC ralkap le tualchung hriamtlai phufonh kar ikahdohnak ah SAC ralkap lei in ralbawi nganngan hna an thi, cun an nun bu in tlaihkhih a tong mi ralbawi hna zong an um tiah theih a si.

SAC Ralbawi Le Bangladesh Ram Nawlngeitu Hna Tonnak An Ngei. Mayanmar-Bangladesh kaphnih ramri hngak tonpumhnak meeting cu, October 30 zing sml 10:30 ah Bangladesh ram Teknak khua Shahparrdwip ah an tuah, tiah theih a si.

Cu tonpumhnak ah SAC lei tuanvo ngeitu hna nih Bangladesh ram chung i PDF ralkap an umnak hmun le sakhan cu hmanthlak he hmuhsaknak le fianternak an tuah pinah Myanmar le Bangladesh ramri a him khawh nakding ah hmunkhat ah rianṭuanṭi ding in hnatlaknak ngeih dingin ceihhmainak an ngeih pi hna, tiah theih a si.

Cu tonpumhnak ah SAC kuttang palik phu, No.1 ramri a hngaktu, caan karlak palik bawi Ye Way Soe telh in minung 6 an kai i, Banladesh ram in No.2 ramri hngak Battalion Commander Lt. Colonel Sheikh Khalid Mohammad Iftekhar telh in minung 8 an kai ve, tiah theih a si.

Cun Myanmar le Bangladesh ramri ah hram a bunhmi PDF ralkap hna ṭhawl ding le phung ning loin luh chuahnak a um ahcun tlaihkhih piak ding in SAC lei nih nawlnak an tuah tiah theih a si.

Kanpauk Htawai Hmunram Ah SAC Ralkap 5 An Hriamthil He An Zaam. Tanintharyi ramṭhen Htawai pengkomh Kanpauk hmunram SAC ralkap Mawrawari (မောရဝတီ) ti lei ralkap headquarters in ralkap 5 cu an hriamthil he an zaam caah SAC ralkap phu nih an kawl hna tiah theih a si.

“An tlikzaam thawng cu a fiangmi a si ko, SAC ralkap hna nih Kanpauk hmunhma cu checkhlatnak an tuah, motor he mi kawlnak an tuah” tiah Kanpauk khuami pakhat nih a chim. “An tlizaam ti thawngpang cu a dikmi a si ko, a tli mi hna nih an nupi cu an kaltak hna i, an hriamthil lawng an i zaampi” tiah an chim.

September thla chung Mawrawari(မောရဝတီ ) ti lei ralkap an umnak in hin ralkap 12 an zaam cang, nikum kum donghnak lai zong ah a tli zaam mi an um pah lengmang caah a tutiang ah ti lei ralkap an umnak in a zaam mi dihlak hi ralkap 30 leng an si cang tiah theih a si.

Sagaing Ramṭhen Yinmapin Le Pale Peng Ah October Thla Chung Ah SAC Ralkap Nih A Bubu In Minung 30 Leng An Thah Hna. Sagaing ramthen, Yinmabin peng le Pale peng ah SAC ralkap nih October thlachung ah a bubu in minung 30 leng an thah hna tiah tualchung hriamtlai phu hna le tualchung mi hna nih an chim.

October 21, Sagaing ramṭhen Yinmabin peng Shwehlan khua cu SAC ralkap thazaang 150 he an rak luhhnawh i tualchung mi 3 le tualchung hriamtlai phu PDF chungtel 12 cu an bu in an rak thah hna tiah theih a si.

Cun Sagaing ramṭhen Pale pengchung ah October 25 ah SAC ralkap hna nih Pale peng pah-kah-phah office umnak hmun cu helicopter 5 hmang in an kah hna caah PDF nih an tlaihmi hna minung 15 le tang 8 cawnglio ngakchia pakhat telh in tualchung mi 3 hna cu SAC ralkap nih an thah hna tiah tualchung mi hna nih an chim.

SAC ralkap hna nih cun Hpalanpin khua le Taepinkyae(သဲပြင်ကျယ်) khua inn an khangh leng ah, motor pakhat zong an khanghchih, cun phaisa sing 1700 le laptop, printer hna le zeidang thilri hna zong an lak chih caah an laak mi dihlak hi sing 2000 hrawng a si tiah theih a si.

Kalaymyo Ah SAC Ralkap Bomb Puahhnawh An Tong, Ralbawi Telh In 3 An Thi. Kalaymyo thlanglei Kalay Technology University gate hngakmi SAC ralkap hna cu October 31, zinglei ah PDF Kalay nih bomb puahhnawh in an doh hna tiah theih a si.

October 31, zinglei suimilam 10:00 hrawng ah TU pawng ah PDF Kalay nih bomb an hmanh ti thawng an theih caah bomb thianhhlimh ding an tuah lio ah puahhnawh an ton hi a si. “Bomb aa tlaihmi SAC ralkap pa cu a takpum zong ai cheu dih, cun a hnu ah a dir mi pa cu a tai in a tan” tiah PDF Kalay in bomb tlaitu phu chungtel pakhat nih a chim.

Bomb puahhnawh tongtu SAC ralkap pakhat cu a takpum hmunkip ah an i sarh dih, pakhat cu a tai in a tan i a dang pakhat cu a hliamhma a fah tuk ruang ah a thi, cu hna lak ah cun ralkap pakhat ai tel tiah theih a si.

Tutan kahdohnak hi PDF Kalay nih “ Yatu Project” min bunh in tuahmi a si i, October 10 lio ah Kalaymyo, Naykyatait hmai ah SAC ralkap kut in faktuk in a nunnak liam mi PDF Kalay battalion 6 in ralkap Lal Biak Tluang le ralkap Lal Chan Him hna 2 caah lehrulh kan cham a si tiah theih a si. Credit: The Chin Post

Be the first to comment

Leave a Reply

Your email address will not be published.


*